KONTRIBUZZJONI LEJN IT-TIXRID TA’ L-ISTORJA TA’ PAJJIŻNA
Il-Fondazzjoni Patrimonju Malti għadha kif ippubblikat is-seba’ volum fis-serje “Histories of Malta – Closures and Disclosures” ta’ l-Imħallef Giovanni Bonello.
Dan il-volum jiġbor fih 15-il kitba li jinkludu “La Monaca di Malta - Murder in a Hospitallier Monastery”; “A brief history of window-glass in Malta”; “Governors of Malta in the 16th Century”; “Some rare examples of women knights in Malta”; “Theatre in Malta before the ‘Manoel’”; “Dancing, Fireworks, Allegrezze, music”; “Minor Gozo in the early records”; “Sir George Courthop – the second English writer about Malta”; “A mysterious Mary Magdalen is St John’s”; “Usurping the Maltese-Eight-Pointed Cross in Novara: a 1651 incident”; “The first guild of artists in Malta, 1671”; “POWs in Malta during World War One”; “Artists who painted Maltese postcards 1898-1945”; “George Borg Olivier, 25 years on”; “Crucifixus, the Supremacy of infamy”. Tnax minn dawn il-kapitoli dehru f’ġurnali lokali u ġew maħduma mill-ġdid u miżjuda qabel ma nġabru fi ktieb.
Il-Ministru għat-Turiżmu u Kultura Francis Zammit Dimech nieda dan il-ktieb waqt preżentazzjoni li saret f’Le Meridien Phoenicia, l-Furjana.
Il-Ministru Zammit Dimech qal li r-riċerka li għamel tul iż-żmien l-Imħallef Giovanni Bonello u li ġabar f’pubblikazzjoni bħal din, kienet żieda mportanti mhux biss għal dawk kollha li jiġbru l-Melitensia, iżda anke għal dawk li għandhom għal qalbhom l-istorja ta’ pajjiżna mid-diversi aspetti tagħha.
Il-Ministru għat-Turiżmu u Kultura qal li Malta għandha storja twila li tmur lura eluf ta’ snin. Hu qal li jirriżulta li l-istorja ta’ dawn l-aħħar ftit aktar minn 400 sena, jiġifieri minn mindu ġew fostna l-Kavallieri ta’ San Ġwann, tul il-ħakma qasira Franċiża u u l-160 sena ta’ l-era Ingliża f’Malta, kienu snin intensi li ħallew impatt qawwi mhux biss fuq l-istorja ta’ pajjiżna, iżda anke fuq il-mod kif ngħixu, il-bini residenzjali, il-knejjes, palazzi u fortifikazzjonijiet.
Il-Ministru Zammit Dimech qal li Giovanni Bonello bl-istil mexxej tiegħu irnexxielu jressaq l-istorja lejn il-poplu, irnexxielu jagħmel lill-poplu aktar konxju minn dak li għadda minnu pajjiżna u missierijietna tul iż-żminijiet.
Il-Ministru għat-Turiżmu u Kultura qal li l-istorja u l-kultura kienu wkoll mezz ewlieni biex nattiraw lejn pajjiżna turisti li għalihom din in-niċċa hi attrazzjoni ewlenija. Il-Ministru Zammit Dimech feraħ lil Giovanni Bonello għal din l-aħħar pubblikazzjoni f’sensiela ta’ pubblikazzjonijiet li mhux biss jagħmlu unur lilu, iżda anke lil pajjiżna.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958