IL-MINISTRU GĦALL-AFFARIJIET RURALI U L-AMBJENT IŻUR IL-JOINT RESEARCH CENTRE TA’ L-UNJONI EWROPEA
Il-Ministru għall-Affarijiet Rurali u l-Ambjent għamel żjara fil-Joint Research Centre (JRC) ta’ l-Unjoni Ewropea li jinsab f’Ispra, viċin Milan. Din iż-żjara saret fuq stedina tat-tmexxija taċ-Ċentru u matulha l-Ministru George Pullicino seta’ jara mill-qrib parti kbira mill-ħidma li jwettaq dan iċ-Ċentru.
Il-Ministru Pullicino, li kien akkumpanjat mid-Direttur tal-Policies u Inizjattivi Ambjentali Chris Ciantar, intlaqa’ mad-Direttur Ġenerali taċ-Ċentru Roland Schenkel. Il-JRC twaqqaf biex jipprovdi appoġġ lill-Kummissjoni Ewropea l-aktar fl-oqsma ta’ pariri xjentifiċi u tekniċi għat-tfassil ta’ policies. Iċ-Ċentru huwa indipendenti minn kull interess privat jew nazzjonali.
Iċ-Ċentru għandu budget annwali li jlaħħaq it-€300 miljun li huma ġejjin mill-budget tar-riċerka tal-Kummissjoni Ewropea u minn dħul ieħor li jiġġenera ċ-Ċentru.
Matul iż-żjara l-Ministru Pullicino ngħata dettalji dwar il-ħidma taċ-Ċentru f’oqsma bħalma huma l-GMOs, il-moviment suspettuż ta’ vapuri u containers, is-sorveljanza u l-infurzar f’każijiet ta’ tniġġiż u x-xogħol relatat mas-settur tas-sajd. Oqsma oħra li fuqhom jaħdem iċ-Ċentru u li kienu ppreżentati lill-Ministru Pullicino kienu l-identifikazzjoni elettronika ta’ annimali, il-ħidma relatata ma’ enerġija minn sorsi rinnovabbli, it-tniġġiż ta’ l-arja fil-Mediterran, l-ambjent sostenibbli fil-Mediterran u l-immaniġġjar ta’ l-iskart.
Il-Ministru Pullicino ddiskuta oqsma fejn iċ-Ċentru jista’ jkun ta’ għajnuna għal Malta fosthom fis-settur ta’ identifikazzjoni elettronika ta’ annimali kif ukoll f’setturi importanti bħalma hu t-tniġġiż fil-Mediterran. Is-settur tas-sajd ukoll kien enfasizzat bħala qasam importanti fejn iċ-Ċentru u Malta jistgħu jaħdmu mill-qrib.
Il-Ministru Pullicino esprima l-apprezzament tiegħu għax-xogħol siewi mwettaq miċ-Ċentru u awgura li pajjiżna jkun jagħraf jisfrutta dejjem aħjar ir-riżorsi u l-esperti taċ-Ċentru.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958