Xejriet pożittivi fost is-setturi tal-frott u ħaxix matul l-2006
Il-Ministeru għall-Affarijiet Rurali u l-Ambjent jinnota b’sodisfazzjon l-istatistika maħruġa llum mill-Uffiċċju Nazzjonali ta’ l-Istatistika, li tagħti ħarsa lejn is-settur tal-frott u l-ħaxix matul l-aħħar kwart tas-sena li għaddiet. L-istatistika ppublikata llum tagħti wkoll rendikont globali ta’ l-2006.
Din l-istatistika turi li fir-rigward tal-frott u ħxejjex, kien hemm żieda sostanzjali fil-volum tal-prodotti li għaddew mill-Pitkalija. Meta mqabbel mal-2005, jirriżulta li l-volum ta’ frott u ħaxix irreġistra żieda ta’ 12 fil-mija, li hu ekwivalenti għal aktar minn 5.1 miljun kilo ta’ ħaxix u frott.
Il-Ministeru għall-Affarijiet Rurali u l-Ambjent jinnota wkoll aspett sinifikattiv ieħor li minkejja ż-żieda fil-volum, kien ukoll żieda fil-valur totali tal-frott u ħaxix matul l-2006. Din kienet żieda sinifikanti oħra, tant li laħqet kważi 10 fil-mija, li tfisser dħul ta’ aktar minn Lm700,000 aktar mis-sena ta’ qabel.
Il-Ministeru għall-Affarijiet Rurali u l-Ambjent jagħmilha ċara li dawn iċ-ċifri ma jfissrux li m’hemmx lok għal aktar titjib fis-settur agrikolu Malti. Madanakollu dawn iċ-ċifri jikxfu wkoll il-qerq ta’ min jipprova jpinġi kollox negattiv u dan għal skopijiet partiġġjani. Il-fatti huma li d-dħul tal-bdiewa mill-frott u ħaxix żdied sostanzjalment matul is-sena l-oħra u dan mingħajr ma wieħed jikkalkula l-għajnuna finanzjarja kbira li jingħataw kull sena f’sussidju u għajnuniet.
Dawn iċ-ċifri jindikaw ukoll li aktar ma jgħaddi ż-żmien aktar qed tkompli tikber id-domanda għall-prodott agrikolu frisk lokali mill-konsumatur u dan minħabba titjib fil-grading u fil-kwalita’. Dan jippremja l-isforzi tal-Ministeru, fost l-oħrajn, li jagħmel kampanji regolari favur il-kwalitajiet pożittivi tal-prodott frisk Malti.
Il-Ministeru għall-Affarijiet Rurali u l-Ambjent itenni li dawn iċ-ċifri għandhom iservu wkoll biex iwasslu messaġġ ta’ fiduċja fost il-bdiewa Maltin u Għawdxin. Il-Gvern itenni l-impenn tiegħu li jħaddem politika li tħares l-interessi tal-bdiewa Maltin u Għawdxin u dan fil-kuntest tar-regoli tal-Politika Agrikola Komuni ta’ l-Unjoni Ewropea.
DOI – 07.02.2007
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958