Konferenza fuq Prospetti ta’ Karrieri f’Għawdex
Il-Kunsill għall-Edukazzjoni u Taħriġ Vokazzjonali għal Għawdex flimkien maċ-Ċentru ta’ l-Universita’ f’Għawdex nhar il-Ġimgħa 26 ta’ Jannar 2007, organizza għall-ewwel darba konferenza ta’ konsultazzjoni dwar il-prospetti ta’ karrieri f’Għawdex, fil-Grand Hotel, Għajnsielem.
Il-Konferenza kkonsistiet f’rapport qasir dwar il-“Prospetti ta’ Karrieri f’Għawdex”, imħejji mill-Kunsill għall-Edukazzjoni u Taħriġ Vokazzjonali għal Għawdex, segwit minn diskussjonijiet fuq il-prospetti eżistenti għall-istudenti tas-Sixth Form li qed jippreparaw għal dħul fl-Universita’ ta’ Malta, għall-istudenti ta’ l-MCAST u studji oħra vokazzjonali, għall-istudenti li jħallu l-edukazzjoni formali kmieni, kif ukoll għal dawk li ma jkollhomx il-kwalifiki meħtieġa.
Il-Kunsill għall-Edukazzjoni u Taħriġ Vokazzjonali għal Għawdex huwa ffurmat minn rappreżentanza tas-suq edukattiv, ekonomiku u turistiku, fosthom il-Kamra tan-Negozju għal Għawdex u l-Assoċjazzjoni tat-Turiżmu. Minbarra li dan il-kunsill għandu l-għan li jqajjem suġġerimenti u rimarki dwar l-edukazzjoni, jista’ wkoll jiffaċilita l-kordinazzjoni bejn min jgħallem u min jimpjega.
Waqt l-inawgurazzjoni tal-konferenza, l-Onor Giovanna Debono, Ministru għal Għawdex, tkellmet dwar l-importanza ta’ iktar inizjattiv favur l-iżvilupp tas-settur edukattiv u qalet li dan il-qasam huwa marbut direttament mas-settur ta’ l-impjiegi u l-prospetti ta’ karrieri.
Il-Ministru Debono qalet li ż-żgħażagħ Għawdxin illum għandhom opportunitajiet mill-iktar wiesa’, u rreferiet b’mod partikolari għan-numru ta’ studenti Għawdxin li bħalissa qed isegwu kors fl-Universita’ ta’ Malta li tela’ għal 800, filwaqt li iktar minn 600 student Għawdxi ggradwaw fl-aħħar tlett snin.
Il-Ministru Debono semmiet wkoll id-diversi proġetti li qegħdin jiġu mplementati mill-Ministeru għal Għawdex fir-rigward tal-qasam ta’ l-edukazzjoni, inkluż id-diversi korsijiet li ġew organizzati b’fondi ta’ l-Unjoni Ewropea u li minnhom ibbenefikaw b’mod dirett 600 Għawdxi. Dawn il-korsijiet ġew offruta flimkien ma’ għadd ta’ korsijiet oħra li saru permezz ta’ fondi Nazzjonali fiċ-Ċentru ta’ l-Universita’ f’Għawdex, fiż-żewġ Ċentri MCAST, fl-ITS, fl-ETC u fiċ-Ċentru Għawdxi ta’ l-Arti u l-Artiġjanat Wistin Camilleri.
Inizjattivi oħra li ħa l-Ministeru għal Għawdex jinkludu l-iskemi li indirizzaw l-iżvilupp tar-riżorsi umani f’Għawdex kif ukoll proġetti bħall-bini taċ-ċentru għal taħriġ fl-industrija turistika fil-Qala, l-Incubation Centre għall-Artiġġjanat kif wkoll it-titjib tal-Villaġġ tas-Snajja’ f’Ta’ Dbiegi.DOI 29.01.2007
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958