TITĦABBAR SEJĦA GĦALL-PROPOSTI GĦAL ĊENTRU ĠDID TAL-KONVENZJONIJIET U ESIBIZZJONIJIET TA’ MALTA
Il-Gvern dal-għodu ħabbar il-ħruġ ta’ sejħa għall-proposti għall-iżvilupp ta’ Ċentru ġdid tal-Konvenzjonijiet u Esibizzjonijiet ta’ Malta. Id-dettalji kif ukoll l-isfond ta’ din is-sejħa ngħataw dal-għodu waqt konferenza ta’ l-aħbarijiet indirizzata mill-Ministru għall-Iżvilupp Urban u Toroq, l-Onor. Jesmond Mugliett u l-Ministru għall-Affarijiet Rurali u l-Ambjent, l-Onor. George Pullicino.
Is-sejħa għall-proposti għaċ-Ċentru tal-Konvenzjonijiet u Esibizzjonijiet ta’ Malta ħarġet mill-Action Plan ta’ Ta’ Qali li kien ippubblikat mill-MEPA fis-sena 2000 u amendat aktar kmieni din is-sena. L-Action Plan kien, fil-fatt jidentifika sit preċiż biswit l-istadium ta’ Ta’ Qali fejn dan iċ-Ċentru seta’ jiġi żviluppat.
“Ta’ Qali huwa post ċentrali milħuq faċilment mill-maġġoranza tal-popolazzjoni Maltija. Dan huwa punt kruċjali meta jiġi ppjanati attivitajiet kbar li jridu jilħqu ammont kbir ta’ nies minn kull naħa ta’ Malta.
“Is-sit ma jmissx u mhuwiex qiegħed fil-viċinanza immedjata ta’ żoni residenzjali, għaldaqstant ma joħloqx problemi ta’ storbju, parkeġġ jew traffiku lir-residenti fil-viċin. Hemm xi konsiderazzjonijiet li jridu jittieħdu dwar il-possibbiltà ta’ xi traffiku li jista’ jiġi ġġenerat f’Ħ’Attard iżda dawn jistgħu jiġu solvuti permezz ta’ sistema effiċjenti għall-immaniġġjar tat-traffiku u aktar titjib fin-network tat-toroq madwar Ta’ Qali. Il-Pjan ta’ Azzjoni jipprovdi wkoll il-miżuri meħtieġa biex jitnaqqas l-impatt minn fuq Ħ’Attard,” qal il-Ministru Pulliċino.
Il-Pjan t’Azzjoni tal-MEPA kien jitlob li jinbena Ċentru għall-Konvenzjonijiet bl-amenitajiet kollha li ma jistax jinkludi akkomodazzjoni residenzjali temporanja jew permanenti. Il-parti mibnija ma tistax tokkupa aktar minn 32% tas-sit bl-istrutturi fuqha li ma jistgħux ikunu ogħla minn 10 metri mil-livell preżenti ta’ l-art. Il-Pjan jitlob ukoll standard għoli t’arkitettura, li tinbena ring-road ġdida, li jinbena parkeġġ taħt l-art b’diversi livelli u li jsir landscaping estensiv ta’ l-inħawi.
Il-Ministru Mugliett spjega li sabiex jiżgura transparenza u fairness il-Gvern iddeċieda li joħroġ sejħa għall-proposti għall-iżvilupp ta’ Ċentru ta’ Esibizzjonijiet u Konvenzjonijiet. Hu qal li dan iċ-Ċentru ġdid huwa meħtieġ minħabba li ċ-ċens fuq l-art taċ-Ċentru tal-Fieri fin-Naxxar jagħlaq fil-31 ta’ Lulju 2007 u ma hemmx il-possibilità li dan iċ-ċens jiġġedded.
Is-sit propost huwa mifrux fuq medda ta’ 92,921 metru kwadru, b’ 77,980 metru kwadru jistgħu jiġu żviluppati u l-14,141 metru kwadru li jibqgħu jintużaw għall-parkeġġ taħt l-art.
“F’din is-sejħa ppruvajna inkunu flessibbli kemm jista’ jkun ma’ l-iżviluppaturi prospettivi tant li tajna għażla ta’ tliet termini għaċ-ċens fuq l-art: 35 sena, 49 sena jew 65 sena. Is-sejħa torbot ukoll lill-iżviluppatur li jlesti l-iżvilupp minn kollox sa’ 36 xahar minn meta jiġi ffirmat il-kuntratt tal-konċessjoni fuq l-art. Ma’ l-għeluq taċ-ċens l-operatur irid jgħaddi lura s-sit u l-binjiet fuqu lura lill-Gvern,” qal il-Ministru għall-Iżvilupp Urban u Toroq.
Hu semma wkoll li l-iżvilupp ser ikun jeħtieġ il-bini ta’ parkeġġ ġdid b’diversi livell f’sit bħala parkeġġ mill-Malta Football Association (MFA) għall-istadium. Għal dan intlaħaq qbil ma’ l-MFA biex il-konċessjoni li għandha bħal issa fuq dan is-sit tinħall sabiex issir waħda ġdida, b’wieħed mis-sulari tal-parkeġġ il-ġdid imur lura għand l-Assoċazzjoni sa’ sentejn wara li jiġi iffirmat il-kuntratt ma’ l-iżviluppatur magħżul.
Il-Ministru Mugliett spjega wkoll li is-sejħa għall-proposti ser tkun tinkludi wkoll proviżjonijiet biex dan l-iżvilupp ikun jinkludi faċilitajiet għall-għadd tal-voti tal-Kunsilli Lokali, tal-Parlament Ewropew u dik Ġenerali. Saħaq iżda li dawn il-faċilitajiet mhux ser ikunu disponibbli għall-Elezzjonijiet Ġenerali li jmiss u għal dawn qed isiru arranġamenti alternattivi.
Is-sejħa għall-offerti ser tiġi ppubblikata l-ġimgħa d-dieħla bil-perjodu tas-sottomissjonijiet jibqa’ miftuħ għal 10 ġimgħat. L-aġġudikazzjoni ser tieħu 8 ġimgħat biex, f’każ li ma jkunx hemm ħtieġa għal arbitraġġ, tkun tista’ tintefa applikazzjoni għal Outline Development Permit quddiem il-MEPA f’Ġunju 2007. Il-ħruġ ta’ dan il-permess mill-MEPA ser iservi ta’ bażi biex jitlesta l-kuntratt li imbagħad irid jiġi approvat b’riżoluzzjoni Parlamentari f’Novembru/Diċembru 2007. Ma’ l-iffirmar tal-kuntratt tintefa’ Full Development Application quddiem il-MEPA biex l-iżvilupp tas-sit jkun jista’ jibda f’Awissu 2008. Iċ-Ċentru l-ġdid għandu jibda’jitħaddem f’Jannar 2009.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958