IL-FTUĦ TA’ L-EWWEL FAŻI TAL-PARK AND RIDE SER TWASSAL GĦAL TITJIB IMMEDJAT FL-AMBJENT TAL-BELT VALLETTA
Is-suċċess ta’ l-iskema tal-Park and Ride (P&R), li l-ewwel fażi tagħha bdiet topera minn sbieħ it-Tnejn filgħodu, ser iwassal biex il-ġimgħa d-dieħla jibda jitneħħa l-parkeġġ abbużiv li ta’ kuljum joħnoq it-toroq tal-Belt Valletta.
Waqt żjara li għamel fuq is-sit fi Crownworks u Hornworks fil-limiti tal-Floriana illum wara nofsinhar, il-Ministru għall-Iżvilupp Urban u Toroq, l-Onor. Jesmond Mugliett qal li l-użu ta’ l-iskema mill-pubbliku fil-pilot run ta’ nhar it-Tnejn kien ogħla minn dak li kien mistenni.
“Sas-sitta ta’ filgħaxija aktar minn 500 vettura ġew ipparkjati hawn f’xi ħin, filwaqt li madwar 280 ruħ għamlu użu mis-servizz ta’ shuttle bejn is-sit fil-Furjana u Pjazza Ħelsien bir-ritorn. Illum rajna żieda qawwija fl-użu tant li sas-1.30 p.m. tal-lum kienu pparkjaw mas-650 vettura u 608 kienu wżaw is-servizz tax-shuttle. Dan l-użu kien aħjar mill-aktar previżjonijiet ottimisti li kellna u huwa riżultat inkoraġġjanti ħafna għall-futur ta’ dan il-proġett,” qal il-Ministru Mugliett.
L-ewwel fażi tal-proġett tal-P&R tista’ tilqa’ fiha sa massimu ta’ 500 vettura. Intant bħal issa qed jitkompla x-xogħol fuq it-tieni fażi tal-proġett fil-foss ta’ madwar il-Crownworks u Hornworks li kien waqa xi ftit lura. Dan minħabba xi problemi li kien hemm ma’ l-aħħar okkupanti tal-garaxxijiet li kien għad fadal hemmhekk. Ladarba titlesta din it-tieni fażi, il-parkeġġ ser ikun jiflaħ mad-950 vettura. L-investiment totali tal-Gvern f’dan il-proġett mistenni jkun ta’ madwar Lm700,000.
Min jipparkja fis-sit li ser jibqa’ miftuħ 24 siegħa kuljum, jista’ jaqbad servizz ta’ shuttle dirett lejn il-Belt li jopera mis-6.00 a.m. sas-siegħa ta’ bil-lejl. Min jipparkja fil-P&R qed jingħata wkoll l-opportunità li jissellef rota b’xejn biex jasal il-Belt jew inħawi oħra fil-viċin. Din il-faċilità żdieded fil-popolarità mal-pubbliku tul it-tieni jum ta’ operazzjoni tal-P&R.
Il-pilot run ta’ nhar it-Tnejn għenet sabiex jiġu ndividwati u rettifikati xi problemi żgħar li seta’ kien hemm, kemm fis-sit innifsu, kif ukoll fl-infrastruttura tat-toroq li hemm fil-madwar. Fil-fatt, sa dalgħodu kienu nbidlu l-intervalli tat-traffic lights ġodda li ġew stallati fi Triq Sant’Anna biex ix-shuttle tal-Park and Ride, fi triqitha lejn il-Belt, tkun tista’ taqsam din it-triq direttament minn St. Francis Ravelin. Dan it-tibdil wassal biex dal-għodu it-traffiku tmexxa b’mod normali f’din it-triq.
Id-domanda għas-servizz tax-shuttle fl-ewwel jum wasslet ukoll biex jinbidlu l-frekwenzi ta’ dan is-servizz. L-ADT fil-fatt qed testendi l-peak time ta’ filgħodu b’siegħa. Dan ifisser li mil-lum, l-istennija massima għax-shuttle bejn is-07.00 a.m. u d-09.30 a.m. ser tkun ta’ 4 minuti. Hemm il-possibilità li l-peak time ta’ filgħaxija li għalissa jkopri mill-4.00 sas-6.00 p.m. jiġi estiż ukoll. Il-vjaġġ round-tripta’ kull vann qed jieħu madwar 10 minuti, hekk kif kien ippjanat.
Il-Ministru għall-Iżvilupp Urban u Toroq tkellem ukoll dwar kif il-proġett tal-Park and Ride irrijabilita sit li kien mitluq għal snin twal.
“Min kien hawn ftit ġimgħat ilu mal-bidu tax-xogħlijiet japprezza kif din li kienet dumping site illegali, illum inbidlet f’sit ħaj li qed iservi użu speċifiku. Il-proġett serva wkoll sabiex reġgħu inkixfu xi assi storiċi bħal Gun Powder Room, li tkun tista’ titgawda mill-pubbliku meta tiġi restawrata.”
Il-Ministru Mugliett żied jgħid li l-fatt li kemm il-parkeġġ, kif ukoll l-użu tax-shuttles huma kollha b’xejn qed iservi ta’ inċentiv għall-pubbliku, li qed jifhem li issa teżisti alternattiva valida għad-dħul fil-Belt Valletta bil-karozza privata. L-Awtorità dwar it-Trasport diġa’ kollha feedback li xerrejja li mhux normalment jidħlu l-Belt sabiex jixtru, illum għażlu li jidħlu l-Belt Valletta minħabba l-opportunità ġdida li qed joffri l-P&R.
“Dan huwa l-ewwel pass fl-istrateġija tal-Gvern lejn il-ħolqien ta’ Belt Valletta b’ambjent aħjar. Il-ftuħ ta’ dan il-proġett ser iwassal biex aktar tard din il-ġimgħa, jibda jitneħħa l-parkeġġ illegali li ta’ kuljum ikerraħ u anke jagħmel ħsara lit-toroq tal-Belt Valletta,” qal il-Ministru Mugliett.
“Bil-ħolqien ta’ 950 post ta’ parkeġġ ġdid alternattiv ikun jista’ jitneħħa wkoll l-on street parking f’xi toroq fiċ-ċentru tal-Belt sabiex fi ftit ġimgħat oħra jibda l-proġett ta’ pavimentar tal-Belt Valletta li kien tħabbar f’Lulju,” żied jgħid il-Ministru għall-Iżvilupp Urban u Toroq.
It-tneħħija tal-parking illegali u parking ieħor f’toroq li ser isiru pedonali mistenni jibda l-ġimgħa d-dieħla. L-ADT mistennija wkoll tirrijabilita s-subway ta’ ħdejn il-Bombi, sabiex il-Park and Ride illum huwa għażla wkoll għall-klijenti jew ħaddiema li jenħtiġilhom imorru fuq in-naħa l-oħra ta’ Triq Nazzjonali.
“Il-ħsieb aħħari tal-Gvern huwa li jagħti dehra isbaħ lill-Belt Valletta, li tkun aktar aċċessibbli għal kulħadd. Is-suċċess tal-proġett tal-Park and Ride fl-ewwel jiem tiegħu huwa xhieda li mexjin fit-triq it-tajba,” temm jgħid il-Ministru Mugliett.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958