IS-SEGRETARJU PARLAMENTARI FIL-MINISTERU TAL-ĠUSTIZZJA U L-INTERN L-ONOR. CARMELO MIFSUD BONNICI JINDIRIZZA LILL-AVUKATI U PROKURATURI LEGALI ĠODDA
Waqt ċerimonja ta’ l-għoti tal-warrants lil 38 avukat u 3 prokuraturi legali ġodda, is-Segretarju Parlamentari fil-Ministeru tal-Ġustizzja u l-Intern Dr Carmelo Mifsud Bonnici, filwaqt li awguralhom il-ħidma t-tajba għadda biex elenka numru ta’ punti li permezz tagħhom is-settur legali nfirex ferm iktar milli kien fi żminijiet oħra.
Huwa rrefera għall-fatt illi issa hemm il-proċedura l-ġdida ta’ l-ittra uffiċjali eżekuttiva sija għall-kambjali kif ukoll għall-debiti ta’ taħt il-ħamest’elef lira (Lm5,000). Huwa qal li fi tlett snin ġew ippreżentati 1,300 ittra uffiċjali eżekuttiva fuq il-kambjali u 5,081 ittra uffiċjali fuq debiti taħt il-Lm5,000. Dan ifisser li b’din il-proċedura, l-ewwel, ġew iffrankati 6,375 kawża mill-Qorti u t-tieni, li serviet sabiex il-poplu u l-Istat iffranka spejjeż ġudizzjarji. L-ewwel, direttament il-poplu għax fuq il-kalkolu tas-sena 2005 biss, jidher illi ġew iffrankati Lm140,000 fi spejjeż ġudizzjarji. It-tieni, indirettament fuq it-taxxi tal-poplu għax biex jinġieb l-istess riżultat kien ikun hemm il-bżonn li jiġu maħtura d-doppju tal-ġudikanti li għandna llum bl-istaff kollu tagħhom u bl-ispejjeż anċillari kollha.
L-Onor. Carmelo Mifsud Bonnici qal ukoll illi bit-tisħiħ fiċ-Ċentru ta’ l-Arbitraġġ, is-sena l-oħra daħlu 900 każ ta’ arbitraġġ li minnhom 7 kienu ta’ arbitraġġi internazzjonali. 5 minn dawn daħlu tul is-sena 2006. Din hija għalqa ġdida għall-avukati u ħajjar lill-avukati l-ġodda sabiex jispeċjalizzaw f’dan is-settur. Is-Segretarju Parlamentari Mifsud Bonnici rrefera wkoll għall-fatt illi ċ-Ċentru tal-Medjazzjoni qiegħed jiffunzjona wkoll u tul is-sena li għaddiet kien hemm l-ewwel 10 każijiet li ġew riferuti hemmhekk direttament mill-Qorti. Huwa kompla jirreferi għall-fatt li bħalissa fil-Parlament qiegħed jiġi diskuss u dibattut it-Tribunal Amministrattiv li permezz tiegħu x-xjenza legali tad-dritt amministrattiv għandha tissoda u din għandha tkun għalqa oħra ta’ speċjalizzazzjoni għall-avukati.
Quddiem dawn l-erba’ setturi ġodda li nfetħu, kollha indirizzati sabiex jagħtu għajnuna ġdida liċ-ċittadin, is-Segretarju Parlamentari Carmelo Mifsud Bonnici ħajjar lill-avukati sabiex jużawhom u jipprattikaw fihom biex jiddefendu lill-klijenti tagħhom fl-inġustizzji li huma jistgħu jsibu rwieħhom fihom.
Huwa għalaq biex irringrazzja għall-ħidma li saret ġewwa l-Qrati f’dawn l-aħħar sitt snin u dan għax quddiem il-Prim’Awla, Qrati tal-Maġistrati u Tribunali għal Talbiet Żgħar ġew reġistrati 29,896 kawża ġdida u ġew deċiżi 34,959 kawża. Dan jindika ħidma kbira meta nafu li sitt snin ilu l-kawżi pendenti kienu 14,668 u fl-aħħar tas-sena li għaddiet kienu 9,746, jiġifieri tnaqqis ta’ 33% tal-kawżi pendenti. Dawn huma riżultati sodisfaċenti u li juru b’mod mill-iktar ċar li r-riformi li qiegħed jagħmel il-Gvern qegħdin jagħtu r-riżultati t-tajba.
DOI 30.1.2007
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958