SEMINAR MILL-FONDAZZJONI GĦAL SERVIZZI EDUKATTIVI DWAR IS-SISTEMA TA’ L-ISTREAMING U L-EŻAMI TAL-JUNIOR LYCEUM
Il-Fondazzjoni għal Servizzi Edukattivi (FES) fi ħdan il-Ministeru ta’ l-Edukazzjoni tipprovdi firxa ta’ servizzi edukattivi għal familji, skejjel u kulleġġi, u għal komunitajiet. Il-Fondazzjoni taħdem ukoll fil-qasam tat-tisħiħ tas-sehem tal-ġenituri fl-edukazzjoni ta’ uliedhom, tagħhom infushom u fil-ħajja skolastika.
L-FES organizzat seminar biex tniedi l-ktieb “Transition from Primary to Secondary in Malta: Time to break the mould?” miktub għall-FES minn Dr Grace Grima u Dr Josette Farrugia. Dan il-ktieb qed jiġi ppublikat bi sħab bejn l-FES u l-Allied Publications Ltd.; u huwa l-ewwel wieħed fis-serje ta’ publikazzjonijiet edukattivi ta’ l-FES, imsejħa ‘Families and Schools’.
Din il-pubblikazzjoni tagħti ħarsa analitika lejn ir-riċerka li saret f’Malta f’dawn l-aħħar għoxrin sena dwar is-sistema ta’ l-istreaming fl-aħħar sentejn ta’ l-iskejjel primarji u dwar l-eżami tal-Junior Lyceum. L-awturi analizzaw il-mod li bih l-eżamijiet fl-aħħar tar-raba’ u tal-ħames sena tal-primarja kif ukoll l-eżami tal-Junior Lyceum qed jintużaw primarjament biex l-istudenti jintgħażlu minn xulxin skond ir-riżultati li jġibu.
Mistoqsija komuni li ġiet diskuss hija jekk l-eżamijiet għandhomx ikollhom il-funzjoni aktar importanti li jassessjaw b’mod differenti x’ikunu tgħallmu l-istudenti, mingħajr rabta ma’ sistemi ta’ firda bejn student u ieħor skond is-suċċess fl-eżami. Qamet ukoll il-mistoqsija jekk l-eżami ta’ l-aħħar tas-sena waħdu hux biżżejjed biex ikejjel it-tagħlim li jseħħ matul is-sena skolastika kollha.
L-awturi stess qajmu mistoqsijiet dwar il-fatt li studenti li fil-ħames sena jsibu ruħhom fil-aħħar klassijiet, għandhom it-tendenza li jibqgħu fl-aħħar skaluni tas-sistema edukattiva sakemm joħorgu mis-sistema ta’ l-edukazzjoni obbligatorja. Dan ipoġġi dubju fuq il-fehma ta’ ħafna mill-għalliema, li jsostnuha wkoll il-maġġoranza tal-ġenituri, illi jekk l-istudenti jiġu mifruda skond il-prestazzjoni tagħhom fl-eżami ta’ l-aħħar tas-sena, allura jkunu jistgħu jitgħallmu aħjar. L-awturi jsemmu wkoll l-effetti ħżiena li jħalli l-istress ta’ l-eżamijiet fuq l-istudenti, minħabba l-biża’ li jekk imorru ħażin se jsibu ruħhom fi klassijiet jew fi skejjel li jġorru magħhom konnotazzjoni ta’ falliment. Fattur ieħor interessanti li jiffukkaw fuqu l-awturi huwa l-esperjenza ta’ tranżizzjoni li jgħaddu minnha t-tfal bejn il-livell primarju u sekondarju.
L-awturi jsostnu l-argumenti tagħhom billi għamlu studju komparattiv li fih iqabblu s-sistema edukattiva Maltija ma’ dik ta’ 32 pajjiż ieħor. Fl-ebda wieħed minn dawn il-pajjiżi fost l-aktar żviluppati fid-dinja ma tintuża sistema fejn l-istudenti jintgħażlu minn xulxin fl-eta’ ta’ 9 snin bħal ma jsir f’Malta. Fl-Irlanda ta’ fuq, s’issa kien isir eżami fl-eta’ ta’ 11-sena li min jgħaddi minnu jkun jista’ jmur fi skejjel differenti. Imma anke f’dan il-pajjiż din is-sistema se tiġi abbandunata. Ir-raġunijiet huma li f’dan il-pajjiż qed iqumu dubji serji dwar kemm eżami wieħed fl-eta’ relativament żgħira ta’ 11-il sena għandu jiddetermina r-rotta akkademika ta’ kull student.
L-awturi jargumentaw ukoll li f’pajjiżi fejn l-istudenti jiġu magħżula f’eta’ żgħira, hemm it-tendenza li l-aħjar riżorsi u l-akbar investimenti jgawdu minnhom dawk l-istudenti li l-aktar iħossuhom komdi fis-sistema. Mill-banda l-oħra dawk il-pajjiżi fejn isir sforz biex ir-riżorsi u l-investimenti jgawdi minnhom kulħadd mingħajr il-bżonn ta’ segregazzjoni, il-pajjiż igawdi minn popolazzjoni li hija aktar edukata u mħarrġa u li tkun f’qagħda li tikkontribwixxi fil-ħolqien tal-ġid fil-pajjiż.
L-awturi, bħal ma jindika t-titlu tal-ktieb, jistaqsu jekk wasalx iż-żmien li nirkbu l-biżgħa li ninqatgħu mit-tradizzjoni u nersqu lejn sistema edukattiva aktar ġusta u effettiva li biha verament ikunu jistgħu jirnexxu l-istudenti kollha.
Is-seminar ġie indirizzat minn Nora Macelli, Kap Eżekuttiv tal-Fondazzjoni għal Servizzi Edukattivi (FES); Dr. Carmel Borg, Dekan tal-Fakulta’ ta’ l-Edukazzjoni fl-Universita’ ta’ Malta; Micheline Sciberras, Direttur, Policy, Development and Programme Implementation fil-Ministeru ta’ l-Edukazzjon; u mill-awturi tal-ktieb Dr Grace Grima u Dr Josette Farrugia.
L-ideat li ħarġu mill-workshops għall-parteċipanti se jkunu kkunsidrati mill-Kumitat mwaqqaf mill-Ministru Louis Galea biex jistudja fil-fond il-kwistjonijiet ta’ l-istreaming, rotot akkademiċi fis-sistema edukattiva, kif ukoll il-proċess tal-passaġġ mill-primarja għas-sekondarja fis-sistema edukattiva Maltija. Huwa ttamat li d-djalogu jkompli u li permezz tiegħu jinstabu alternattivi aktar ġusti u effettivi għas-sistemi ta’ bħalissa, alternattivi li jkunu jistgħu jinkwadraw ruħhom fir-riforma li għaddejja bħalissa u li tolqot b’mod dirett il-qafas tas-sistema edukattiva f’Malta.
F’kummenti li ta, il-Ministru Louis Galea qal li dan id-dokument se jkun parti mportanti mill-analiżi li qed issir dwar l-eżamijiet li jsiru fl-età ta’ ħdax-il sena (11+ exams). Il-Ministru qal li fid-dokument “Biex Uliedna Jirnexxu Ilkoll” dwar ir-riforma edukattiva il-Gvern iddeċieda li sakemm l-edukaturi jsibu sistema aħjar u li jkollha l-fiduċja tal-poplu Malti, l-eżami tal-Junior Lyceum ma jitneħħiex. Hu qal li madankollhu fir-riforma diġà beda l-process biex jonqsu l-iskossi meta l-istudenti jgħaddu mil-livell primarju għal dak sekondarju.
Ir-riorganizazzjoni ta’ l-iskejjel ta’ l-Istat f’Kulleġġi fejn l-istudenti tas-Sekondarja u tal-Junior Lyceum ikunu fl-istess bini toffri possibilitajiet ġodda ta’ kif l-għalliema jistgħu jgħinu lill-istudenti jilħqu l-milja tagħhom billi jmexxuhom il-quddiem fis-suġġetti li fihom ikunu sodi u jappoġġjawhom b‘mod effettiv fejn ikunu batuti.
Il-Ministru Louis Galea qal li fl-ewwel sena ta’ prova fit-tlett Kulleġġi kien hemm diversi esperjenzi pożittivi fosthom transizzjoni aktar ppjanata u tfal aktar infurmati dwar il-livell sekondarju, programmi edukattivi żviluppati skond il-potenzjal tat-tfal u bi flessibiltà ta’ ċaqlieq minn livell għall-ieħor meta jsir progress, u serħan tal-moħħ tal-ġenituri li jafu fejn se jibdew skola uliedhom fl-età ta’ tlett snin u fejn se jispiċċaw fl-età ta’ 16.
“Studji bħal dawn huma mportanti għax jagħtu kontribut siewi għar-riflessjoni, l-analiżi u d-diskussjoni serja li biż-żmien twassal għall-iżvilupp aktar approfondit tal-ħsieb li jwassal għall-azzjoni għaqlija, ” temm jgħid il-Ministru Galea.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958