BUSINESS BREAKFAST DWAR L-ISPORT
“Fil-pajjiż qed jinħolqu l-klima u l-kondizzjonijiet biex il-finanzjament min-naħa tal-Gvern għall-isport ikompli jissaħħaħ b’forom ġodda ta’ miżuri fiskali li jinċentivaw lis-settur privat u lin-negozju biex jappoġġjaw l-isport bi ftehim ta’ sponsorship.” Dan sostnieh il-Ministru responsabbli għall-isport, l-Onor. Louis Galea meta tkellem fil-Business Breakfast organizzat mill-Kumitat Olimpiku Malti (KOM) bl-appogg ta’ The Malta Business Weekly, Le Meridien Phoenicia u l-BOV.
F’dan l-attivita’, li saret fil-Le Meridien Phoenicia, il-kelliema ewlenin kienu s-sur Pippo Psaila, Direttur ta’ l-Sport tal-KOM, u s-sur Peter Bolech, ic-CEO ta’ l-Malta Iintenational Airport li għandhom politika li jappoġġjaw l-isport Malti. It-tema magħżula għal din l-attivita’, li kellu attendenza tajba ħafna, kienet “Building brands through sport – how can your business benefit?” Attendew ukoll għal din l-attivita’ il-President tal-Kunsill Malti għall-isport, is-sur Franco Azzopardi, kif ukoll il-Kelliem ta’ l-Oppożizzjoni għall-isport, l-Onor. Carmelo Abela, li kien wieħed fost dawk li tkellmu waqt din l-attivita’.
Is-sur Pippo Psaila u s-sur Peter Bolech għamlu każ qawwi dwar il-vantaġġi u l-benefiċċji li jiksbu l-kumpaniji u n-negozju kummerċjali meta jidħlu fi ftehim ta’ sponsorship ta’ dixxiplini u attivitajiet sportivi. Huma tkellmu wkoll dwar kif il-Gvern jista` jinkoraġġixxi lin-negozju permezz ta’ skemi ta’ inċentivi fiskali. Irriżulta li terz tal-poplu Malti hu b’xi mod jew ieħor assoċjat ma’ xi forma ta’ attivita` sportiva. Pippo Psaila qal li kulħadd issa għandu jaħdem biex inwettqu l-ħolma li Malta tirbaħ l-ewwel midalja fl-Olimpijadi li ser isiru fiċ-Ċina s-sena d-dieħla.
Mitlub jikkumenta fuq il-preżentazzjonijiet li saru waqt dan il-Business Breakfast, il-Ministru Louis Galea emfasizza l-benefiċċji li jiksbu l-kumpaniji u n-negozju kummerċjali meta jippromwovu l-image, s-servizzi u l-prodotti tagħhom permezz ta’ assoċjazzjoni mal-valuri, l-kwalita`, u l-eċċellenza ta’ sportivi Maltin u Għawdxin u ma’ l-isport in ġenerali. Promozzjoni permezz ta’ l-isport għandha valur miżjud u pubbliċita` ma’ eluf kbar ta’ Maltin. “Illum huwa mportanti li nżidu t-tħaddim tal-kunċett ta’ Responsabilita` Soċjali Korporattiva,” sostna l-Ministru Galea.
Il-Ministru qal li hu jaqbel bis-sħiħ ma’ l-appell tas-sur Pippo Psaila li l-isponsorship ta’ l-isport fil-bażi komunitarja tiegħu, kif ukoll fuq il-livell ta’ ‘sport elite’, hu ta’ vantaġġ għall-promozzjoni ta’ negozju partikolari u jirrinforza l-messaġġ li dak in-negozju jrid jagħti dwar l-image, is-servizz jew il-prodott tiegħu.
Il-Ministru Galea fakkar li fl-aħħar snin il-Gvern wettaq investiment rekord fil-qasam sportiv, ħaġa li ġiet rikonoxxuta wkoll waqt il-Business Breakfast bħala li kienet ta’ kontribut posittiv fit-titjib tar-riżultati f’kompetizzjonijiet internazzjonali. Il-Gvern ħaseb biex ipoġġi l-politika tiegħu fuq bażi b’saħħitha permezz tal-Liġi dwar l-isport u t-twaqqif tal-Kunsill Malti għall-isport. Investa u bena l-aqwa kumplessi sportivi li għandu l-pajjiż u qed jagħti għajnuna diretta u ndiretta ta’ eluf kbar ta’ liri lill-għaqdiet u assoċjazzjonijiet sportivi.
“Issa l-Kunsill Malti għall-Isport qed janalizza l-benefiċċji ekonomiċi li jġib l-isport għal Malta u Għawdex u beda diskussjonijiet mal-Gvern biex titfassal politika ta’ inċentivi fiskali għas-settur privat li jikkontribwixxi għall-isport,” ħabbar il-Ministru Galea.
Bħalissa l-isportivi Maltin, permezz ta’ l-assoċjazzjonijiet u l-federazzjonijiet tagħhom taħt il-gwida tal-KOM, qed iħejju ruħhom għal sensiela ta’ avvenimenti sportivi internazzjonali, fosthom: il-Logħob ta’ l-Istati Żgħar ta’ l-Ewropa f’Monaco (2007), l-Olimpjadi f’Bejing (2008), il-Logħob tal-Mediterran (2009), u l-Logħob tal-Commonwealth f’Delhi (2010).
F’Malta din is-sena hu mistenni li jiġu organizzati l-European Junior Waterpolo Championship, l-European Athletics Meeting & Conference, u l-European Cadets Judo Championship.
DOI – 25.01.2007
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958