JUM DINJI TAT-TFAL: TAJRA FL-GĦOLI GĦALL-ĦARSIEN AĦJAR TAT-TFAL
“Il-Ħarsien Aħjar tat-Tfal” hija t-tema li għażel il-Ministeru għall-Familja u Solidarjetà Soċjali biex jiċċelebra l-Jum Dinji tat-Tfal din is-sena.
“Aħna nemmnu li t-tfal huma l-ġejjieni tagħna, iżda rridu wkoll insaħħu l-preżent tat-tfal tagħna biex huma jkunu jistgħu jgawdu mit-tfulija tagħhom. Dan nistgħu nagħmluh billi nsaħħu l-leġislazzjoni, il-politika u s-servizzi li diġà għandna u nibnu dawk ġodda, skond il-bżonn.”
Dan qalitu l-Onorevoli Dolores Cristina, Ministru għall-Familja u Solidarjetà Soċjali, hija u tniedi programm ta’ attivitajiet immirati lejn it-tfal u l-ħarsien tagħhom. Grupp ta’ tfal bejn il-5 snin u l-15-il sena żaru lil Ministru Cristina fl-uffiċċji personali tagħha fil-Ministeru fil-Belt Valletta. Hemmhekk kellhom ukoll iċ-ċans jagħmlu mistoqsijiet lill-Ministru Cristina dwar dak li xtaqu.
Waqt din il-laqgħa mat-tfal, il-Ministru Cristina ppreżentat fuljett li bħalissa qed jitqassam mad-djar kollha ta’ Malta u Għawdex. Permezz ta’ dan il-fuljett wieħed jista’ jagħmel tajra, tajra li hija simbolu tal-ħolm tat-tfal, simbolu ta’ l-għoli li nixtiequ nilħqu fil-ħarsien aħjar tat-tfal. Fuq il-fuljett hemm imniżżlin l-istruzzjonijiet neċessarji biex flimkien mal-familja tagħhom, it-tfal jagħmlu din it-tajra, bid-disinn kif jixtiequ huma. Kull min ikun għamel din it-tajra huwa mħeġġeġ jingħaqad f’attività għall-familja li se ssir fid-19 ta’ Novembru fil-picnic area f’Ta’ Qali bejn is-siegħa u l-erbgħa ta’ wara nofsinhar. It-tfal huma wkoll mistiedna jġibu t-tajra tagħhom fil-Ministeru għall-Familja u Solidarjetà Soċjali wara d-19 ta’ Novembru u mhux aktar tard mit-13 ta’ Diċembru. Se tittella’ wirja fil-bitħa tal-Ministeru stess bit-tjur kollha u tibda proprju qabel il-Milied.
Il-Ministru Cristina semmiet il-bżonn li nisimgħu aktar lit-tfal, li nagħtu aktar widen għal dak li jkunu qed isaqsu. Hija tkellmet ukoll dwar dak li diġà għamel il-Gvern fil-qasam tal-ħarsien tat-tfal u dwar dak li ser iseħħ fil-futur qrib. “Kuntenta ngħid ukoll li x-xogħol fuq il-liġi l-ġdida tal-fostering tlesta u jmiss issa li titla’ quddiem il-Kabinett,” tenniet il-Ministru. “Aħna ser inkomplu f’din it-triq li nsaħħu l-istrutturi li minnhom jistgħu jibbenefikaw it-tfal u għalhekk qegħdin hawn illum biex naraw ftit mill-inizjattivi li l-Ministeru tiegħi għandu mħejji f’dak li jirrigwarda t-tfal.”
F’dawn it-tliet ġimgħat ta’ attivitajiet ser nisimgħu dwar l-Added Support Scheme li toffri għajnuna lil foster carers ta’ tfal b’imġiba diffiċli jew b’diżabilità u li huma taħt care order. Il-Ministru għall-Familja u Solidarjetà Soċjali ser tipparteċipa wkoll f’konferenza internazzjonali tal-EuroChild bit-tema ta’ politika u prattika lejn l-inklużjoni soċjali tat-tfal u ż-żgħażagħ. Ser nibdew naraw ix-xogħol li qed isir bir-reqqa biex faċilitajiet fl-Istitut ta’ Ġesù ta’ Nazaret jibdew jintużaw mir-Richmond Foundation li ser ikollhom f’idejhom it-tmexxija ta’ Programm Innoċenti, programm ta’ terapija residenzjali għat-tfal b’imġieba diffiċli. Kif spjeġat qabel, fid-19 ta’ Novembru ser jittajru t-tjur f’Ta’ Qali. L-Aġenzija Sedqa ser tniedi CD interattiv bl-isem ta’ “Tfal” li jagħmel parti mill-primary prevention programme“Babes”. Il-Ministru Cristina ser iddur diversi postijiet fil-Jum Dinji tat-Tfal biex tiltaqa’ mat-tfal u tisma’ leħinhom direttament. Fl-aħħarnett, fit-23 ta’ Novembru ser ikun hemm sessjoni straordinarja l-Parlament għal Jum Dinji tat-Tfal fejn diversi gruppi ta’ tfal ser jitkellmu fuq it-tema tal-ħarsien aħjar tat-tfal.
L-impenn tal-Ministeru f’dawn it-tliet ġimgħat huwa li jiġbed l-attenzjoni ta’ kulħadd fuq it-tfal, fuq il-bżonnijiet tagħhom, fuq is-sbuħija tagħhom. “Illum naħseb l-aktar ħaġa importanti għalija,” temmet tgħid il-Ministru “hi li għandi l-opportunità noqgħod bilqiegħda fil-kmamar tiegħi ma’ l-aktar mistednin importanti li jista’ jkolli, dawn it-tfal. Nixtieq nisma’ minn għandhom biex flimkien insiru nafuhom u biex nitgħallmu minnhom.”
Nota: Min ma jirċevix kopja tal-fuljett bit-tajra sat-13 ta’ Novembru jista’ jiġbor waħda mill-Ministeru għall-Familja u Solidarjetà Soċjali li jinsab f’Triq ir-Repubblika, il-Belt Valletta.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958