DISKORS TAL-FTUĦ MILL-ONOR DOLORES CRISTINA, MINISTRU GĦALL-FAMILJA U SOLIDARJETA’ SOĊJALI, FL-OKKAŻJONI TA’ KONFERENZA ORGANIZZATA MILL-ASSOĊJAZZJONI DOWN SYNDROME F’GĦELUQ IL-25 ANNIVERSARJU MIT-TWAQQIF TAGĦHA – 28 TA’ OTTUBRU 2006 – LUKANDA LE MERIDIEN
Mrs Mugliette, Chairperson, Assoċjazzjoni Down Syndrome ta’ Malta,
· Sur Peel, Chairperson tal-konferenza,
· kollegi fil-qasam tal-politika,
· Ms Helen Keogh,
· Sinjuri,
Nibda billi nifraħ lill-Assoċjazzjoni Down Syndrome (ADS) f’għeluq il-25 sena mit-twaqqif tagħha. Kwart ta’ seklu ta’ ħidma favur il-persuni b’Down Syndrome, il-familji tagħhom u favur is-Soċjetà Maltija u Għawdxija kollha kemm hi.
It-tema tal-konferenza: ‘Tagħlim Tul il-Ħajja għall-Persuni li Għandhom id-Down Syndrome’ tfakkarna li l-ħajja tagħna kollha kemm hi hija vjaġġ fejn, kif jgħid il-Malti: ‘Nikbru u Nitgħallmu’. Dawn l-aħħar 25 sena raw il-persuni b’Down Syndrome, bħal persuni b’diżabilità oħra, joħorġu mid-dlamijiet fejn l-imħuħ magħluqa tal-passat kienu jżommuhom, biex illum isibu posthom fil-qalba tas-soċjetà tagħna, soċjetà li aħna ninsistu għandha tkun waħda inklużiva. Soċjetà fejn kulħadd għandu post, hi x’inhi l-kapaċità tiegħu, jew tagħha.
Fil-passat kien hemm ħsieb li l-persuna b’Down Syndrome ma kienitx kapaċi titgħallem, ma kienitx kapaċi taħdem f’xogħol produttiv, ma kienitx kapaċi tgħix ħajja adulta. Imma matul dawn l-aħħar snin, is-soċjetà Maltija, bil-mod il-mod, qed tara rivoluzzjoni f’dan il-ħsieb.
Illum, grazzi għall-ħidma ta’ ħafna entitatijiet u individwi (bħall-ADS) is-soċjetà tagħna qed tibda tagħraf u tagħti valur lill-persuni b’Down Syndrome. Is-segregazzjoni u l-iżolament soċjali tal-passat issa qed jispiċċaw, bir-riżultat li sirna naraw tfal, żgħażagħ u adulti b’Down Syndrome f’kull parti tas-soċjetà tagħna: fl-iskola, fuq il-bank tax-xogħol u f’postijiet pubbliċi. L-istigma negattiva ta’ l-imgħoddi illum qed tinbidel f’diskriminazzjoni pożittiva.
Din il-bidla fiha nnfisha hija frott il-proċess ta’ tagħlim fil-ħajja tagħna lkoll. Hija bidla li qed tiġri wkoll sforz ħidma bla waqfien minn partijiet differenti.
Ħamsa w għoxrien sena ilu, għaqdiet bħall-ADS kienu l-ixprun li għamlu pressjoni biex is-soċjetà Maltija toħloq servizzi ġodda, immirati biex itejjbu l-kwalità tal-ħajja tal-persuni b’diżabilità fil-komunità. Għalhekk, bis-saħħa tal-ġenituri rajna l-introduzzjoni ta’ servizzi varji, bħal:
· Servizzi ta’ Matul il-Jum
· Servizz ta’ Respite
· Servizz ta’ l-Inkontinenza
· Servizz Għajnuniet Speċjali
· Servizz ta’ Trasport Speċjalizzat
· Servizzi dwar l-Informatika
· Servizzi fil-Komunità għal persuni anzjani u persuni b’diżabilità
Irridu niftakru li kienet grazzi għall-pressjoni ta’ gruppi tal-ġenituri li fl-1987 ġiet imwaqqfa l-Kummissjoni Nazzjonali Persuni b’Diżabilità, li rajna l-introduzzjoni tal-politika ta’ inklużjoni fis-sistema edukattiva tagħna u daħal ukoll fis-seħħ l-Att I ta’ l-2000 il-Liġi Opportunitajiet Indaqs (Persuni b’Diżabilità).
Il-progress isir b’riżultat ta’ ħidma flimkien bħala team, team magħmul minn kull min jgħix, jaħdem u għandu interess fil-qasam: persuni b’Down Syndrome, il-ġenituri, il-familjari tagħhom, professjonisti differenti, amministraturi u nies politiċi bħali li jridu jieħdu deċiżjonijiet, xi kultant iebsa ħafna, dwar kif għandhom jitqassmu r-riżorsi.
Illum il-politika ta’ inklużjoni fl-iskejjel bil-mod il-mod qed tagħti r-riżultati pożittivi tagħha. Tant hu hekk li ftit ftit qed naraw numru dejjem jikber ta’ żgħażagħ b’diżabilità li għandhom l-aspettattivi ta’ sħabhom kollha u li għandhom ukoll il-possibilità li jattwawhom. Dawn iż-żgħażagħ qed ifittxu impjieg fis-suq miftuħ. Jew inkella qed iħabbtu l-bieb ta’ l-MCAST biex ikomplu bit-tagħlim u taħriġ tagħhom, qabel ma jibdew ix-xogħol. Sa ftit ilu ma konnix nemmnu li dawn l-affarijiet kienu possibbli.
Din l-istampa ta’ progress tinkludi l-qasam tal-volontarjat u ta’ l-għaqdiet volontarji. F’Malta dejjem kellna x-xorti tajba li l-interess fil-ħidma volontarja qatt ma naqas. Ir-riżultat huwa li Malta u Għawdex għandhom proporzjon għoli ħafna ta’ għaqdiet volontarji fil-qasam tad-diżabilità. Infatti, llum għandna ftit aktar minn 70 għaqda f’dan il-qasam.
Quddiem din il-varjetà kollha wieħed irid ifakkar fl-importanza li ma jkunx hemm duplikazzjoni fix-xogħol u li nużaw ir-riżorsi li għandna bl-għaqal kollu. Dan għaliex, fil-bidu tagħhom, ħafna għaqdiet bdew billi joffru pariri, respite u solljev soċjali għall-membri tagħhom.
Dejjem nisħaq li għandna nkunu konxji tar-riżorsi li għandna. Hemm bżonn li nindirizzaw dan bir-reqqa. L-għar ħaġa li jista’ jkollna huwa t-territorjaliżmu għaliex dan xejn ma jagħmel ħlief jaħli riżorsi prezzjużi u hawn ibatu n-nies li setgħu għamlu użu minnhom li kieku ngħatalhom iċ-ċans.
Iż-żminijiet jinbidlu u llum diversi għaqdiet volontarji qed jidħlu fi sħab mal-Gvern biex huma stess joffru servizzi varji u essenzjali f’oqsma differenti bħal edukazzjoni kontinwa, ħiliet għal ħajja indipendenti (life skills) u mpjiegi.
Dan ifisser li l-għaqdiet qed jerfgħu fuq spallejhom aktar u aktar responsabbilità. Kif jaf kulħadd, aktar responsabbilità tfisser il-bżonn għal aktar trasparenza u accountability f’kull livell. Speċjalment fejn il-proġetti jsiru bi flus pubbliċi.
It-trasparenza hija essenzjali speċjalment f’ambjent ta’ riżorsi skarsi. Għalhekk, meta jingħataw ir-riżorsi rridu naraw li dawn jintużaw bl-aħjar mod possibli; kif għid qabel, ma jkunx hemm duplikazzjoni bla bżonn u fl-aħħar mill-aħħar għandu jingħata rendikont dettaljat dwar l-infiq ta’ flejjes pubbliċi, inkluż fundraising li jsir mill-għaqda għaliex anki dawn huma fondi pubbliċi.
Kif forsi tafu, għadu kemm ġie ppublikat l-Abbozz ta’ Liġi li jirregola l-Għaqdiet Volontarji. Dan l-Abbozz se jibda jiġi diskuss fil-Parlament hekk kif tippermetti l-aġenda tal-Parlament. Meta attwalment tgħaddi l-liġi, din se tkun għodda f’idejn l-għaqdiet volontarji għax se tagħtihom għarfien legali. Minn naħa l-oħra se tigarantixxi ċerta trasparenza fl-operat tagħhom.
L-Assoċjazzjoni Down Syndrome għandha raġun tfakkar dan l-anniversarju, Ġublew tal-Fidda li jimmarka snin ta’ ħidma u snin ta’ progress f’dan il-qasam. Imma rridu niftakru li filwaqt li tajjeb nieqfu u napprezzaw dak li sar fil-passat, importanti li nkomplu malajr bil-ħidma għal futur dejjem aħjar. Għaliex kif jaf kulħadd, jekk ma tieħux ħsiebha l-fidda malajr tittappan u titlef il-preġju tagħha.
Prosit lill-Assoċjazzjoni Down Syndrome u awguri għal ħamsa w għoxrin sena ħidma oħra!
Grazzi.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958