INAWGURATA L-FEMALE WARD 1 F’MONTE CARMELI
L-ambjent fejn jgħix u jieħu kura l-pazjent b’mard mentali, ħafna drabi jiddetermina l-livell tas-suċċess tal-kura li tingħata. Għalhekk l-amministrazzjoni ta’ l-isptar Monte Carmeli dejjem tistinka biex itejjeb l-ambjent fiżiku ta’ l-isptar għax dan hu ta’ benefiċċju kbir għall-pazjenti.
Dan qalu l-Ministru tas-Saħħa, l-Anzjani u Kura fil-Komunità l-Onor. Louis Deguara, meta kien qiegħed jinawgura s-sala tan-nisa numru.1, li matul dawn l-aħħar xhur kienet rinovata u nbidlet għal waħda sabiħa u moderna biex fiha tingħata kura akuta lill-pazjenti b’challenging behaviour. Din is-sala tikkumplimenta l-Mixed Admission Ward.
L-immodernizzar ambjentali kontinwu ta’ l-isptar Monte Carmeli jiġi wkoll kumplimentat b’inizjattivi biex ikollna ħaddiema aktar imħarrġa u professjonali. Aktar ma jgħaddi ż-żmien aktar infermiera qegħdin jagħżlu li jispeċjalizzaw fil-kura mentali. In-Nursing Management ta’ Monte Carmeli ħa diversi inizjattivi biex l-infermiera jkunu aktar imħarrġa professjonalment fil-Mental Health Nursing.
Preżentement għandna numru konsiderevoli ta’ infermiera li qed isegwu degree course fis-saħħa mentali u oħrajn conversion course biex javanzaw mit-tieni għall-ewwel livell. Matul is-sena numru ta’ infermiera jingħataw l-opportunità li jattendu Continious Professinal Development Courses.
L-infermiera llum fehmu li biex ikunu effettivi fit-twettiq ta’ ħidmithom iridu jibqgħu aġġornati fuq l-aħħar żviluppi fil-kura li tingħata. Min-naħa tiegħu l-gvern joffri opportunitajiet biex dan isir fosthom lil dawk l-infermiera li jaħdmu fil-qasam tal-kura mentali.
F’dawn l-aħħar snin dan is-settur ra bidliet kbar bl-introduzzjoni ta’ kura fil-komunità. Għalkemm il-bidu hu dejjem diffiċli jidher li qegħdin jinkisbu r-riżultati mixtieqa grazzi għall-impenn u d-dedikazzjoni tal-ħaddiema kollha, professjonisti, infermiera, paramediċi u kategoriji oħra li jipprovdu s-servizz fil-komunità.
L-ippjanar tax-xogħol kollu sar b’koperazzjoni sħiħa bejn il-management ta’ l-isptar, il-konsulenti u anke l-ħaddiema li jaħdmu f’din is-sala. Intuża dan il-proċess ta’ ippjanar għax ħadd daqs l-istess ħaddiema ma jaf il-bżonnijiet kemm ta’ l-istess ħaddiema kif ukoll tal-pazjenti.
Fir-refurbishment intensiv li sar, ingħatat attenzjoni speċjali fuq l-ambjent, u t-tqassim tas-sala b’aktar faċilitajiet bħal kmamar għat-terapija, ward-rounds u viżitaturi.
Ix-xogħol ta’ modernizzar li sar f’din is-sala ġie jiswa madwar Lm110,000 li ġew mgħotija mill-Welfare Committee. Ix-xogħol sar minn kuntratturi privati u mill-impjegati ta’ Monte Carmeli.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958