Left arrow Mur Lura

KONFERENZA STAMPA MILL-ONOR. DR TONIO BORG, VIĊI PRIM MINISTRU U MINISTRU TAL-ĠUSTIZZJA U L-INTERN U MILL-ONOR. DR CARMELO MIFSUD BONNICI, SEGRETARJU PARLAMENTARI, DWAR ID-DĦUL FIS-SEĦĦ TA’ NUMRU TA’ ARTIKOLI ĠODDA FIL-KODIĊI KRIMINALI

PR1332
Date Icon 03/10/2006

Permezz ta’ emendi li daħlu fis-seħħ illum, ser jiġu ntrodotti numru ieħor ta’ emendi għall-Kodiċi Kriminali tagħna.  Dan huwa t-tielet pass li permezz tiegħu l-Att XVI ta’ din is-sena ser jidħol fis-seħħ.  L-emendi prinċipali u li jimmeritaw l-attenzjoni tal-pubbliku huma s-segwenti:-  

A)        IR-REGOLA TAL-KORROBORAZZJONI

Għall-ewwel darba, il-liġi tagħna ser tinbidel u se jkun permess illi l-akkużati f’delitt, ser ikun permess li l-Qorti tikkonsidra x-xiehda ta’ wieħed kontra l-ieħor, u dan meta jkun l-uniku xhud tal-Prosekuzzjoni kontra l-akkużat.  Fil-każijiet ta’ Ġuri, il-Qorti Kriminali għandha tagħti direttiva apposta fuq dan.  

B)        PROĊEDURA ĠDIDA FL-GĦOTI TAL-LIBERTA’ PROVIŻORJA

Mil-lum ’il quddiem, il-proċedura għall-għoti tal-libertà provviżorja meta persuna tkun akkużata b’delitti ta’ natura gravi, bħal dawk fejn hemm massimu ta’ priġunerija ta’ disa’ snin jew dak li jkun, ikun diġà riċediv, il-libertà proviżorja tingħata b’mekkaniżmu legali iktar iebes.  Dan ifisser illi l-libertà proviżorja mil-lum ’il quddiem tingħata biss mill-Qorti, fil-miftuħ, u wara li tkun ġiet notifikata minn qabel lill-Prosekuzzjoni.  Mhux biss, iżda d-deċiżjoni trid tiġi notifikata fi żmien ġurnata lill-Avukat Ġenerali, li jkollu d-dritt li jappella meta ma jaqbilx magħha. 

Mhux biss dan, imma mil-lum ’il quddiem, kull darba li xi ħadd jikser il-kundizzjonijiet tal-libertà proviżorja, dan ser jibda jitqies bħala reat u dik il-persuna tiġi akkużata mhux biss tad-delitti li kienet wettqet iżda wkoll bil-ksur tal-libertà proviżorja.

 Ċ) 1.   ĦLAS TAD-DANNI ĊIVILI

Mil-lum ’il quddiem, f’kull kawża kriminali li ssir fejn il-persuna akkużata tinstab ħatja, fl-istess sentenza din tista’ tiġi kkundannata tħallas id-dannu lill-vittma tar-reat.  Dan ser ifisser:- 

i)dritt ieħor lill-vittma tar-reat;
ii)tnaqqis fil-proċeduri fil-Qorti għax tiġi ffrankata kawża ċivili; u
iii)li ser jiġu ffrankati l-ħin u l-ispejjeż li huma nvoluti f’kawżi simili.

2.         KUNDANNA TA’ SPEJJEŻ

Mil-lum ’il quddiem ukoll, fil-kawżi illi hemm l-akkuża ta’ delitt punibbli bi priġunerija, l-akkużat jista’ jiġi kundannat iħallas l-ispejjeż tal-kawża.  Jiġifieri, minn issa ’l quddiem, il-persuna li tinstab ħatja ser tibda tħallas lura parti mill-flus li l-Istat qiegħed jonfoq fuqhom.

3.         PROĊEDURA IKTAR SEMPLIĊI META JKUN HEMM SERQ TA’ PROPRJETÀ

Mil-lum ’il quddiem ukoll, il-proċedura li permezz tagħha persuna li tkun sfat misruqa tista’ tieħu dawn l-oġġetti lura, ser tinbidel.  Flok il-Qorti tirrilaxxa l-oġġetti meta ma jkunx hemm l-oġġezzjoni tal-Prosekuzzjoni u tad-Difiża, mil-lum ’il quddiem il-Qorti hija awtorizzata li tagħmel tali rilaxx mingħajr il-bżonn ta’ dan il-kunsens.  Dan ifisser li filwaqt li jittieħdu l-proċeduri neċessarji biex jibqa’ ppriservat u xiehda għall-iskop tal-kawża, min ikun il-vittma tar-reat ma jbatix ukoll li jrid iħalli l-oġġett mhux użat fil-Qorti. 

4.         KUMPENS LILL-VITTMI TAR-REAT

Mil-lum ’il quddiem, il-Ministru tal-Ġustizzja huwa awtorizzat li joħroġ, permezz ta’ avviż legali, skema sabiex dawk li jkunu spiċċaw vittmi ta’ reat u l-persuna li wettaq id-delitt m’għandhiex il-mezzi li tħallas tali kumpens, l-Istat iħallas parti minnhom. 

Din l-iskema ser tibda fuq bażi limitata u għal dawk li huma delitti serji u gravi.  Maż-żmien jiġu estiżi għal diversi reati oħrajn. 

5.         MEZZI ĠODDA FIL-KAWŻI TA’ L-ISPOLL

Mil-lum ’il quddiem, il-Qorti Kriminali illi jkollha quddiemha kawża ta’ xi ħadd li ħa l-liġi b’idejh, jiġifieri xi ħadd li jieħu xi ħaġa mingħand ħaddieħor għax jaħseb li għandu dritt għaliha, ser tkun tista’ tikkundanna lill-persuna li tinstab ħatja li terġa’ trodd kollox lura kif kienet qabel il-kawża.  Mhux biss, imma għall-ewwel darba qiegħed ukoll jingħata d-dritt illi x-xiehda li tinġabar fil-kawża kriminali tista’ tiġi esebita fil-kawża ċivili bi dritt, mingħajr il-bżonn jew il-kunsens tal-parti l-oħra. 

6.         INTERVENT FIL-PROĊESS VERBAL 

Mil-lum ’il quddiem, il-proċedura fil-Proċessi Verbali ser tinbidel.  Meta jgħaddu s-sittin (60) ġurnata li fihom Maġistrat għandu, skond il-liġi, jagħlaq il-Proċess Verbal u għal xi raġuni dan ma jkunx sar, allura kull min għandu interess fil-Proċess Verbal – speċjalment jekk ikun il-vittma – bħal per eżempju meta xi ħadd jisirqulu l-vettura tiegħu u jaħarquhielu, dan ikollu d-dritt illi jintervjeni u jieħu sehem fil-Proċess Verbal.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow