“NEGOZJI ŻGĦAR U PERSUNI SELF-EMPLOYED LI JOFFRU SERVIZZI FIL-PORTIJIET MGĦEJJUNA SABIEX ISIRU AKTAR MAGĦRUFA.” – SEGRETARJU PARLAMENTARI EDWIN VASSALLO
“Negozji żgħar li joffru s-servizzi tagħhom f'portijiet sekondarji qed jiġu mgħejjuna sabiex jippromwovu s-servizzi tagħhom fuq portal elettroniku li ser jigi maħluq apposta. Dan il-portal ser jissejjaħ iPORTAll u huwa portal elettroniku f’portijiet magħżula li jipprovdi nformazzjoni għat-turisti u l-passiġġieri. In-negozji ż-żgħar li ser igawdu minn din l-inizjattiva huma operaturi bħalma huma diving schools, sailing clubs, ship chandlers, tour operators, taxis, u oħrajn. Irridu nifmhu li l-operaturi turistiċi tagħna huma żgħar u b’hekk iridu jiġu mgħejjuna, iżda ma rridux ninsew li t-turiżmu tagħna qed iħaddem numru ta' negozji żgħar u self-employed. Permezz ta’ dan il-proġett ser ikollna mod gdid kif nibdew inħarsu lejn l-attivita kummerċjali f'pajjiżna.” Is-Segretarju Parlamentari għan-Negozji Żgħar u s-Self Employed, Edwin Vassallo, kien qiegħed jitkellem dwar il-proġett iPORTS, li ġie mniedi waqt konferenza ta’ l-aħbarijiet.
Il-Kommissjoni Ewropea reċentement approvat il-finanzjament ta’ iPORTS jew Intelligent Port System, proġett indirizzat lejn gżejjer u reġjuni żgħar, għall-kreazzjoni ta’ struttura li fuqha tkun ibbażata sistema għal portijiet intelliġenti. L-għan ta’ dan il-finanzjament huwa l-promozzjoni ta’ żvilupp reġjonali f’żoni tal-mediterran li għadhom mhux qegħdin jagħmlu l-użu sħiħ tal-potenzjal kulturali, storiku u ġeografiku tagħhom. Is-sistema ta’ l-iPORTS ser tindirizza l-problema tas-sigurtà internazzjonali, waqt li tassigura li l-portijiet isiru punt ċentrali ta’ informazzjoni, bbażati fuq in-neċessitajiet kurrenti u futuri ta’ l-operaturi u konsumaturi, u kif ukoll l-iżviluppi teknoloġiċi eżistenti u li mistennija li jeżistu fil-ġejjieni.
“Is-Segretarjat huwa msieħeb f'dan il-progett għaliex jemmen li dan il-proġett ser jgħin mhux biss fil-qasam ta’ l-ambjent tal-portijiet iżda, iktar minn hekk, ser jissarraf fil-ħolqien ta' attivita’ kummerċjali aktar organizzata u akbar minn dik li hemm bħalissa. Huwa għalhekk li bħala Segretarjat, aħna qed ningħaqdu flimkien ma’ l-Awtorità Marittima (MMA) u l-Awtorità tat-Turiżmu (MTA) sabiex b'ħidma flimkien ma’ Dipartimenti u Ministeri oħra jirnexxielna nagħmlu qabza fil-kwalita’,” kompla s-Segretarju Parlamentari Edwin Vassallo.
L-imsieħba l-oħra f’dan il-proġett, li huwa mmexxi mill-Università ta’ l-Eġew fil-Greċja, jirrappreżentaw il-portijiet ta’ Rodi, Catania, Lesvos, Chios, Syros u Beirut. Fuq livell lokali, il-proġett huwa mmexxi mill-Fondazzjoni Temi Zammit (FTZ), organizzazzjoni mingħajr profitt b’esperjenza vasta fl-implimentazzjoni ta’ proġetti lokali, internazzjonali u Ewropej, flimkien ma’ InRoads, konsulenza li tiffoka fuq il-finanzjament Ewropew, li hija wkoll waħda mill-membri fundaturi tal-Fondazzjoni.
B’kollox, dan il-proġett ser jiswa madwar Eur 800,000. Minn dawn Malta ser tkun qed tibbenefika minn EUR 103,500 li 75% minnhom huma iffinanzjati mill-UE. Il-portijiet sekondarji li ser jibbenefikaw minn dan il-proġett huma portijiet bħalma huma ċ-Ċirkewwa, l-Imġarr, Marsalforn, ix-Xlendi u Marsamxett.
L-Onor. Vassallo ħeġġeġ lill-intrapriżi żgħar biex jipparteċipaw f’dan il-proġett, u qal “illum qegħdin nagħmlu sejħa sabiex inħeġġu lill-operaturi tagħna – n-negozji żgħar u s-self employed sabiex jersqu lejna ħalli huma jipparteċipaw f’dan il-proġett. Dan hu il-momentum li hemm bżonn li ngħixu flimkien. Il-Portijiet huma attivita’ kummerċjali fihom infushom. Qabel dawn kienu l-uniku sors ta' kummerċ f'pajjiżna. Illum l-affarijiet inbidlu, żviluppajna ħafna u f’setturi differenti, iżda l-portijiet xorta waħda għad għandhom rwol importanti.”
Is-Segretarju Parlamentari Edwin Vassallo semma wkoll proġetti oħra fis-settur turistiku li pparteċipa fih is-Segretarjat. Hu qal li “diġa kellna okkażjoni naħdmu flimkien ma’ lukandiera żgħar, u tour operators fuq proġett ieħor ta’ l-Unjoni Ewropea taħt l-isem Medpot. Il-Gvern hu dejjem viċin in-Negozji Żgħar u s-self employed għax jilħaq is-setturi kollha ta’ l-attivita’ kummerċjali. Bħala Segretarjat nitkellmu wkoll ma’ l-iskejjel tal-Ingliz (FELTOM), mal-FMHCPE, mal-Gozo Tourism Association, ma’ l-HCIMA, ma’ l-In-Resort Tour Operators, mal-Professional Diving School Association, mal-Water Sports Operators Association u ma’ l-MHRA. Aħna nemmnu li dejjem għandna naħdmu flimkien ma’ rappreżentanti ta’ setturi differenti ta’ attivita’ kummerċjali, u minn dejjem hekk għamilna. Jiena sodisfatt, li f’dan il-kaz ser inkunu qegħdin ngħinu dawk in-negozji żgħar li joperaw f’dan is-settur.”
Għalhekk, is-Segretarjat Parlamentari għan-Negozji Żgħar u s-Self Employed, l-FTZ u l-InRoads qegħdin iħeġġu lill-partijiet interessati li jibbenefikaw mis-servizzi tal-portijiet f’Malta, biex jipparteċipaw f’dan il proġett billi jipprovdu l-esperjenza tagħhom f’dan il-qasam. Il-kontribuzzjoni tagħhom ser isservi biex il-proġett ta’ l-iPORTS ikun dejjem iktar speċifiku għas-settur u l-benefiċċji tal-portijiet magħzula jkunu dejjem ikbar.
Il-Proġett iPORTS ser jibqa’ għaddej sa Diċembru 2007, u wara dan, is-sistema tkun analizzata għal viabilità kummerċjali tagħha.
Dan il-Progett huwa ko-finanzjat mill-Unjoni Ewropea - Inizjattiva Komunitarja, Interreg III (Programm Archimed).
Għall-iktar informazzjoni dwar dan il-proġett ikkuntatjaw lil Ms Daniela Grech fuq IPORTS@ftz.org.mt.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958