ĦIDMA FAVUR IT-TRATTAMENT AĦJAR TA’ L-ANNIMALI
Yelp for Help twaqqfet biex tappoġġja u tgħin organizzazzjonijiet u individwi li jgħinu annimali abbandunati. L-ewwel għajnuna minn din l-organizzazzjoni (non-profit) tmur għal problemi finanzjarji u ta’ organizzazzjoni li jiltaqgħu magħhom kuljum dawn l-għaqdiet u individwi.
Sentejn ilu Yelp for Help organizzat weekend ta’ attivitajiet fil-Kumpless ta’ Bay Street fejn DJs, li wkoll iħobbu l-annimali, u organizzaw sensiela ta’ attivitajiet bl-iskop li jiġbru flus ħalli jgħinu għaqdiet u individwi li jħarsu l-annimali.
Is-sena l-oħra Yelp for Help organizzaw ‘Walk Your Dog Day’ fil-Ġonna tal-Buskett li kienet suċċess. Din is-sena Yelp for Help ser jorganizzaw il-‘fuRRRRballs festival’ għal darb’oħra fil-Ġonna tal-Buskett. F’din l-attivita’ ser jipparteċipaw atturi u mużiċisti. Ser jittella’ ‘suq’ minn voluntieri ta’ santwarji ta’ l-annimali lokali; tined għall-ikel u x-xorb; tinda għall-qari ta’ stejjer lit-tfal; wirja tal-klieb mill-Protezzjoni Ċivili u wirjiet ‘live’ minn “Filletti & Gianni Unplugged & DJ sets.”
Il-Ministru għat-Turiżmu u Kultura Francis Zammit Dimech, li inawgura din l-attivita’, feraħ lill-għaqda Yelp for Help għall-inizjattiva tagħha. Hu qal li l-annimali għandna nieħdu ħsiebhom u ħadd m’għandu jaħqarhom jew jabbandunahom. Hu qal li dan jiġri l-aktar fix-xhur tas-sajf meta ħafna jsiefru u jitlqu l-annimali għal għonq it-triq. Hu qal li moħqrija ta’ dan it-tip kienet ta’ min jistmerrha u jikkundannaha
“Jien nemmen li dawk li jagħtu każ ta’ l-annimali u jħarsuhom minn min jipprova jaħqarhom ma jsibu ebda diffikulta’ li jħarsu wkoll l-ambjent madwarna. Meta Yelp for Help qed jiġbru flus biex jappoġġjaw annimali domestiċi bla dar, jkunu qed iwettqu att sabiħ li hu ta’ min jinkoraġġieħ,” tenna l-Ministru Zammit Dimech.
Il-Ministru għat-Turiżmu u Kultura qal li fi żmien meta hawn ħafna nies li huma aktar konxji mill-annimali, għaqdiet li jaħdmu favurhom għandna ninkoraġġuhom b’kull mezz ħalli jiġbru l-fondi meħtieġa favur għaqdiet volontarji u individwi li jieħdu ħsieb il-ħarsien ta’ l-annimali.Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958