INAWGURATA ‘WHERE’S EVERYBODY BROADCAST ACADEMY ’
Fil-lukanda Vivaldi, San Ġiljan tnediet il- ‘Where’s Everybody Broadcast Academy’ bl-iskop li toffri diversi korsijiet li jolqtu aspetti varji tad-dinja tax-xandir. Dan hu proġett bi sħab bejn ‘Ideas Alive Ltd’ u ‘Where’s Everybody’.
Il-kumpannija ‘Ideas Alive Ltd’ twaqqfet biex toffri servizzi ta’ żvilupp fil-management, taħriġ, profiling u materji relatati ma’ taħriġ u żvilupp ta’ persuni fl-ambitu tax-xogħol. Riċentament ‘Ideas Alive Ltd’ għamlet ftehim mal-kumpannija ‘Where’s Everybody’ biex flimkien jgħaqqdu r-riżorsi tagħhom u joffru taħriġ f’ħiliet marbuta max-xandir permezz ta’ ‘Where’s Everybody Broadcast Academy’, kif ukoll taħriġ f’management permezz ta’ l-‘Institute of Professional Development’.
Il-Ministru għat-Turiżmu u Kultura Francis Zammit Dimech, meta kien qed jitkellem f’din l-okkazjoni, qal li Michael Fenech li waqqaf il-kumpannija ‘Ideas Alive Ltd’ għandu esperjenza twila u prattika fil-ħiliet meħtieġa għal tmexxija effettiva. Hu qal li min-naħa l-oħra, ‘WE’ kisbet esperjenza kbira u reputazzjoni eċċellenti għall-produzzjoni ta’ programmi televiżivi u produzzjonijiet awdjoviżivi ta’ kwalita’ għolja u li fl-istess ħin jikkomunikaw sew ma’ kull min ikun qed isegwi.
Il-Ministru Zammit Dimech qal li ż-żewġ kumpanniji ħassu li kien wasal il-waqt li l-għerf u l-esperjenza li akkwistaw jgħadduhom lil min jixtieq jibda karriera f’dan is-settur billi jorganizzaw diversi korsijiet li jolqtu aspetti varji tad-dinja tax-xandir.
Il-Ministru għat-Turiżmu u Kultura qal li bħala Ministru responsabbli mill-politika dwar ix-xandir kien jilqa’ bil-ferħ kull inizjattiva li tittieħed bl-iskop li jitjieb il-kontenut u jogħla l-livell tax-xandir fil-pajjiż. Hu qal li dan il-Ministeru kien diġa’ qed jagħmlu permezz tal-fondi li l-Gvern jalloka lill-Public Broadcasting Services taħt l-Extended Public Service Obligation (EPSO).
Il-Ministru Zammit Dimech qal li kien jemmen li kemm ‘Ideas Alive Ltd’ kif ukoll ‘Where’s Everybody’ kellhom ħafna x’joffru fil-qasam tax-xandir. Hu qal li fi żmien meta x-xandir hu liberalizzat u f’Malta hawn erba’ stazzjonijiet lokali tat-televiżjoni u numru rekord ta’ stazzjonijiet tar-radju t-taħriġ kien indispensabbli għaliex irridu li jkollna nies kwalifikati f’qasam hekk importanti.
Il-Ministru għat-Turiżmu u Kultura awgura lil ‘Where’s Everybody Broadcast Academy’ kull suċċess.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958