Left arrow Mur Lura

INKOMPU NSAĦĦU U NĠIBU ’L QUDDIEM IL-LINGWA MALTIJA

PR0066
Date Icon 20/01/2007

“Illum huwa jum importanti għall-ilsien Malti għax kull min jistudjah jew jużah fix-xogħol tiegħu qed ikun mitlub jipparteċipa u jagħti fehemtu f’seminar fuq il-kitba Maltija.” Hekk qal il-Ministru Louis Galea huwa u jiftaħ seminar ta’ ħames sigħat f’lukanda ewlenija Tas-Sliema, organizzat mill-Kunsill Nazzjonali ta’ l-Ilsien Malti.

Is-seminar kien fuq il-varjanti, jiġifieri kliem li s’issa għadna nistgħu niktbuh b’żewġ modi, bħal fil-għodu (bis-sing) u filgħodu (kelma waħda), m’hux (bl-appostrofu) u mhux (kelma waħda). Il-varjanti jistgħu jfixklu l-istudenti li jaraw l-istess kelma spelluta differenti fil-kotba. Ifixklu wkoll, u mhux ftit, lit-tradutturi u l-ġurnalisti li jaħdmu fi gruppi kbar għax mhux dejjem jaqblu kif għandhom jiktbu l-istess kelma. Dan jgħodd iktar issa li l-Malti dieħel dejjem iktar fid-dinja ta’ l-informatika u jintuża fil-kompjuter.

Fi kliem il-Ministru Louis Galea, il-Gvern kien ilu jixtieq li, f’qasam importanti għall-identità nazzjonali bħalma hu l-ilsien Malti, kull min jista’ jagħti sehmu jagħtih u jiġbed ħabel wieħed. Il-Ministru nnota b’sodisfazzjon il-ħidma tal-Kunsill biex iġib flimkien lil min jaħdem għal ilsienna u l-kontribut ta’ tletin ruħ – lingwisti, tradutturi, kittieba u għalliema – li laqgħu l-istedina tal-Kunsill biex juru fehmithom fuq il-kitba Maltija. Din il-kollaborazzjoni bejn “il-ħaddiema tal-Malti” hija prova oħra ta’ kemm kien għaqli l-Gvern meta waqqaf il-Kunsill tal-Malti.

Il-Kunsill huwa organizzazzjoni governattiva u twaqqaf bil-Liġi tal-Lingwa, bi qbil unanimu fil-Parlament Malti, bil-missjoni li jġib il-Malti ’l quddiem u jsaħħu fl-oqsma kollha tal-ħajja.

Il-Prof. Manwel Mifsud, president tal-Kunsill Nazzjonali ta’ l-Ilsien Malti, qal li l-varjanti m’humiex fenomenu ta’ lsienna biss, insibuhom fil-lingwi kollha, imma peress li l-kitba Maltija għadha żagħżugħa meta nqabbluha ma’ tal-lingwi l-kbar, l-għadd ta’ varjanti fil-Malti għadu kotran.

Biex jiddeċiedi fuqhom bil-galbu, il-Kunsill tal-Malti għamel ġabra kbira ta’ varjanti u talab għadd ta’ operaturi tal-Malti (lingwisti, tradutturi, qarrejja tal-provi, eċċ.) jikkummentaw fuqhom. Barra minn hekk, illum organizza dan is-seminar biex jagħti opportunità lil kulħadd isemma’ leħnu u jesprimi l-preferenzi tiegħu.

Għal din il-laqgħa kien hemm 140 ruħ, fosthom lingwisti, kittieba, tradutturi u għalliema, kif ukoll tradutturi minn Frankfurt, il-Lussemburgu u Brussell u numru ta’ nies li qed iħaddmu l-Malti f’oqsma li mhumiex marbutin mal-lingwa bħal periti u spiżjara. Matul is-seminar tqassam ktieb ta’ 200 paġna, “Innaqqsu l-Inċertezzi: Il-Varjanti Ortografiċi” li jiġbor il-fehmiet ta’ tletin ruħ li huma magħrufin fil-qasam tal-Malti jew li kitbu kemm-il darba fuq is-suġġett.

Issa jmiss li l-Kunsill jaħtar grupp żgħir ta’ lingwisti esperti kkwalifikati biex jistħarrġu l-fehmiet kollha u jiddeċiedu liema varjanti se jkunu aċċettati u liema se jinqatgħu. Id-deċiżjonijiet se jixxandru fil-Gazzetta tal-Gvern u se jkunu uffiċjali u jorbtu lil kulħadd. Barra minn hekk, il-Kunsill se jwassalhom lill-għalliema, it-tradutturi, l-istudenti, l-eżaminaturi u l-kittieba permezz ta’ pubblikazzjoni uffiċjali u sensiela ta’ laqgħat.

DOI – 20.01.2007

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow