IL-MANIFATTURA TA’ L-GĦAMARA TOĦLOQ AKTAR IMPJIEGI U ŻŻID IL-BEJGĦ
“Fuq inizjattiva tas-Segretarjat Parlamentari għan-Negozji Żgħar u s-Self Employed, il-Gvern għen 27 mastrudaxxa u 18-il sid ta’ negozji żgħar fil-qasam ta’ l-inġinerija, jieħdu sehem f’żewg proġetti ffinanzjati mill-Unjoni Ewropea f’Verona l-Italja u fi Plovdiv fil-Bulgaria rispettivament. Permezz ta’ din l-inizjattiva, dawn is-sidien ta’ negozji żgħar u self-employed ipparteċipaw fi proġetti ta’ l-Unjoni Ewropea u qegħdin fuq kollox jitgħallmu minn esperjenzi ta’ operat u realtajiet differenti minn dawk ta’ Malta.” Is-Segretarju Parlamentari għan-Negozji Żgħar u s-Self Employed, Edwin Vassallo, qal dan waqt konferenza ta’ l-aħbarijiet li fiha ngħataw id-dettalji ta’ dawn iż-żewġ proġetti.
Filwaqt li saħaq fuq l-importanza li s-self employed u sidien ta’ negozji żgħar jipparteċipaw f’dawn il-programmi, l-Onor. Edwin Vassallo qal li “irridukom tagħmlu qabża fil-kwalita’ mill-garaxxijiet f’żoni industrijali li intom taħdmu fihom, biex ikollkom aktar kwalita’ fil-produzzjoni, fl-indafa fuq il-post tax-xogħol, fit-taħriġ offrut lill-ħaddiema tagħkom u fil-marketing ta’ dak li timmanifatturaw.”
Is-Segretarju Parlamentari qal ukoll li, kif jixhdu l-esperjenzi li ġew bihom dawn is-sidien ta’ negozji żgħar, barra minn Malta jikkompetu magħna fuq is-servizz, l-effiċjenza, u l-indafa. Tlett oqsma importanti ħafna li hemm bżonn li niffukaw fuqhom sabiex intejjbu l-kwalita’ ta’ l-operat tagħna.
“Il-kompetituri tagħna barra minn Malta qegħdin jiltaqgħu ma’ l-istess sfidi li qed naffaċċjaw aħna f’Malta u qegħdin kontinwament jaddattaw ruħhom għaċ-ċirkostanzi ġodda li qed joperaw fihom. Dan huwa inevitabbli sabiex jibqgħu jaħdmu bi qliegħ. Il-parteċipazzjoni f’dawn il-programm għenet lill-imprendituri Maltin jagħrfu mhux biss li imprendituri barra minn Malta jiltaqgħu ma’ l-istess sfidi, iżda wkoll setgħu jaraw kif dawn l-imprendituri qegħdin jadattaw ix-xogħol tagħhom skond il-bżonnijiet tas-suq. Fil-fatt, mastrudaxxi li żaru negozji zgħar oħra f’Verona, ntebħu li kumpaniji Taljani qegħdin inaqqsu mill-element tax-xoghol tas-sengħa biex iraħħsu l-prezzijiet u jkunu jistgħu jikkompetu. Is-sengħa tiswa l-flus u pajjizi oħra qed jagħzlu li jikkompetu fuq il-mass production u mhux fuq id-dettal ta’ l-oġġett manifatturat. Dawn il-mastrudaxxi setgħu jaraw kif go fabbrika sħiħa ta’ l-għamara jkun hemm mastrudaxxa wieħed tas-sengħa imbagħad numru ta’ machine operators li jħaddmu l-magni u jimmanifatturaw bi kwantita’ l-istess oġġett. Il-kumment tal-mastrudaxxi tagħna kien li permezz ta’ dan it-tibdil, il-mastrudaxxi Maltin jistgħu jikkompetu proprju permezz tas-sengħa tagħhom,” kompla jgħid is-Segretarju Parlamentari Vassallo.
Din l-istess esperjenza kienet riflessa fil-kummenti tal-kumpaniji fl-inġinerija wkoll, fejn kumpaniji Bulgari, minħabba d-daqs tagħhom, jagħżlu li jmorru għal xogħol ta’ produzzjoni bil-massa.
“Dawn in-negozji żgħar Maltin qed jagħrfu li s-suq partikolari Malti u allura l-valur miżjud ta’ prodotti manifatturati hawn, huwa wieħed li jaħseb għal xoghol made-to-measure u xogħol tas-sengħa li jinvolvi dettal. In-negozji Maltin intebħu li hemm spazju għax-xoghol fil-pajjiżi ġodda li għadhom deħlin fl-Unjoni Ewropea bħalma huma l-pajjiżi tal-Lvant ta’ l-Ewropa. Filwaqt li rridu nagħrfu l-limitazzjonijiet ta’ pajjiżna, bħalma huma n-nuqqas ta’ spazju minn fejn joperaw in-negozji tagħna, xorta hemm lok li wieħed jagħraf il-potenzjal ta’ pajjiżna u rridu naffrontaw dawn il-limitazzjonijiet sabiex ngħelbuhom. Irridu nkunu kapaċi nkunu aktar produttivi f’inqas spazju. L-isfida ta’ riforma li għandna f’pajjiżna hi ta’ kif aħna ser inkunu kapaċi nassiguraw li aktar nies jaħdmu fl-istess jew saħansitra fi spazju aktar ristrett, kif ukoll irridu naraw kif nistgħu naħdmu aktar flimkien.”
Is-settur tal-manifattura ta’ l-għamara huwa wieħed li kull ma jmur qiegħed joħloq aktar impjiegi u jżid fil-bejgħ. Is-Segretarju Parlamentari rrefera għal statistika li turi li f’dawn l-aħħar tliet snin, fil-perjodu bejn Jannar u Ġunju, il-bejgħ ta’ dan is-settur, kif ukoll in-numru ta’ l-impjiegi, żdiedu:
LM’000
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958