Left arrow Mur Lura

L-ewwel laqgħa tal-Ministri ta’ l-Agrikoltura ta’ l-Unjoni Ewropea miż-żona tal-Mediterran

PR0085
Date Icon 24/01/2007

Malta ipparteċipat fl-ewwel laqgħa tal-Ministri ta’ l-Agrikoltura ta’ l-Unjoni Ewropea miż-żona tal-Mediterran.  Għal din il-laqgħa li saret f’Nikosija, Ċipru, Malta kienet rappreżentata mill-Ministru għall-Affarijiet Rurali u l-Ambjent, l-Onor. George Pullicino.  Minbarra Malta għal-laqgħa attendew ukoll Ċipru, l-Portugall, Spanja, Franza, l-Italja, s-Slovenja u l-Greċja. 

Din kienet l-ewwel laqgħa tax-xorta tagħha u l-Ministru Pullicino fakkar fl-isforzi ta’ Malta biex jitwaqqaf dan il-forum ta’ pajjiżi li ġejjin minn reġjun komuni.  Hu esprima s-sodisfazzjon ta’ Malta li din il-laqgħa se tibda ssir fuq bażi regolari u li għandha sservi biex matulha ssir diskussjoni aktar iffukata fuq ċerti materji qabel ma dawn jittellgħu quddiem il-Kunsill tal-Ministri ta’ l-Agrikoltura ta’ l-Unjoni Ewropea. 

Fuq l-aġenda ta’ l-ewwel laqgħa kien hemm temi ta’ importanza għall-pajjiżi Mediterranji, fosthom ir-riformi proposti mill-Kummissjoni Ewropea fis-settur tal-ħaxix u frott frisk, u fis-settur ta’ l-inbid.  Matul il-laqgħa saret ukoll diskussjoni dwar l-iżviluppi fir-relazzjonijiet Ewro-Mediterranji u n-negozjati ta’ l-Unjoni Ewropea mal-Organizzazzjoni Dinjija tal-Kummerċ (WTO). 

Fir-rigward tar-riforma fis-settur tal-frott u l-ħaxix, il-Ministru Pullicino fakkar kif din għadha fi stadju ta’ proposta.  Pullicino tenna li l-proposta tal-Kummissjoni fiha żviluppi pożittivi li huma pass ‘il quddiem fuq ir-regolamenti li jeżistu llum.   

Fir-rigward tar-riforma fis-settur ta’ l-inbid, il-Ministru Pullicino qal li Malta ma taqbilx mal-proposta tal-Kummissjoni biex art li ppreżentament hija ndikata għad-dwieli tingħata għat-tkabbir ta’ prodotti oħrajn.  Il-Ministru Pullicino qal li minbarra valur agrikolu, d-dwieli f’Malta għandhom ukoll valur ambjentali u fl-aħħar snin saru sforzi kbar biex jiżdiedu d-dwieli f’Malta. 

Pullicino żied jgħid li għandu jkun salvagwardat l-oriġini ta’ l-għeneb u dan biex ikun żgurat li ma jsirx taħlit bejn inbejjed minn għeneb Ewropej u għeneb minn pajjiżi terzi.  Fil-kuntest ta’ l-iżviluppi fil-proċess Ewro-Mediterranju, l-Ministru Pullicino qal li għandu jkun żgurat li prodotti agrikoli li joriġinaw minn pajjiżi mhux fl-Unjoni Ewropea jgħaddu mill-istess kontrolli u obbligi li huma fis-seħħ għall-prodotti Ewropej.   

Hu fakkar li Malta hija mpenjata favur il-proċess Ewro-Mediterranju pero’ għandu jsir kull sforz biex il-bdiewa u r-raħħala Maltin ma jkunux żvantaġġjati.  Fil-kuntest tan-negozjati mal-Organizzazzjoni Dinjija tal-Kummerċ, Pullicino fakkar kif Malta approvat il-linja adottata mill-Kummissjoni Ewropea. 

Fi tmiem il-laqgħa kien hemm qbil bejn il-pajjiżi biex il-konklużjonijiet miftiehma waqt il-laqgħa jintbagħtu lill-Kummissjoni Ewropea.

DOI – 24.01.2007

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow