Left arrow Mur Lura

“IT-TIXRID TA’ INFORMAZZJONI RIGWARD IL-LIĠIJIET HUWA METODU IEĦOR TA’ KIF TITNAQQAS IL-BUROKRAZIJA” – SEGRETARJU PARLAMENTARI EDWIN VASSALLO

PR1475
Date Icon 27/10/2006

“L-attivita’ kummerċjali f’pajjiżna hija attivita’ ħajja u li kontinwament qiegħda tikber.  Illum kulħadd qiegħed iħares ‘il quddiem lejn sena li fiha l-attivita’ kummerċjali ser tkompli tikber.  Il-Gvern qiegħed jieħu l-miżuri kollha meħtieġa biex jara li f’pajjiżna, l-kummerċ ikompli jiżdied.  Fil-fatt, in-negozji żgħar tagħna, fil-maġġor parti kbira tagħhom, qed jirnexxielhom joħolqu l-impjiegi.  Għaldaqstant, bħala Segretarjat ħsibna li, flimkien mad-Diviżjoni għall-Kummerċ, nippubblikaw ktejjeb li jagħti informazzjoni sempliċi ħafna, iżda dettaljata, rigward il-proċess ta’ applikazzjoni għal liċenza ta’ negozju, u l-proċess kollu biex wieħed jiftaħ in-negozju tiegħu.  Jien nemmen li iżjed ma nagħmlu l-informazzjoni sempliċi u aċċessibbli, iżjed inkunu qegħdin innaqqsu l-burokrazija.”  Is-Segretarju Parlamentari għan-Negozji Żgħar u s-Self Employed, Edwin Vassallo, kien qiegħed jitkellem waqt konferenza ta’ l-aħbarijiet fit-tmiem ta’ diversi żjarat f’negozji żgħar fil-lokalita’ ta’ Ħaż-Żebbuġ. 

“Il-Gvern dejjem ħadem biex jgħin lin-negozji żgħar, li huma s-sinsla ta’ l-ekonomija Maltija.  Fil-ġimgħat li ġejjin, dan il-ktejjeb ser ikun disponibbli mill-Kunsilli Lokali, kif ukoll ser inkunu qegħdin inqassmuh lil studenti ta’ l-aħħar sena fl-istituti ta’ l-MCAST, waqt eżerċizzju li fih, bħala Segretarjat, qegħdin nagħtu l-informazzjoni lil dawn l-istudenti rigward il-probabilta’ li huma jkollhom karriera tagħhom fin-negozju,” kompla s-Segretarju Parlamentari Edwin Vassallo. 

Il-ktejjeb huwa miktub bħala mistoqsija u tweġiba, u jfiehem il-passi kollha li wieħed irid jieħu biex jiftaħ negozju, u jagħti wkoll informazzjoni dettaljata ta’ indirizzi, numri tat-telefon, u contact personsta’ entitajiet li, b’xi mod jew iehor, huma nvoluti fl-attivita’ kummerċjali.  Il-ktejjeb huwa maqsum fi tliet taqsimiet:  Liċenzji tan-Negozju, Entitajiet Oħra li Jirregolaw is-Suq u Għajnuniet għal Intrapriżi żgħar.  Kull taqsima għandha l-informazzjoni meħtieġa dwar aspetti differenti tan-negozju. 

It-taqsima fuq il-liċenzji tan-negozju tispjega x’tip ta’ liċenzja hija mitluba, skond il-ġeneru tan-negozju; liema huma l-entitajiet li joħorġu liċenza tan-negozju; il-kategoriji tal-liċenzi; il-kundizzjonijiet sabiex issir l-attivita’ kummerċjali; u l-formoli tal-liċenzji għan-negozju li joħorġu mit-Trade Licensing Unit (TLU). 

It-tieni taqsima tagħti informazzjoni dettaljata dwar ċertu Dipartimenti u Entitajiet, bħalma huma id-Dipartiment tal-VAT u d-Dipartiment tat-Taxxa Interna, kif ukoll tagħti informazzjoni dwar importazzjoni u esportazzjoni; il-liġi li tirregola prodotti ta’ ikel; is-sigurta tal-prodotti; il-kompetizzjoni ġusta; is-sorveljanza tas-suq; u l-Awtorita’ Maltija għas-Servizzi Finanzjarji (MFSA). 

L-aħħar sezzjoni tagħti informazzjoni ulterjuri li tista’ tkun ta’ bżonn dwar l-istatistika, il-Malta Enterprise u d-Diviżjoni għall-Kummerċ. 

L-Onor. Vassallo qal li “jiena ċert li dan il-ktejjeb ser ikun ta’ siewi ħafna għal dawk kollha li jixtiequ jiftħu n-negozju tagħhom, iżda forsi lanqas biss jafu minn fejn ser jibdew biex ikollhom kollox kif suppost.  Ċert ukoll li l-ktejjeb ser ikun ta’ interess ukoll għal dawk kollha li diġa’ qegħdin fin-negozju, iżda qatt ma ħasbu fuq ħafna aspetti ta’ l-attivita’ kummerċjali.” 

Is-Segretarju Parlamentari Edwin Vassallo, waqt laqgħa ma’ għaqdiet kostitwiti li jirrappreżentaw is-settur kummerċjali, ppreżenta dan il-ktejjeb lir-rappreżentanti ta’ l-għaqdiet li kienu preżenti, u spjegalhom l-għan li kellu s-Segretarjat meta ppubblika dan il-ktejjeb. 

“Jiena nawgura li dan il-ktejjeb ikun utli għal kull min ikollu bżonn xi informazzjoni dwar l-attivita’ kummerċjali, kemm jekk diġa’ għandu n-negozju tiegħu, kif ukoll jekk qed jitħajjar jibda n-negozju tiegħu,” temm jgħid is-Segretarju Parlamentari Edwin Vassallo.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow