Left arrow Mur Lura

Master Plan ta’ l-Għadds għal Għawdex u Kemmuna jiġi ppreżentat għall-konsultazzjoni

PR0011
Date Icon 05/01/2007

Il-Master Plan għall-industrija ta’ l-għadds li jkopri lil Għawdex u Kemmuna, u li jifforma parti mill-proġett ko-finanzjat mill-Unjoni Ewropea għal dan is-settur, ġie ppreżentat lill-partijiet konċernati ta’ l-industrija turistika t’Għawdex waqt preżentazzjoni li saret dalgħodu fil-Ministeru għal Għawdex. 

Waqt li kienet qed titkellem fl-istess laqgħa, l-Onor. Giovanna Debono, Ministru għal Għawdex qalet li t-tfassil ta’ dan il-Pjan sar fi sforz li tingħata attenzjoni olistika lill-qasam ta’ l-għadds bħala settur b’potenzjal ta’ tkabbir għall-benefiċċju ta’ l-industrija turistika t’Għawdex. Il-Gvern identifika l-industrija turistika ta’ l-għadds bħala qasam li jista’ jagħti vantaġġ kompetittiv lil Għawdex u għalhekk huwa kommess li jkompli jtejjeb il-prodott li l-gżira toffri. Il-proġett Niche Tourism For the Island of Gozo, li minnu jifforma parti dan il-Pjan, jinvolvi l-investiment ta’ madwar €1.3 miljun u kien jikkonsisti f’elementi oħra fosthom l-għarqa taż-żewġ vapuri MV Karwela u MV Cominoland li seħħet f’Awissu, it-twaqqif ta’ decompression chamber ix-xahar li għadda, u kampanja ta’ reklamar permezz ta’ rivisti speċjalizzati internazzjonali, it-tnedija ta’ website apposta u l-ħruġ ta’ DVD.  

Il-Ministru Debono qalet li l-Pjan, li ġie mfassal b’konsultazzjoni ma’ l-iskejjel kollha ta’ l-għadds f’Għawdex, mhux biss jagħmel analiżi tal-prodott li joffru l-gżejjer ta’ Għawdex u Kemmuna imma wkoll jipprovdi bażi għal żviluppi futuri kif ukoll jidentifika miżuri li jistgħu jiġu mplimentati sabiex is-siti ta’ l-għadds madwar il-gżejjer jitjiebu u joffru prodott dejjem iktar ta’ kwalita’.  

Il-Ministru Debono ħabbret li issa li tfassal dan il-Pjan, il-Ministeru għal Għawdex ser iwaqqaf Task Force biex tħares lejn il-miżuri proposti u tfassal Pjan ta’ Azzjoni sabiex timplimenta l-miri stabiliti.  

Il-Pjan ta’ l-Għadds għal Għawdex u Kemmuna huwa magħmul minn evalwazzjoni dettaljata tal-prodott turistiku li qed jiġi offrut bħalissa filwaqt li jidentifika modi ta’ titjib kemm fuq l-art kif ukoll fil-baħar, inkluż permezz ta’ rapporti dettaljati għal kull sit ta’ l-għadds. Il-Pjan iħares ukoll lejn il-fatturi taħt l-ilma kif ukoll il-faċilitajiet ta’ aċċess minn u lejn l-ilma kif ukoll faċilitajiet u servizzi oħra fuq l-art li jtejbu l-esperjenza ta’ l-għadds. 

L-analiżi saret permezz ta’ riċerka differenti nkluż stħarriġ online, laqgħat individwali ma’ l-għaddasa kif ukoll laqgħat ma’ l-iskejjel kollha ta’ l-għadds li joperaw minn Għawdex u minn Kemmuna u laqgħat oħra ma’ wħud mill-iskejjel li joperaw minn Malta. 

Ir-rakkomandazzjonijiet jinkludu it-titjib tas-siti ta’ l-għadds fuq ix-xtajta permezz ta’ l-introduzzjoni ta’ iktar infrastruttura adegwata, l-organizzazzjoni tal-parkeġġi u l-faċilitajiet fejn l-għaddasa jippreparaw ruħhom għall-għadds, il-provvista ta’ apparat ta’ sigurta’ u t-titjib tal-faċilitajiet biex jonqsu l-inċidenti fuq is-sit, il-provvista ta’ iktar siti ta’ l-għadds artifiċjali f’żoni partikolari, il-provvista ta’ bagi siguri fejn jitrakkaw id-dgħajjes waqt għadds ’il barra mix-xtajta, it-teħid ta’ miżuri biex jiżdiedu l-ħut fis-siti ta’ l-għadds, u l-organizzazzjoni tal-ġbir ta’ iktar informazzjoni dwar l-għadds sabiex il-prodott turistiku jkun jista’ jiġi evalwat kontinwament u mtejjeb. 

Wara l-introduzzjoni ta’ l-Onor. Giovanna Debono, is-Sur Adrian Mallia, li wettaq ir-riċerka u li ħejja l-Master Plan għall-kumpanija Adi Associates Environmental Consultants Ltd, ta preżentazzjoni dwar ir-riżultati ta’ l-istudji u r-rakkomandazzjonijiet. Il-partijiet konċernati ta’ l-industrija turistika li kienu preżenti għal-laqgħa ta’ dalgħodu kellhom l-opportunita’ li jagħtu l-kummenti tagħhom. 

Il-Pjan ta’ l-Għadds għal Għawdex u Kemmuna jifforma parti mill-proġett Niche Tourism for the Island of Gozo li twettaq permezz tal-Fondi Strutturali għal Malta 2004-2006, speċifikament permezz tal-Fond ta’ Żvilupp Reġjonali Ewropew. Is-sehem tal-Gvern Malti kien ta’ 25% tal-valur tal-proġett.



.../pr0011A

DOI – 05.01.2007

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow