MESSAĠĠ TAL-MILIED U L-EWWEL TAS-SENA MILL-PRIM MINISTRU, L-ONOR LAWRENCE GONZI
Għeżież ħuti Maltin u Għawdxin,
Huwa dmir u wkoll pjaċir tiegħi li f’okkażjoni sabiħa bħal din nirringrazzjakom minn qalbi għall-kontribut li tajtu lkoll flimkien biex pajjiżna seta’ jkompli miexi fit-triq tal-progress. Dan ir-ringrazzjament ifisser li lkoll kemm aħna nirrikonoxxu s-sehem li tajna b’modi differenti, skond ħiliet varji, imma dejjem bi skop wieħed. Issa li għaddiet sena oħra, inħarsu lura u nifirħu li d-dmir tagħna għamilnieh għall-ġid ta’ kulħadd.
F’dan l-istaġun niċċelebraw il-ferħ, ir-rieda tajba, it-tolleranza, il-paċi u l-ftehim, il-kwalitajiet li aħna nixtiequ lil kulħadd is-sena kollha, u bħalissa b’mod speċjali. Huwa ż-żmien li napprezzaw aktar lill-familji tagħna, lill-qraba, lill-ħbieb u fuq kollox lil dawk fostna li għandhom l-akbar bżonn ta’ l-għajnuna u tas-solidarjetà tagħna. Dawn il-festi jistidnuna biex nissaħħu aktar fl-għazla tagħna favur il-ġid komuni, ġid li jolqot lill-individwu u lis-socjetà. Ir-rigali li f’dan iż-żmien aħna nagħtu lil xulxin huma eżempju wieħed biss tar-rigal li bir-rieda tajba tagħna, bis-sehem tagħna, aħna nagħtu lil xulxin u lis-socjetà matul is-sena kollha. Fuq din il-kultura ta’ rispett nibnu kull sular ieħor ta’ avvanz f’qasam jew f’ieħor.
Dan ifisser li aktar ma nkabbru u ma nwessgħu l-kompetenzi tagħna aktar nistgħu noħolqu socjetà li fiha kulħadd għandu s-sehem uniku u validu x’jagħti. Socjetà li fiha kulħadd hu stmat u apprezzat. Aħna, forsi aktar minn nazzjonijiet wisq akbar minna, għandna l-opportunità li fiċ-ċokon nistgħu nibnu komunità fejn kulħadd iħoss ruħu tassew mixtieq, meħtieġ u utli. Mid-dinja ta’ l-iskola u tat-tagħlim permanenti sad-dinja ta’ kull tip ta’ xogħol, aħna rridu naraw li kollox huwa mibni fuq il-kollaborazzjoni, fuq il-ħila tagħna li naqsmu bejnietna l-ħiliet differenti li jagħżluna minn xulxin u li fl-istess ħin iressquna lejn xulxin.
Dan kollu, illum wisq aktar minn qatt qabel, iwassalna biex inkomplu nirriflettu fuq x’inhu li jagħmilna tassew Maltin fi ħdan il-komunità Ewropea u dinjija. Bħala membri fl-Unjoni Ewropea nafu li aħna sħab ma’ oħrajn li aħna bħalhom, u huma bħalna, nazzjon. Fuq l-għarfien dejjem aktar matur ta’ x’inhu li jagħmilna nazzjon aħna nistgħu nimxu fit-triq ta’ l-apprezzament ta’ dak kollu li lil Malta tagħna jagħmilha dak li hi. Ilkoll, fl-iskola, fix-xandir, fil-hajja soċjali, fil-politika, fid-divertiment, aħna rrridu nkomplu nsaħħu dawk il-kwalitajiet li jikkaratterizzawna u li jagħtuna dinjità madwar il-mejda tad-diskussjoni internazzjonali, fil-postijiet kollha fejn pajjiżna jidher bħala nazzjon.
Ninsabu fi żminijiet ta’ tibdil kbir u mgħaġġel. Il-futur huwa mimli sfidi ġodda. Aħna u nżommu l-wirt tagħna, aħna nħarsu wkoll lejn l-isfidi ġodda li żmien ġdid, modern, qiegħed jippreżentalna. It-tibdil li qiegħed isir fid-dinja jolqot lilna mill-qrib, kemm biex nitgħallmu nippreżervaw dak li għandna nkomplu nżommu, u kemm biex intejbu l-ħiliet tagħna li nadattaw ruħna bi ħsieb u b’responsabbiltà, biex nimmodernizzaw ruħna f’dak kollu li huwa ta’ ġid għal kulħadd, skond l-esiġenzi ta’ dan is-seklu teknoloġiku.
Ilkoll nammettu li għamilna progressi kbar f’din it-triq, u bir-rieda tajba tagħna lkoll għandna kull garanzija li dan it-titjib jitkompla. Bla ma ninsew id-diffikultajiet, bla ma nibqgħu lura fil-pass li jseħibna mal-pajjiżi l-oħra, aħna nħarsu ’l quddiem u nifirhu li aħna poplu li kellu u għad għandu ħafna u ħafna kwalitajiet sbieħ. Huma kwalitajiet sbieħ li writna minn ta’ qabilna, u huma kwalitajiet li aħna stess żammejna u żviluppajna, b’sens ta’ lealtà u ta’ aġġornament. Dawn huma kollha affarijiet li għandhom iferrħuna li bħala Maltin wassalna lil pajjiżna sa l-ogħla postijiet fl-istorja, sa livell għoli ta’ għajxien, u sa dak kollu li għandna bżonn biex dejjem aktar ikollna socjetà li fiha huwa inkluż kulħadd.
Dan huwa ż-żmien, aktar minn kull żmien ieħor matul is-sena, li fih nifirħu u nferrħu lil ħaddieħor. Bħala familja waħda, inħarsu lura u napprezzaw kulma rnexxielna niksbu għal pajjiżna, waqt li nħarsu wkoll ’il quddiem b’fiduċja kbira fil-kapaċitajiet diversi tagħna li, jekk il-Bambin irid, iwassluna biex nilħqu l-miri li għandna fuq l-aġenda nazzjonali.
Nawgura lilkom u l-familji tagħkom l-isbaħ xewqat għal dawn iż-żminijiet ta` festi.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958