Left arrow Mur Lura

MIXTLA TA’ BORMLA: JIDĦLU FL-AĦĦAR FAŻIJIET IX-XOGĦLIJIET FUQ IT-TRASFORMAZZJONI TA’ PARK RIKREATTIV F’BORMLA

PR1477
Date Icon 27/10/2006

Il-bniedem huwa l-qafas ta’ kull politika li l-Gvern jibbaża t-tmexxija tiegħu.  Iż-żoni ta’ rikreazzjoni huma lok fejn l-individwu u l-familja jistgħu jqattgħu l-ħin liberu f’ambjent nadif.  It-trasformazzjoni tal-Mixtla ta’ Bormla f’żona ta’ rikreazzjoni hu ntenzjonat sabiex jinħoloq bilanċ bejn masġar naturali u park rikreattiv għal familja kollha.  Dan qalu l-Ministru Ninu Zammit meta kien qed iżur l-aħħar fażi tax-xogħlijiet fil-Mixtla ta’ Bormla. 

Ix-xogħlijiet qegħdin fi stadju avvanzat u hu ppjanat li jintemmu qabel l-aħħar ta’ din is-sena.  Fil-fatt minn total ta’ erba’ pjazez hemm tnejn lesti minn kollox, u oħra li hi l-akbar waħda, tinsab fi stadju avvanzat.  Dawn il-pjazez huma kollha magħqudin permezz ta’ passaġġi li ġew ippavimentati b’ċangatura tal-franka.   Minn total ta’ pavimentar ta’ madwar 5,000 metru kwadru diġa` tpoġġa 4,190 metru kwadru li jinkludi ċangatura f’passaġġi u pavimentar fil-pjazez lesti.  Fil-pjazza l-kbira nbniet funtana u qed jinbnew diversi ħnejjiet li se jdawwru l-pjazza kollha.  Il-pavimentar f’din il-pjazza hu tal-granit u se jkopri area ta’ ‘l fuq minn 1,000 metru kwadru, ftit inqas minn area ta’ tomna. 

Il-Ministru kompla jgħid li l-boundary wall li nbena ġdid sabiex idawwar il-mixtla huwa lest u kien jinkludi tpoġġija tal-ġebel b’coping simetriku li jikkumplimenta mal-madwar.  Dan il-ħajt hu twil ‘l fuq minn 1,700 metru.  Fil-parti t’isfel tal-ġnien inbniet sanitary facility li se tiġi miksija minn barra bl-injam sabiex id-dehra tagħha tkun tikkumplimenta mal-masġar. 

F’diversi areas matul il-passaġġi twaħħlu 13-il gazebo li se jservu ta’ dell għal passiġġata pjaċevoli u rilassanti.  Fattur importanti f’dan il-masġar kien li jiżdiedu s-siġar u għaldaqstant se jitħawlu ‘l fuq minn 400 siġra sabiex ikomplu jagħtu nifs lil din iż-żona ta’ rikreazzjoni. 

Il-Ministru għar-Riżorsi u l-Infrastruttura spjega li dan il-proġett juri biċ-ċar il-kapaċitajiet tal-ħaddiema tal-Ministeru peress li fih ġiet użata kull tip ta’ snajja.  Hawnhekk il-Ministru rrefera wkoll għas-sistema ta’ drip irrigation li qed tiġi nstallata u s-sistema ġdida ta’ dawl li tinkludi ‘l fuq minn 100 bollard tad-dawl sabiex idawwlu l-passaġġi u uplighters li se jdawwlu l-ħnejjiet minn taħt.  Barra minhekk qed jiġu mmanifatturati mudelli żgħar ta’ tlett ibliet tal-kottonera li se jitpoġġew fil-pjazez. 

L-għan prinċipali ta’ dan il-proġett hu li l-Kottonera u l-lokalitajiet tal-madwar jkollhom park rikreattiv b’disinn uniku u b’xogħol ta’ l-għola livell. 

Dan l-għan se jintlaħaq għax ladarba l-proġett ikun lest, masġar ta’ ‘l fuq minn 55,000 metru kwadru jew aħjar ‘l fuq minn ħamsin tomna art se jkun jista` jitgawda f’ambjent isbaħ u b’sigurta` aħjar għall-poplu li jiffrekwentah. 

Il-Ministru Ninu Zammit finalment irringrazzja lil kull min ikkopera fit-twettiq ta’ dan il-proġett b’mod partikolari lill-Kunsill Lokali ta’ Bormla li mhux biss ħa sehem attiv fit-twettiq iżda wkoll iddedika somma finanzjarja sabiex ħolma taċ-ċittadini ssir realta`.  Fil-fatt, il-Kunsill se joħroġ Lm15,000 mill-investiment totali fil-proġett li jlaħħaq madwar Lm250,000.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow