DISKORS MILL-PRIM MINISTRU, L-ONOR. LAWRENCE GONZI, WAQT LAQGĦA MA’ MEMBRI TA’ L-ISTAMPA, MEMBRI TA’ KUNSILLI U TA’ KORPI KOSTITWITI, TRADE UNIONS U EMPLOYERS’ ORGANISATIONS, RAPPREŻENTANTI TAL-PARTITI POLITIĊI U GĦAQDIET OĦRA
Għeżież,
Huwa b’sens ta’ sodisfazzjon li f’dawn iż-żminijiet insib l-okkażjoni sabiex niltaqa’ magħkom biex naqsmu ftit riflessjonijiet flimkien dwar dak li nkunu għaddejna minnu tul is-sena u naħsbu wkoll dwar dak li jkun hemm jistenniena matul is-sena d-dieħla.
Matul ix-xhur li għaddew ħdimna magħkom u ħadna deċiżjonijiet kbar li qed jagħtu riżultati tajbin u bi ħsiebna nkomplu naħdmu magħkom għax aħna nagħrfu li kull aspirazzjoni tkun trid gwida tajba iżda biex titwettaq ikun meħtieg l-appoġġ tagħkom. Il-kuraġġ hu meħtieġ biex kull mument nieħdu dawk id-deċiżjonijiet kbar jew zgħar.
Pajjizna hu mibni fuq ix-xogħol, għalhekk il-kapaċitajiet ta’ kull wieħed u waħda minna għandna bżonn inkomplu niżviluppawhom u noħorguhom biex mhux biss jinkiseb is-suċċess fuq il-livell individwali iżda dan il-pajjiz ikompli jistagħna biex ikun jista’ jkompli jagħti l-aħjar livell ta’ edukazzjoni, saħħa u kura u jaghti wens lil dawk li jinħtiegu spalla fuq x’hiex jistrieħu.
Matul is-sena li għaddiet, dan il-gvern kompla jiġġenera l-impjiegi. Kien hemm ristrutturar matul is-snin li għaddew li għalih kien hemm rispons pożittiv minn kulħadd. U hawn irrid ngħid grazzi kemm lill-ħaddiema tagħna kif ukoll lil dawk li jimpjegawhom għaliex qatt ma naqsu milli juru l-flessibilta’ meħtieġa sabiex l-ekonomija tagħna tinbidel minn waħda ta’ valur miżjud baxx għal waħda ta’ aktar opportunitajiet għal kulħadd.
It-850 miljun Ewro għad-dispożizzjoni tal-poplu Malti u Għawdxi huma wkoll rizultat tas-sħubija ta’ Malta fl-Unjoni Ewropea. Dawn għandhom jagħtu spinta ’l quddiem biex ikompli jogħla l-livell ta’ l-għixien tagħna lkoll hekk kif numru ta' proġetti jibdew iseħħu mill-1 ta' Jannar li ġej.
Ilkoll kemm intom li tinsabu hawn tajtu kontribut kbir sabiex il-qagħda ta’ pajjiżna llum hija waħda daqshekk imtejba; kemm mill-aspett ekonomiku kif ukoll mill-aspett soċjali. Sabiex il-progress jissokta, jeħtieġ li nkomplu ninvestu fl-edukazzjoni, it-taħriġ, ir-riċerka u l-innovazzjoni, kif ukoll insaħħu l-kompetizzjoni tas-suq tagħna billi nkunu dejjem aktar produttivi. Biex nirnexxu, jeħtieġ li nkomplu nsaħħu l-potenzjal li għandu s-suq tax-xogħol ta’ pajjiżna u dan nistgħu nagħmluh biss billi nkomplu naħdmu flimkien.
Filwaqt li nawgura l-isbaħ ġejjieni għal pajjiżna, nixtieq Milied u sena mill-isbaħ lilkom u lill-familji tagħkom.
Grazzi.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958