Għajnuna għall-ħarsien ta’ gallariji tradizzjonali ta’ l-injam
Madwar Lm40,000 ingħataw lil 84 resident fis-Siġġiewi, iż-Żejtun u fir-Rabat, Għawdex, taħt skema li l-Awtorità Maltija għall-Ambjent u l-Ippjanar (MEPA) għandha għall-manutenzjoni jew tibdil ta’ gallariji ta’ l-injam.
Minn meta bdiet l-iskema fl-1996, madwar 300 applikant ibbenefikaw mill-iskema u ngħataw mal-Lm150,000. Kull perjodu ta’ żmien, il-Bord tal-Mepa jiddeċiedi dwar liema lokalitajiet jew organizzazzjonijiet għandhom jibbenefikaw minn din l-iskema.
S’issa,residenti fil-Birgu, Bormla, l-Isla, il-Kalkara, il-Belt Valletta, il-Furjana, bosta każini u għaqdiet filantropiċi madwar Malta, u sidien ta’ proprjetà skedata rċevew għajnuna għal gallariji ta’ l-injam.
Is-somma li jirċievi l-applikant tkopri 60% ta’ l-ispejjeż, li jistgħu jkunu għal xogħlijiet ta’ manutenzjoni jew biex tinbidel gallarija, per eżempju: minn aluminium għal waħda tradizzjonali ta’ l-injam.
“Din l-inizjattiva hija pass ieħor lejn il-ħarsien ta’ parti mill-patrimonju kulturali tagħna – il-galleriji ta’ l-injam. Dawn il-gallariji tradizzjonali huma parti mportanti mill-estetika tal-qalba tal-villaġġi tagħna u mill-identità li għandu l-istil tal-bini Malti,” qal il-Ministru għall-Affarijiet Rurali u l-Ambjent, l-Onor. George Pullicino meta ppreżenta l-għotjiet lir-residenti.
”Il-Gvern jagħraf l-importanza tal-ħarsien ta’ din l-identità. Din ukoll hija l-ambjent u għaldaqstant irid ikun protett – kemm b’enfażi fuq il-valur kulturali li għandhom dawn il-gallariji tradizzjonali, kif ukoll bi skemi li jinċentivaw u jgħinu lis-sidien biex iżommu dawn il-gallariji fi stat tajjeb kif jixraq lill-ambjent Malti.
“Żgur li dawn il-persuni li għandna hawn illum, huma fost dawk li mhux biss jistmaw il-valur tad-djar tagħhom, imma fuq kollox għandhom sens ta’ estetika u apprezzament ta’ x’verament jikkostitwixxi l-ambjent tradizzjonali u arkitettoniku Malti. Huwa xieraq li dawn in-nies jibbenefikaw minn skemi bħal dawn għax permezz tagħhom qed inħarsu l-patrimonju ta’ pajjiżna u dak li jirrifletti l-identità unika tagħna,” qal il-Ministru Pullicino.
DOI – 07.02.2007
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958