Left arrow Go Back

“IN-NEGOZJI GĦANDHOM IKUNU TA’ SERVIZZ” – DISKORS TAS-SEGRETARJU PARLAMENTARI EDWIN VASSALLO FIT-TMIEM TAL-KONFERENZA “CUSTOMER SERVICE – A STRATEGIC IMPERATIVE” – SAN ĠILJAN – IL-ĠIMGĦA, 26 TA’ JANNAR 2007

PR0107
Date Icon 26/01/2007

Nixtieq li f’din il-laqgħa nħares lejn ir-relazzjoni ta’ bejn min qiegħed joffri servizz jew prodott u l-konsumatur, mil-lat soċjali.  Il-konsumatur, fil-kuntest tal-kummerċ, nippreferi nħares lejh bħala l-kontributur ewlieni li kapaċi jiddeċiedi l-attività kummerċjali kemm tikber jew tiċkien.  Nippreferi li nħares lejn il-konsumatur bħala persuna li għandha l-ħtiġijiet tagħha u li qed tfittex li tinqeda minn persuna oħra li hija sid ta’ negozju jew service provider.   

Fis-soċjetà tal-lum, jien nemmen li ma nistgħux inħarsu lejn il-kummerċ purament mill-element ta’ kemm hu kbir skond biss kemm hi kbira n-nefqa fl-attività kummerċjali.  Fil-fehma tiegħi, il-kummerċ f’pajjiżna huwa effiċjenti u effettiv daqs kemm kapaċi nagħtu valur lir-relazzjoni li tgħaddi bejn min qiegħed joffri s-servizz jew il-prodott u min qiegħed jirċevih. 

Jekk f’pajjiżna, bl-attività kummerċjali li qiegħda tikber, in-nefqa tal-konsumatur li qed tiżdied b’mod ġenerali, kif ukoll in-numru ta’ dawk involuti fl-għoti jew bejgħ ta’ servizzi u sidien ta’ negozji fil-bejgħ ta’ prodotti qiegħed kontinwament jiżdied, mhux ser niżviluppaw strateġija li kapaċi toffri valur uman lill-attività kummerċjali, u naraw li l-attività kummerċjali ma tibqax issir impersonali, iżda nerġgħu mmorru lura lejn il-prinċipji fundamentali tal-kummerċ li min qiegħed fin-negozju u l-għoti tas-servizzi għandu jkun ta’ servizz għall-konsumatur, pajjiżna, minflok ikun qiegħed jagħmel żvilupp, ikun, fil-fehma tiegħi, idgħajjef il-valur tal-kummerċ li finanzjarjament ikun jista’ qiegħed jiżviluppa. 

Dan qiegħed insostnih għaliex jiena nemmen li negozju li jagħraf ikun onest mal-klijenti tiegħu huwa negozju li jkun qiegħed jgħix is-suċċess imprenditorjali tiegħu.  L-ebda negozju ma jista’ jikber u jirbaħ il-kompetizzjoni tas-suq jekk ma jagħrafx ikun ta’ servizz u ma jkunx onest mal-klijenti tiegħu.  L-onestà mal-klijenti fis-suq tissarraf fl-għoti ta’ prodott u servizz ta’ kwalità lill-istess konsumaturi.  Prodott ta’ kwalità jfisser ukoll li waqt l-użu ta’ dak il-prodott il-klijent ma jkollox riskju li jista’ jweġġa’ jew jagħmel ħsara lil persuni oħra.  Fil-fatt, f’pajjiżna, il-burokrazija li żdiedet minħabba l-introduzzjoni ta’ regolamenti ġodda, fil-kwantità l-kbira ta’ dawn ir-regolamenti, l-iskop tagħhom kien il-protezzjoni tal-konsumaturi jew tal-ħaddiema fil-proċess tal-manifattura. 

F’dan il-kuntest, il-kwantità ta’ regolamenti li żdiedu dan l-aħħar għal dan l-iskop, ġew introdotti mill-Unjoni Ewropea sabiex ikollna aktar negozji u servizzi li jirrispettaw il-valura tal-kwalità.  Iżjed ma jkollna negozji li jirrispettaw il-valur tal-kwalità, iżjed ikollna konsumaturi li jirrispettaw l-attività kummerċjali.  Kull min iħallas għal servizz jew prodott bi dritt jistenna li jingħata lura l-valur ta’ dak li jkun ħallas għalih.  Dan ifisser li, speċjalment fil-qasam ta’ servizz, ma jistax jibqa’ jkollna negozji li ma jinteressahomx milli jagħtu servizz ta’ kwalità u nibqgħu naħsbu li kollox huwa aċċettabbli.  Biex tagħmel biċċa xogħol tajba u ta’ kwalità ma hemmx bżonn ta’ aktar spejjeż fi flus, iżda ftit aktar attenzjoni lejn ix-xogħol li jkun qed isir.  Biċċa xogħol li ma tkunx saret ta’ kwalità fil-fatt tkun tfisser telf ta’ flus għal min jagħmilha.  Negozju li jrid jikber u jnaqqas mill-ispejjeż irid ikun negozju li jimpurtah milli jagħmel xogħol ta’ kwalità.  Il-kwalità ma tiswiex aktar flus, hija biċċa xogħol li ssir bl-adoċċ li tispisċċa tiswa iżjed flus.  Għalhekk il-valur tal-kwalità huwa valur li kapaċi jagħmel negozju jingħaraf minn ieħor, hija l-attenzjoni għall-kwalità li trebbaħ negozju r-rispett tal-klijenti tiegħu.  Fuq kollox klijent mhux qiegħed biex ikun sfruttat, iżda biex ikun moqdi. 

Negozju li jimpurtah milli jagħmel xogħol ta’ kwalità huwa negozju li jkun onest mal-klijenti tiegħu.  

Fl-ideal tagħha, l-attività kummerċjali għandha tkun ta’ servizz lejn il-bniedem.  Dan għandu jkun ideal li jiswa ta’ ġid għall-istess imprenditur li jagħraf u jara li jirrispetta dan il-valur waqt li jkun qiegħed iwettaq l-attività kummerċjali tiegħu.  Min jagħraf din ir-rejaltà tas-suq u jirrispetta dan l-ideal, ikun qiegħed jgħolli l-valur ta’ l-attività kummerċjali tiegħu stess u dan jagħmel differenza għall-konsumatur li jkun qiegħed jinqeda mill-istess negozju. 

Fih innifsu dan il-ħsieb dwar l-ideal li jeħtieġ li jsostni l-attività kummerċjali għandu jgħin biex l-attività kummerċjali tkun ta’ għajnuna għall-bniedem u għall-iżvilupp tal-kwalità tal-ħajja li ngħixu.  

Min qiegħed fl-attività kummerċjali, meta jagħraf l-ideal li jagħti servizz lil min ikun qiegħed jaqdi, għandu jintebaħ li huwa qiegħed fuq kollox jgħin lil min jiġi moqdi mill-istess attività kummerċjali.  F’dan l-argument, min irid jagħti valur lill-attività kummerċjali għandu jkun ta’ servizz u l-ewwel u qabel kollox irid jagħraf u jemmen fil-valur ta’ servizz u solidarjetà soċjali li tgħaqqad flimkien setturi differenti ta’ persuni bi ħtiġijiet differenti iżda b’għan wieħed li jagħmlu minn din id-dinja post aħjar fejn il-bniedem jgħix. 

L-attività kummerċjali m’għandiex titqies bħala mekkaniżmu li permezz tiegħu sid in-negozju għandu jagħmel il-profitt u l-qliegħ biss.  Meta l-kummerċ jitqies minn min qiegħed jagħmlu bħala mod ta’ kif jagħmel il-flus biss, dan ikun qed ifaqqar lill-istess kummerċ mill-valur tas-servizz u jwassal biex il-konsumatur li jkun qiegħed jixtri s-servizz jew il-prodott ikun stmat biss bħala l-persuna li qed tħallas.  Meta jsir hekk, il-kummerċ jispiċċa biss magna li tagħmel il-flus bla ebda ħsieb u attenzjoni għal min ikun qiegħed jinqeda.  Anzi il-kelma “jinqeda” f’dawn il-każijiet lanqas biss tkun użata.  Kemm huwa fqir dak in-negozju li m’għandu l-ebda stima lejn il-persuna, li tkun qed tinqeda mill-istess negozju.  Filwaqt li meta naraw li jkollna stima lejn il-persuna li tkun qed tinqeda, dak is-sid ikun qed juri li għandu stima lejn il-persuna umana, u hekk il-klijent ikollu stima tajba ta’ dak is-sid. 

In-negozju ta’ l-imprenditur li għandu viżjoni għan-negozju tiegħu u li jimpurtah mill-ġid li jrid jagħmel lis-soċjetà, għandu valur akbar mill-valur tal-profitt.  Din il-viżjoni ta’ valur ta’ servizz fl-attività kummerċjali għandha tkun f’kull min qiegħed fin-negozju, hu x’inhu n-negozju, kif ukoll, il-valur ta’ servizz bl-istess importanza għandu jkun il-valur għal min qiegħed jagħti servizz.  Dan għaliex permezz ta’ l-attività kummerċjali is-soċjetà trid tkompli ttejjeb il-kwalità tal-ħajja tagħha.  Kull attività kummerċjali ġusta li fiha valur soċjali hija fiha nnifisha attivita’ kummerċjali li tagħmel ġid f’kull sens, u s-suċċess tagħha ma jkunx biss marbut ma kemm dik l-attività kummerċjali qed tagħmel qliegħ. 

In-Negozju ghandu jagħti każ tal-ħtiġijiet tal-konsumatur. Ma jistax ikun li jkollna min qiegħed fil-kummerċ moħħu biss biex jagħmel il-flus mingħajr ma jagħti każ ta’ x’ikun l-effett ta’ dak il-kummerċ fuq min qiegħed jinqeda. Jekk jagħmel hekk negozju jkun jimpurtah mill-ġid komuni. 

Qiegħed naqsam magħkom dawn il-ħsibijiet bħala Segretarju Parlamentari b’responsabbilità diretta biex inħares lejn x’qed jiġri fis-suq.  Inħossni fid-dmir li niġbed l-attenzjoni dwar dan l-aspett soċjali tas-suq għaliex filwaqt li qed nara li mill-element fiskali jidher li l-attività kummerċjali f’pajjiżna qiegħda tħares b’ottimiżmu lejn il-ġejjieni, qiegħed niltaqa’ ma’ esperjenzi fejn ċertu sidien ta’ negozji jew persuni li huma responsabbli minn għoti ta’ servizzi, donnu qegħdin jinsew li l-ewwel dmir li għandhom huwa li jkunu ta’ servizz. 

Għalhekk, qed naqsam dan il-ħsieb magħkom għaliex nemmen li wasal il-waqt sabiex l-imprenditur f’pajjiżna jaħseb aktar kif jista’ jifhem aħjar il-valur tal-ħidma tiegħu, li permezz tal-kummerċ li jagħmel, jgħin biex is-soċjetà umana tkompli tkun mgħejjuna tgħix kwalità ta’ ħajja aħjar, filwaqt li tkompli tiżviluppa l-opportunitajiet tal-ħajja.  Hekk, l-imprenditur irid jagħraf l-istat professjonali tiegħu.  Bl-istess mod, sid in-negozju jrid jagħraf ikun bniedem li jimpurtah mill-ġid komuni u l-ġid personali tal-persuna l-oħra li tkun qiegħda tinqeda min-negozju tiegħu.  Sid in-negozju jkun tassew xieraq li jissejjaħ “imprenditur” jekk ikun kapaċi jagħraf jaqra s-sinjali taż-żminijiet li jkun jgħix fihom u jirrispondi għall-ħtiġijiet li jkun mitlub jaqdi. 

Negozju jew servizz li jisfrutta l-klijent huwa negozju bla valur. 

Jista’ jkun li maż-żmien negozjant jagħmel il-flus mingħajr ma jkun jimpurtaħ mill-ħtiġijiet ta’ dawk ta’ madwaru.  Jekk ikun hekk, dawn il-flus ikunu saru minn attività kummerċjali li hija fqira mill-valur uman.  Huwa minnu li qed ngħixu fi żmien li fih l-egoiżmu u l-individwaliżmu saru atteġjamenti meħtieġa għas-suċċess kummerċjali, iżda bħala pajjiż u ekonomija li qed tikber u li trid tkompli tisfida metodi ġodda ta’ kif tagħmel il-kummerċ, ma jistax ikun li jibqa’ jkollna min jaħseb li jista’ jibqa’ jagħmel il-flus bl-isfruttament tal-persuna umana li tkun qed tħallas għas-servizz li tkun qed tixtri. 

F’pajjiżna ma jistax ikun li naħsbu biss li s-suċċess imprenditorjali tagħna jitkejjel biss fi flus, jew kemm qed jikber il-GDP (prodott gross domestiku).  Dan kollu huwa meħtieġ, u ma nista’ bl-ebda mod innaqqas il-valur tiegħu.  Qiegħed naqsam dawn il-ħsibijiet tiegħi fuq l-element soċjali tal-kummerċ għaliex irrid nistqarr magħkom li dan il-Gvern fil-fatt, bil-ħidma tiegħu, mhux biss qiegħed jara li l-iżvilupp kummerċjali jsir mil-lat finanzjarju tiegħu, iżda l-Gvern jimpurtah ukoll li jara li s-soċjetà tagħna ma tiftaqarx soċjalment waqt li tistgħana finanzjarjament. 

Għalhekk, l-impenn tal-Gvern hu li nkomplu nibnu soċjetà b’sistema ekonomika li hija mibnija fuq il-valur tas-solidarjetà fil-kummerċ u mhux fuq l-egoiżmu u l-individwaliżmu.  Jekk irridu numaniżżaw u nirresponsabilizzaw  l-ekonomija tagħna fuq livell nazzjonali, irridu naraw li jkollna negozji li huma konxji tal-ħtieġa li jkun jimpurtahom mill-kwalità tas-servizz u tal-prodott li jbiegħu lill-kljenti tagħhom.  Bl-istess mod, irridu nibnu kultura imprenditorjali fl-entitajiet li għandhom dmir li jagħtu servizz lill-klijenti tagħhom u li jkollhom stima għolja għall-valur ta’ servizz.  Fill-ġejjieni qarib, l-attenzjoni tal-Gvern permezz ta’ ħidma kkordinata ma’ diversi entitajiet ser tkun qed tagħti prova għall dan l-impenn, li permezz tiegħu l-Gvern irid juri li huwa jemmen u kapaċi li filwaqt li jara li pajjiżna jiżviluppa l-opportunitajiet tiegħu mill-element fiskali, daqshekk ieħor irid jara li l-ekonomija tagħna ma tkunx biss market economy iżda tkun a social economy, fejn tħares il-valur tal-bniedem ukoll fis-suq. 

Għalhekk nemmen bis-sħiħ li l-valur ta’ l-onestà u s-solidarjetà fil-kummerċ ma humiex valuri ta’ min huwa dgħajjef, iżda ta’ min huwa b’saħħtu, u fuq kollox ta’ min huwa b’saħħtu biżżejjed li jgħin lil ħafna oħrajn ikunu wkoll b’saħħithom f’soċjetà b’saħħitha moralment, u għalhekk soċjalment u ekonomikament b’saħħitha wkoll. 

DOI  26.01.2007

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow