“IL-GVERN GĦADDEJ BIL-PROĊESS TA’ KONSULTAZZJONI MAS-SETTURI TAN-NEGOZJI Ż-ŻGĦAR PERMEZZ TAS-SEGRETARJAT GĦAN-NEGOZJI ŻGĦAR U S-SELF EMPLOYED.” – SEGRETARJU PARLAMENTARI EDWIN VASSALLO
“L-informazzjoni hi l-aktar għodda importanti għall-imprendituri tagħna. Is-sidien tan-negozji ħafna drabi, minħabba l-pass mgħaġġel tan-negozju, ma jsibux ħin biex jattendu laqgħat, iżda jridu jibdew isibu l-ħin biex jinfurmaw ruħhom dwar dak li jkun qiegħed iseħħ fis-settur kummerċjali.” Is-Segretarju Parlamentari għan-Negozji Żgħar u s-SelfEmployed, Edwin Vassallo, kien qiegħed jitkellem fil-ftuħ ta’ laqgħa ta’ konsultazzjoni ma’ numru ta’ għaqdiet u organizzazzjonijiet li jirrappreżentaw setturi differenti tan-negozju.
Fuq l-aġenda tal-laqgħa kienu bosta s-suġġetti li jolqtu mill-qrib lin-negozji ż-żgħar. Fost l-għaqdiet tan-negozju preżenti għal din il-laqgħa kien hemm il-GRTU, MFMO (furniture manufacturers), MPIA (printers), APEX u KOLS (koperattivi), MABT (beauticians), Photographers’ Association, MHRA, FOI, MIM u MEA.
Dawn l-għaqdiet bejniethom jirrappreżentaw madwar 9,000 membru, bejn persuni individwali u kumpaniji. Preżenti wkoll għal din il-laqgħa kien hemm rappreżentanti mis-Segretarjat Parlamentari għan-Negozji Żgħar u s-Self Employed, mill-Malta Enterprise u mid-Diviżjoni għall-Kummerċ, kif ukoll rappreżentant mill-NECC.
David Stellini, mill-NECC, ta informazzjoni fil-qosor dwar kif ser jiġi affettwat is-settur kummerċjali bil-bdil għall-ewro. Hu saħaq fuq il-fatt li n-negozjanti mhux ser jgħollu l-prezzijiet tagħhom sempliċement għax ser naqilbu għall-ewro. Ir-rappreżentant ta’ l-NECC spjega kif waqt laqgħat li qiegħed jattendi, li huma organizzati mis-Segretarjat, qiegħed jiltaqa’ direttament mas-settur kummerċjali u qiegħed jifhem dejjem aktar kemm hu importanti li l-imprendituri jżommu ruħhom aġġornati. Is-settur kummerċjali għandu jkun informat tajjeb dwar il-bidliet li qegħdin iseħħu. David Stellini qal li hemm ħafna x’wieħed ikun jaf dwar il-bidla għall-ewro, iżda hemm ftit li jrid isir.
Kemm is-Segretarju Parlamentari kif ukoll ir-rappreżentant mill-NECC esprimew id-disponibilita’ tagħhom u qalu li ser ikunu qegħdin jorganizzaw aktar laqgħat għas-settur tas-self employed.
Waqt il-laqgħa, is-Segretarju Parlamentari Edwin Vassallo tkellem ukoll dwar l-etika fix-xogħol, u dwar l-ħtieġa li kull għaqda li tirrappreżenta settur differenti ta’ negozju tagħti importanza lill-kodiċi ta’ l-etika li ‘l quddiem ikun jista’ jwassal lejn aktar għarfien ta’ l-importanza ta’ Responsabbilta’ Soċjali ta’ l-Intrapriżi (CSR). L-Onor. Vassallo qal ukoll li “huwa importanti li s-self employed u s-sidien tan-negozji żgħar jagħmlu parti minn organiżazzjoni, għax b’hekk ikunu jistgħu mhux biss jagħtu sehmhom, iżda wkoll jirċievu informazzjoni dwar dak li jkun qiegħed iseħħ fis-suq. Ma jistax ikun li n-negozjanti tagħna joperaw qishom id-dinja ta’ madwarhom ma teżistix. Li tkun informat huwa importanti mhux biss għall-bidla għall-ewro, iżda f’kull ħaġa li taffettwa lin-negozju.”
Waqt il-laqgħa ġew diskussi wkoll punti li kienu tqajjmu fil-konferenza annwali organizzata mis-Segretarjat Parlamentari, u l-Onor. Vassallo spjega kif il-kummenti li ngħataw waqt il-workshops li saru f’din il-konferenza ma ntesewx, u s-Segretarjat għaddej f’ħidma biex jitwettqu s-suġġerimenti li ġew imressqa.
Fit-tmiem tal-laqgħa, is-Segretarju Parlamentari Edwin Vassallo irringrazzja lil dawk kollha preżenti tal-ħidma tagħhom mas-self employed, u saħaq li l-ħidma tas-Segretarjat ser tkun qiegħda tkompli biex ix-xogħol tas-settur tan-negozji żgħar f’pajjiżna dejjem ikun aktar faċilitat.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958