Left arrow Mur Lura

PREMJU ĦADDIEM TAS-SENA 2006

PR1753
Date Icon 20/12/2006

Il-President ta’ Malta l-E.T. Edward Fenech Adami ippreżenta l-Premju Ħaddiem tas-Sena 2006 lis-Sur James Mercieca.

Il-Premju Ħaddiem tas-Sena ilu jingħata mill-1988. Preżenti wkoll għaċ-Ċerimonja kien hemm il-Prim Ministru l-Onor. Lawrence Gonzi, il-Ministru ta’ l-Edukazzjoni Żgħażagħ u Xogħol, l-Onor. Louis Galea, kif ukoll diversi rebbieħa tal-premju tal-passat.

James, jew kif inhu magħruf aħjar bħala Jimmy Mercieca, jaħdem bħala Senior Technical Officer fis-Sezzjoni ta’ l-Elettriku tad-Dipartiment tas-Servizzi fil-Ministeru tar-Rizorsi u l-Infrastruttura. Hu ilu jaħdem fis-servizz pubbliku għal dawn l-aħħar tletin sena. Beda jaħdem bħala Auto Electrician fil-Garaxx tal-Gvern, meta kien għad għandu biss 16-il sena. Għal tmien snin kien l-Imgħallem fl-Operations Section tal-istess garaxx, inkarigat minn ‘heavy plant’, u sitt snin bħala Senior Technical Officer fit-Taqsima ta’ l-Elettriku tal-Garaxx tal-Gvern fil-Marsa.

Is-sezzjoni li jaħdem fiha llum għandha 48 impjegat u llum qed tirrendi u tagħti riżultati ta’ xogħol tajjeb ħafna u ta’ fejda għall-pajjiż.

Jimmy huwa nkarigat mill-istallazzjoni u l-manutenzjoni ta’ ‘l fuq minn mija u sittin sett ta’ traffic lights madwar Malta u Għawdex kollu. Responsabbli minn madwar mitejn biċċa xogħol fis-sena, li jinkludi proġetti kbar bħall-istallazzjoni tas-sistema elettrika bħala parti mill-proġett ta’ l-Imdina, il-Ġnien ta’ Hastings, Il-Ġnien tal-Mall, Paceville, l-Akwadott ta’ Wignacourt, Dawret il-Gżejjer Buġibba, Sliema Promenade, il-Gnien tal-Barakka ta’ Fuq u Wied Babu fiż-Żurrieq.

Huwa wkoll responsabbli mill-manutenzjoni tas-sistema tal-floodlights tas-Swar tal-Belt, tal-Forti Sant’Anglu u ta’ Triq ir-Repubblika fil-Belt, kif ukoll mis-sistema elettrika f’ħafna Ministeri u Dipartimenti tal-Gvern, fil-Berġa ta’ Kastilja u l-Palazz tal-President.

Fix-xogħol tiegħu kemm-il darba jiġi msejjaħ għal xogħol urġenti barra mill-ħin normali u huwa dejjem disponibbli kemm bil-lejl kif ukoll fil-Ħdud u l-Festi, ħafna drabi mingħajr ma jitlob ħlas addizzjonali.

Xogħol li huwa jagħmel aktar milli hu mistenni minnu jinkudi għajnuna li huwa jagħti lill-inġiniera billi jaqsam magħhom l-esperjenza kbira li huwa akkwista fuq ix-xogħol, inklużi d-disinn ta’ sistemi ta’ stallazzjonijiet kbar.

Huwa bniedem li juża l-personalità u l-karattru tiegħu biex jikkonsulta u jiddiskuti l-bżonnijiet mal-imgħallmin u l-ħaddiema li jmexxi. Huwa persuna umli u rrispettat minn kulħadd. Huwa mezz ta’ kuntatt siewi mal-Pulizija kif ukoll ma’ l-Awtorità tat-Trasport li lilhom tagħti servizz is-sezzjoni tiegħu.

Kienu diversi l-okkazjonijiet fejn bil-kelma t-tajba tiegħu u pariri għaqlin, evita konflitti fuq ix-xogħol bejn imgħallmin u ħaddiema, u kkonvinċa lill-sħabu biex jintlaħqu ċertu ‘targets’ diffiċli ta’ xogħol li mingħajr l-intervent tiegħu aktarx ma kienux jintlaħqu.

Minn intervisti li saru kemm mal-Higher Management kif ukoll ma’ impjegati li magħhom jaħdem Jimmy Mercieca, il-Kumitat tal-Għażla ikkonferma li l-istess James Mercieca jissodisfa l-kriterji tal-Premju ta’ Ħaddiem tas-Sena 2006 u għalhekk qed jiddikjarah ir-rebbieħ ta’ dan il-premju. Il-Kumitat tal-Għażla maħtur mill-Ministru tal-Edukazzjoni, Zgħazagħ u Xoghol, din is-sena beda l-ħidma tiegħu ftit aktar kmieni mis-soltu biex jassigura li d-deliberazzjonijiet dwar in-nominazzjonijiet isiru b’reqqa kbira u b’hekk ikun ċert li l-għażla ssir b’ġustizzja mal-persuni nominati kollha.

Il-President tal-Bord ta’ l-Għażla, s-Sur Anthony Tabone qal li għalkemm in-numru ta’ nominazzjonijiet sottomessi kien wieħed tajjeb, xorta waħda mhux mifhum x’qed iżomm aktar ħaddiema milli jinnominaw lil sħabhom għal dan il-premju, speċjalment mis-settur privat. “Hija tassew ħasra, fl-opinjoni tal-Kumitat tal-Għażla, li minkejja li huwa fatt magħruf li hawn tant ħaddiema li matul is-sena mhux biss jiddistingwu ruħhom fuq xogħlhom bħala ħaddiema eżemplari, imma li jwettqu xogħol ta’ solidarjetà ma’ sħabhom u joħolqu għaqda fuq il-post tax-xogħol, fl-istess ħin jibqgħu mistura għax ma jkun hemm ħadd li jinnominahom għal dan il-Premju.

Mill-esperjenza tal-Kumitat tal-Għażla f’dawn l-aħħar tlett snin, nistgħu ngħidu li ħafna drabi jkun biss nuqqas - kemm mill-Managements kif ukoll mill-impjegati nfushom - li minħabba pressjoni ta’ ħin, ma jieqfux għal ftit biex jimlew il-formola u jagħmlu n-nominazzjoni. Aħna nħossu li din hija sfida li l-Kumitat tal-Għażla għal sena oħra jrid jara kif jista’ jegħlibha flimkien mal-Kumitat Organiżżattiv.”

Is-Sur Tabone qal li din is-sena, l-Kumitat irċieva sbatax-il nominazzjoni. Sebgħa nisa u għaxar irġiel. Għalkemm il-maġġoranza tan-nominazzjonijiet ġew mis-settur pubbliku jew agenziji u entitajiet tal-Gvern, ix-xogħol li jagħmlu l-persuni nominati kien mifrux fuq diversi livelli u tipi ta’ xogħol.

Il-Kumitat din is-sena intervista lil dawk kollha li ssottomettew xi nominazzjoni. Voldieri, ma saretx “short listing” fuq bażi tas-sottomissjonijiet miktuba biss. F’kazijiet minnhom saret anke t-tieni ntervista fejn instemgħu ukoll l-impjegati li jaħdmu mal-persuna nominata. Dan partikolarment fejn in-nominazzjoni tkun ġiet minn membri tal-management ta’ fejn taħdem il-persuna nominata u fejn ikunu ġew għall-ewwel intervista, membri tal-management biss. Dan sar biex ikollna stampa aktar kompleta tal-persuna nominata mhux biss mill-mod kif iħares lejha l-Management imma wkoll kif iħarsu lejha l-impjegati li jaħdmu magħha.

Is-Sur Tabone qal li l-Bord kien impressjonat mill-kwalità tan-nominazzjonijiet. “Ma tistax ma tħossokx kburi li f’pajjiżna hawn impjegati daqshekk dedikati u li jagħmlu tant xogħol ta’ fejda ma’ sħabhom fuq il-post tax-xogħol. Xtaqna li konna nistgħu nagħtu aktar minn premju wieħed għaliex onestament ħassejjna li kien hemm diversi minn fost dawk nominati li kien jixirqilhom premju wkoll. Imma r-regoli huma dawk li huma u għalhekk bilfors kellna nagħżlu.”

Is-Sur Tabone qal li aktar minn snin oħra, din is-sena l-Kumitat tal-Għażla seta jara l-entużjasmu li bih ippreżentaw in-nominazzjoni dawk li kienu ntervistati. Hawnhekk wieħed japprezza l-altruiżmu speċjalment meta jara mpjegati sħab il-persuna nominata li mhux biss ma juru l-ebda forma ta’ għira għax ġiet nominata dik il-persuna u mhux huma, imma jagħmlu dak kollu possibbli biex joħorġu l-kwalitajiet sbieħ kollha tal-persuna li jkunu qed jinnominaw. “Dan fih valur fih innifsu, u aħna, li għamilna dawn l-intervisti, ma stajniex ma nħossux kemm hawn tajjeb fostna. Mhux biss għax kien hemm sbatax-il persuna nominata li, kollha kemm huma fl-isfera tax-xogħol tagħhom, min aktar u min anqas, wettqu xogħol kbir; imma għaliex tara tant nies oħra, li mhux qed jagħmlu sforz biex jieħdu xi premju huma, imma biex irebbħu premju lil ħaddiehor. Dawn jiġu, joffru l-ħin tagħhom u jagħmlu sforz ġenwin biex joħorġu s-sabiħ fi sħabhom. Mhux dejjem nieqfu biex napprezzaw dan!”

Is-Sur Tabone temm jgħid li l-persuna magħżula din is-sena tkun ta’ xempju għal ħafna ħaddiema oħra. “Nittamaw li l-għoti ta’ dan il-premju jkompli jkabbar fost il-ħaddiema Maltin u Għawdxin is-sens ta’ bżonn li kollha kemm aħna għandna nagħtu dak il-ftit aktar biex pajjiżna jkompli jissaħħaħ u jkun jista jisfrutta l-opportunitajiet ġodda li qed ikollna u li għad irid ikollna. Aħna fiduċjużi wkoll li dan il-Premju ser ikompli jxettel is-sens ta’ solidarjetà li l-ħaddiema Maltin u Għawdxin għandhom iħossu bejniethom u bejnhom u dawk li jħaddmuhom, għax b’hekk biss jista jkompli jikber il-ġid li minnu jgawdu s-setturi kollha ta’ pajjiżna.” 

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow