RESTAWR TA’ “TLETT KNEJJES” F’ĦAL BALZAN: KULLANA TA’ XOGĦLIJIET TA’ RESTAWR MADWAR IL-GŻIRA KOLLHA
Matul is-sena 2006, is-sezzjoni tar-Restawr fi ħdan il-Ministeru għar-Riżorsi u l-Infrastruttura wettqet ħidma ntensiva fuq bosta xogħlijiet ta’ restawr f’diversi bliet u rħula Maltin. Fost dawn ix-xogħlijiet, it-taqsima tar-Restawr waslet biex tlesti r-restawr minn barra tal-binja storika tat-tlett Kappelli magħrufin bħala t-tlett Knejjes fiċ-ċentru ta’ Ħal Balzan. Dan qalu l-Ministru Ninu Zammit meta kien qed iżur l-aħħar fażi tar-restawr.
Dawn il-Kappelli li huma ddedikati lil Sidtna Marija Annunzjata, lil Santu Rokku u lil San Anard, kollha nbnew fis-seklu sittax. Filwaqt li l-ewwel tnejn żammew il-forma oriġinali tagħhom tul is-sekli, il-faċċata tal-kappella dedikata lil San Anard ġiet imdawra bil-bini tal-viċinanzi.
Waqt li kien qed jispjega x-xogħlijiet li qed isiru fuq din il-binja storika, l-Ministu Zammit qal li l-akbar ħsara li sofrew dawn il-kappelli kienet ikkawzata minn intervent ta' restawr li sar xi snin ilu, meta l-ewwel żewġ metri tal-faċċati ngħataw kisja ħoxna ta' siment wara li tbaqqnet il-ġebla.
Dawn l-interventi, apparti li għamlu ħsara lill-ġebel fejn kienu applikati, ikkaġunaw ħsara lill-binja b’mod ġenerali peress li bl-umdita` ġew deterjorati diversi partijiet tal-binja u għaldaqstant kellhom isiru l-interventi neċessarji. Ix-xogħlijiet ikopru t-tindif tal-ġebel minn materjal u depożitu artifiċjali, tiswija tal-ġebel fejn hu neċessarju u t-tikħil tal-fili b’materjal li jixbaħ il-kulur tal-ġebla u li jiflaħ għall-elementi.
Il-Ministru Ninu Zammit kompla jgħid li fattur importanti f’xogħlijiet ta’ restawr fuq knejjes, kappelli u binjiet storiċi simili, huwa l-manutenzjoni u t-tiswija tas-soqfa jew tad-deffun. Għaldaqstant is-saqaf ġie spezzjonat ħalli jiġi eliminat kull dħul ta’ ilma tax-xita, fattur li jagħmel ħsara lill-istruttura minn ġewwa.
Kif sar fl-aħħar snin, ir-riżorsi umani fi ħdan it-Taqsima tar-Restawr qed iwettqu ħidma ntensiva fuq diversi binjiet storiċi mferrxin mal-gżira kollha. Fost dawn il-Ministru rrefera għal xogħlijiet li wasslu biex jiġu konklużi bħal Knisja ta’ San Girgor fiż-Zejtun, l-Knisja ta’ Sarria fil-Floriana, u l-Kappella ta’ San Pawl tal-Qlejja fil-Mosta. Barra minhekk inbdew xogħlijiet fuq il-Kappella ta’ San Mikiel u San Bażilju fl-Imqabba, fil-Knisja l-Qadima tas-Siggiewi, restawr fil-faċċata tal-Biblijoteka Nazzjonali, il-Kappella tas-Salvatur fil-Kalkara u xogħlijiet fil-Palazz tal-President fil-Belt Valletta.
Il-Ministru fakkar li dawn ix-xogħlijiet huma parti minn kullana ta’ xogħlijiet li twettqu matul is-sena preżenti fosthom restawr li sar fuq il-Kappella ta’ San Bert fiż-Zurrieq, il-Kappella ta’ Ceppuna fil-Marsa u diversi xogħlijiet oħra inkluż restawr ta’ statwi pożizzjonati f’ċentri ta’ rħula f’Malta.
Il-Ministru Zammit temm jgħid li x-xogħlijiet fuq dawn it-tlett Kappelli qed isiru bi sħab mal-parroċċa ta’ Ħal Balzan, li ffinanzjat ix-xiri tal-materjal u l-Works Division li ffinanzja x-xogħol fattura li jammonta għal madwar Lm5,000.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958