PITTURA ASTRATTA MALTIJA MILL-MUŻEW NAZZJONALI TA’ L-ARTI GĦALL-WIRI FIL-MINISTERU GĦAL GĦAWDEX
Wirja ta’ pittura astratta minn artisti Maltin magħmula bejn l-1980 u l-2005 u li jinsabu fil-kollezzjoni nazzjonali qiegħda għall-wiri fis-Sala tal-Wirjiet tal-Ministeru għal Għawdex. Il-wirja, li qed tigi organizzata minn Heritage Malta flimkien mal-Ministeru għal Għawdex ġiet inawgurata mill-Onor Giovanna Debono u ser tibqa’ miftuħa sal-31 ta’ Jannar 2007. Waqt il-ftuħ tal-wirja sar diskors mis-Sur Dennis Vella, Kuratur ta’ l-Arti Moderna u Kontemporanja fil-Mużew Nazzjonali ta’ l-Arti. Iċ-Chief Executive Officer ta’ Heritage Malta, Dr Luciano Mule’ Stagno għamel ukoll diskors ta’ introduzzjoni.
L-artisti li x-xogħol tagħhom qiegħed jintwera f’din il-wirja huma; Norbert Attard (t. 1951), Vince Briffa (t. 1952), Austin Camilleri (t. 1972), Pawl Carbonaro (t. 1948), Joseph Paul Cassar (t. 1958), Alfred Chircop (t. 1933), Marco Cremona (t. 1951), Luciano Micallef (t. 1954), Anton Grech (t. 1965), John Grima (t. 1967), Carmen Pizzuto (t. 1957), Joseph Saliba Saliba (t. 1954) u Anthony Spagnol (t. 1960).
L-astratt fl-arti Maltija deher għall-ewwel darba madwar l-1955, ħamsin sena wara l-bqija ta’ l-Ewropa, u għall-bidu ma kienx ikkunsidrat tajjeb ħafna. Madanakollu, minħabba l-livelli għoljin milħuqa minn Emvin Cremona u Alfred Chircop, dan l-istil issa huwa aċċettat u huwa rappreżentat fl-akbar kollezzjonijiet pubbliċi u privati f’Malta.
Il-karatteristiċi ewlenin ta’ din il-kollezzjoni huma l-ispirazzjonijiet diretti min-natura bħal fix-xogħlijiet ta’ Chircop, Spagnol, Camilleri u Grima flimkien ma’ improvizazzjonijiet ta’ moviment bħal fil-pittura ta’ Carbonaro u Micallef, flimkien ma’ xeħtiet oħrajn.
L-artisti kollha li x-xogħlijiet tagħhom qegħdin jintwerew f’din il-wirja, ilkoll kemm huma taw xhieda wiesgħa ta’ l-impenn tagħhom lejn dan it-tip ta’ arti matul il-karriera tagħhom, u esibew x-xogħlijiet tagħhom ħafna drabi, kemm f’Malta kif ukoll barra.
Il-wirja hija miftuħa kuljum bejn id-9.00am u l-4.30pm kif ukoll is-Sibt u l-Ħadd mid-9.00am sa nofsinhar.
DOI 12.01.2007
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958