Left arrow Go Back

Jitlesta x-xogħol fuq it-tielet proġett ta’ toroq ko-finanzjat mill-Unjoni Ewropea

PR0111
Date Icon 29/01/2007

Numru sabiħ ta’ tfal membri tal-Malta Cycling Federation flimkien ma’ xi ġenituri dal-għodu żanżnu l-passaġġ għar-roti li hemm fl-aħħar parti ta’ Triq Ħal Far, hekk kif tlesta x-xogħol infrastrutturali kollu f’din it-triq, li nbniet mill-ġdid b’ko-finanzjament mill-Unjoni Ewropea. It-tfal kienu qed jieħdu sehem f’fun run li ġiet organizzata fl-okkażjoni ta’ l-inawgurazzjoni ta’ din it-triq mill-Prim Ministru, l-Onor. Lawrence Gonzi fil-preżenza tal-Ministru għall-Iżvilupp Urban u Toroq, l-Onor. Jesmond Mugliett. 

Din il-parti ta’ Triq Ħal Far, b’tul ta’ tliet kilometri hija it-tielet proġett ta’ toroq li nbnew mill-ġdid b’ko-finanzjament mill-Unjoni Ewropea li tlesta f’pajjiżna wara dawk ta’ Vjal l-Avjazzjoni Ċivili f’Ħal Luqa u t-triq oħra f’Għawdex. Għal dan il-proġett kien hemm allokati €4.7 miljun taħt il-Programm tal-Fond għall-Iżvilupp Reġjonali Ewropew ta’ Malta għas-snin 2004-2006. Dan il-Fond jiffinanzja sa 75% ta’ l-ispejjeż ta’ proġetti infrastrutturali ta’ dan it-tip. 

Triq Ħal Far hija kruċjali għall-ekonomija tal-pajjiż peress li din tintuża ħafna minn traffiku ta’ vetturi kummerċjali iġġenerat mill-Freeport u l-Bonded Stores, filwaqt li taqdi wkoll il-bżonnijiet tal-Qasam Industrijali ta’ Ħal Far li qed jespandi b’rata mgħaġġla. Minħabba f’hekk, it-treġija tat-traffiku kien aspett li ingħata prijorità għolja waqt ix-xogħlijiet bil-proviżjon ta’ rotot alternattivi għall-vetturi li s-soltu jużaw din it-triq.  

It-triq inbniet skond Klassi 1 ta’ l-istandards tal-bini tat-toroq ta’ l-Awtorità dwar it-Trasport ta’ Malta. Dan ifisser li din tiflaħ iġġorr aktar minn tliet miljun vettura ta’ 30 tunellata matul il-ħajja tagħha.  

Ta’ min jgħid li x-xogħlijiet fuq din it-triq, li nfetħet għat-traffiku f’Diċembru, tlestew madwar erba’ xhur qabel iż-żmien stipulat fil-kuntratt, u dan minkejja li fil-proġett żdiedu bosta elementi li ma kienux ippjanati oriġinarjament. Dawn kienu jinkludu t-tqegħid ta’ ‘main’ ġdid tad-drenaġġ biex jgħaqqad is-sistema tal-qasam industrijali ta’ Ħal Far ma’ dik tal-Freeport - li pprovda wkoll servizz lil bosta residenzi f’Bengħajsa, tiswijiet estensivi fuq main tad-drenaġġ eżistenti, il-bdil ta’ main ta’ l-ilma li nstab fi stat deterjorat wara li bdew ix-xogħlijiet, kif ukoll iċ-ċaqlieq ta’ bosta ‘ducts’ li kienu aktar baxxi minn dak li kien jippermetti l-livell ġdid tat-triq.  

Din it-triq, bħat-toroq kollha li nbnew fl-aħħar snin, tlestiet minn kollox - anke f’dak li huwa xogħol ta’ landscaping, bankini u sinjali. 

Minbarra li hija mgħammra bl-aħħar ġenerazzjoni ta’ dawl li jnaqqas l-impatt fuq l-ambjent rurali tal-madwar, matul Triq Ħal Far inbnew ukoll bankini wesgħin għal użu pedonali u ċiklistiku. Dan ifisser li fin-nofsinhar ta’ Malta issa teżisti rotta għall-mixi u ċ-ċikliżmu, twila 6.5 kilometri li tieħu mill-Ajruport Internazzjonali ta’ Malta sal-Freeport. 

Waqt li kien qed jitkellem mat-tfal li ħadu sehem fil-‘fun run’, il-Prim Ministru, l-Onor. Lawrence Gonzi qal li din it-triq mhux ser isservi biss għat-trakkijiet kbar u containers illi jgħaddu minnha, iżda taqdi wkoll lill-eluf ta’ familji li jinżlu jgawdu l-kampanja li hawn fl-inħawi ta’ Ħal-Far u Bengħajsa, speċjalment fil-Ħdud. 

It-tlestija tal-proġett ta’ Triq Ħal Far testendi bi tliet kilometri oħra ir-rotta ta’ toroq mibnijin skond l-ogħla standards. Dan ifisser li l-poplu Malti issa jista’ jsuq minn Birżebbuġa sa Burmarrad, l-Imġarr u s-Siġġiewi fuq toroq ta’ l-ogħla kwalità. Ifisser ukoll li mis-sena 2000 s’issa, l-Gvern bena mill-ġdid mal-25.8% tan-network ta’ toroq arterjali u distributorji ta’ Malta. 

Intant, bħalissa qed isiru l-aħħar irtokki fuq tliet tenders għall-bini mill-ġdid ta’ tliet toroq arterjali jew distributorji li ser ikunu ko-finanzjati mill-Programm tal-Fondi Strutturali ta’ l-Unjoni Ewropea ġdid għal Malta. It-toroq li ser jinbnew mill-ġdid huma il-bypass ta’ Marsascala, Triq Valletta fiż-Żurrieq u parti mill-bypass ta’ Birkirkara. Is-sejħa internazzjonali għal dawn it-tenders ser tkun ippubblikata fil-ġimgħat li ġejjin.

DOI - 29.01.2007

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow