Xogħol ta’ Restawr fil-KaPpella tal-Grazzja Qrendi
Ix-xogħlijiet ta’ restawr fuq diversi kappelli mifruxa f’żoni rurali issa jiffurmaw lista numeruża li turi biċ-ċar l-impenn u l-investiment tal-Gvern. Dan mhux biss qed jikkonserva binjiet storiċi u ta’ valur nazzjonali, iżda qed jindokra kull rokna ta’ pajjiżna biex l-ambjent storiku u infrastrutturali jitjieb. Pajjiżna hu mgħoni b’binjiet ta’ valur storiku. Għaldaqstant huwa d-dmir tagħna lkoll li nikkonservaw dawn il-binjiet li jiffurmaw parti mis-sisien ta’ l-istorja ta’ pajjiżna. Il-Ministru Ninu Zammit qal dan meta kien qed izur ix-xoghlijiet ta’ restawr fuq il-Kappella tal-Grazzja fil-Qrendi.
Din il-kappella nbniet fl-1658. Matul it-tieni gwerra dinjija partijiet minnha kellhom jerġgħu jinbnew minħabba ħsarat ikkaġunati mit-theżżiż tal-bombi.
Il-Ministru Ninu Zammit kompla billi qal li, wara li ġew investigati l-istrutturi u l-kundizzjoni tal-kappella ġie stabbilit li d-deterjorazzjoni tal-ġebla qed isseħħ prinċipalment minħabba movimenti strutturali, attivita` bioloġika u movimenti oħra fil-binja tal-kappella. Barra minnhekk il-fili miftuħin ta’ bejn il-ġebel kif ukoll il-ħsarat li kien hemm fuq il-bejt kienu qed jikkawżaw dħul ta’ kwantita` ta’ ilma tax-xita kemm fil-ħitan, kif ukoll fil-kappella nnifisha u dan il-proċess kompla jaċċellera kemm il-proċess ta’ deterjorazzjoni, kif ukoll il-moviment strutturali. Instabu diversi konsenturi kemm fil-ħitan kif ukoll fis-saqaf tal-kappella, kemm fuq in-naħa ta’ ġewwa, kif ukoll fuq barra.
Ix-xogħol li qed isir mill-ħaddiema tat-Taqsima tar-Restawr fi ħdan l-Ministeru għar-Riżorsi u l-Infrastruttura hu maħsub li jintemm il-ġimgħa d-dieħla. Il-Ministru spjega li x-xogħlijiet kienu jikkonsistu f’tindif tal-bejt tal-kappella mill-pjanti li kienu kibru minn ġo l-ixquq, u tiswija tad-deffun li kien tkisser sabiex jiġi aċċertat li ma jidħolx aktar ilma minn ġos-saqaf. Il-faċċati qed jitnaddfu minn xi kisjiet tas-siment peress li din il-kisja għamlet ħafna ħsara lill-ġebla. Sar ukoll tindif estensiv minn attivita` bioloġika li għalkemm ma’ tagħmilx ħsara, tagħti dehra kerha lill-binja tal-kappella. Il-fili miftuħin qed jitkaħħlu b’taħlita apposta u kompatibbli mal-ġebla lokali. L-aperturi ta’ l-injam u tal-ħadid kif ukoll iz-zuntier u l-kappella minn ġewwa, qed jingħataw dehra isbaħ kif jixraq lill-kappella.
Għalkemm ix-xogħol ta’ restawr ser jintemm fil-ġranet li ġejjin, l-istudji ser ikomplu fuq perjodu tas-sena, bil-għan li tkun tista tittieħed deċiżjoni jekk hemmx bżonn ta’ interventi biex nipproteġu din il-kappella minn movimenti strutturali.
Fl-aħħarnett il-Ministru qal li x-xogħlijiet li se jkunu mwettqa matul din is-sena mis-sezzjoni tar-restawr ma jinkludux biss kappelli u knejjes iżda xogħlijiet ta’ natura akbar bħal restawr u konsolidament tas-swar, bastjuni u fortifikazzjonijiet. Fil-fatt hu maħsub li matul din is-sena ser jinbdew diversi xogħlijiet simili, fosthom xogħol ta’ restawr u konsolidament fuq is-swar fit-Triq Sa Maison, fuq parti mis-swar fl-Imdina eżattament taħt il-Palazz Vilhena, fuq id-daħla prinċipali ta’ l-Imdina, fuq il-bini tal-Kavallieri ta’ San Gwann fil-Belt u fuq is-swar ta’ Couvre Port fil-Birgu.
DOI – 09.02.2007
Other Press Releases:
PR261959en
PRESS RELEASE BY THE OFFICE OF THE SPEAKER The Speaker of the House of Rep...
PR261959