Left arrow Mur Lura

JITLESTA L-EWWEL PROĠETT TA’ TOROQ KO-FINANZJAT MILL -UNJONI EWROPEA

PR1312
Date Icon 29/09/2006

Vjal l-Avjazzjoni Ċivili u r-roundabout ta’ ħdejn l-Ajruport Internazzjonali ta’ Malta reġgħu infetħu għat-traffiku fi tmiem il-ġimgħa li għaddiet hekk kif tlesta x-xogħol infrastrutturali prinċipali ta’ dan il-proġett.  

85% ta’ l-ispiża totali biex inbdiet mill-ġdid Vjal l-Avjazzjoni Ċivili kienet finanzjata mill-Fond ta’ Koeżjoni u dan huwa l-ewwel proġett ta’ toroq finanzjat mill-Unjoni Ewropea li tlesta mis-sitt proġetti li għadhom għaddejjin. It-triq tifforma parti mit- TEN -T network ta’ pajjiżna u hija ħolqa importanti li tgħaqqad it-toroq li nbew mill-ġdid fl-aħħar snin bejn il-Gudja u Ħal Far u t-toroq li nbnew is-sena l-oħra fil-punent ta’ Malta bil-fondi tal-Ħames Protokoll bejn Malta u l-Italja.  

Dan ifisser li bit-tlestija ta’ din it-triq u l-aħħar fażi ta’ Triq Ħal Far li wkoll qed tinbena mill-ġdid b’għajnuna mill-Unjoni Ewropea, il-poplu Malti ser ikun jista’ jgawdi rotta kontinwa ta’ 23.8 kilometri toroq ta’ l-aqwa kwalità li jwassluk minn Birżebbuġa sa’ l-Imġarr u l-Mosta.  

It-triq u l-junction inbnew mill-ġdid skond l-istandard Class 1 ta’ l-Awtorità dwar it-Trasport. Dan ifisser li t-triq ser tkun tiflaħ iġġorr mal-10 miljun vettura tqila tul id-design life tagħha ta’ 25 sena. Ix-xogħol kienu jinkludi wkoll it-tqegħid ta’ żewg mains ta’ l-ilma ġodda b’tul ta’ 1.2 kilometri taħt il-bankini kif ukoll iċċaqalqu 6 cables tal-high tension għal ġo service culvert li nbena taħt ir-roundabout ta’ l-ajruport. It-triq giet ukoll mgħammra b’kanali għall-ilma tax-xita. B’kollox il-proġett huwa maħsub li ser jiġi jqum madwar €1.5 miljuni.  

Id-diżinn tat-triq ittejjeb sabiex din tkun iktar effiċenti u toffri aktar sigurtà għal min jużaha. It-triq twessgħet ftit biex jinbnew bankini ġodda. Tkabbret ukoll ir-roundabout biex din tkun tiflaħ aktar traffiku, filwaqt li ġew inklużi żewġ staggered-left-lanes għat-traffiku li jkun dirett lejn l-ajruport.  

Ix-xogħol fuq dan il-proġett ħa ftit inqas minn sitt xhur biex tlesta. Ta’ min isemmi li d-dewmien fl-aħħar fażi tax-xogħlijiet fuq ir-roundabout junction ta’ l-ajruport kien ikkawżat minn sejba ta’ Katakombi Paleo-Kristjani proprju f’xifer ir-roundabout il-qadima. Għalkemm din is-sejba ma waqqfitx ix-xogħlijiet, kien hemm bżonn isir tibdil sostanzjali fid-diżinn tar-roundabout innifisha. Dan wassal biex ix-xogħol ma setax jitkompla b’ritmu mgħaġġel sakemm id-diżinji l-ġodda ma ġewx approvati. Il-Katakombi issa ġew inklużi fid-diżinji u anke inbidlu l-materjali li qed jintużaw u l-landscaping ippjanat għar-roundabout sabiex dawn l-assi storiċi jiġu protetti mill-ilma.  

Intant l-aħħar xogħlijiet fuq dan il-proġett ser ikunu qed jitlestew fil-jiem li ġejjin bit-tlestija tal-landscaping fit-triq u r-roundabout u d-dwal li hemm matulhom.  

Għalkemm tħaddmu sistemi ta’ treġija tat-traffiku matul il-proġett, ix-xogħlijiet fuq ir-roundabout ta’ l-Airport ikkawżaw inkonvenjent sostanzjali għat-traffiku li normalment jgħaddi minn dawn l-inħawi, jiġifieri mal-35,000 vettura kuljum. Dan minħabba li ma jeżistux rotot alternattivi f’din iż-żona filwaqt li din ir-roundabout hija l-uniku aċċess li jeżisti mit-tramuntana ta’ Malta lejn Ħal Kirkop, Ħal Safi, iż-Żurrieq, l-Imqabba u l-Qrendi. Dan ifisser li din ir-roundabout kellha tibqa’ tintuża matul it-terminu tal-proġett kollu u ma setgħetx tingħalaq għat-traffiku.  

Il-Ministeru għall-Iżvilupp Urban u Toroq u l-Awtorità dwar it-Trasport jiskużaw ruħhom għall-inkonvenjenti li kkawżaw dawn ix-xogħlijiet, filwaqt li jirringrazzjaw lill-pubbliku għall-paċenzja li wera waqt li kienet qed tittejjeb din it-triq kruċjali għal pajjiżna. Ta’ min jirringrazzja wkoll lil dawk l-entitajiet kollha li għenu sabiex dan il-proġett seta’ jitlesta fl-iqsar żmien possibbli - fosthom il-Forzi Armati ta’ Malta, l-Air Malta, l-Ajruport Internazzjonali ta’ Malta, is-Sovrintendenza għall-Wirt Kulturali u s-sezzjoni tat-traffiku tal-Pulizija.  

Il-ħidma sfiqa tal-Gvern biex jittejbu t-toroq arterjali ta’ dawn l-inħawi ser tkompla fix-xhur li ġejjin bi proġett ieħor li ser jara t-twessiegħ u l-bini mill-ġdid ta’ Triq il-Kunsill ta’ l-Ewropa f’Ħal Luqa bejn ir-roundaboutjunction li tagħti lejn Vjal l-Avjazzjoni Ċivili u r-roundabout junction li tgħaqqad ma’ Triq Garibaldi. Ix-xogħol fuq it-tender u d-diżinji ta’ dan il-proġett jinsabu fi stadju avvanzat u ser jiġu ppubblikati fil-ġimgħat li ġejjin.  

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow