L-EDUKAZZJONI U T-TAĦRIĠ VOKAZZJONALI
“Is-settur edukattiv jinħtieġ idaħħal aktar esperjenzi prattiċi li jibbilanċjaw it-tagħlim akkademiku sa minn età żgħira”. Dan qalu l-Ministru ta’ l-Edukazzjoni Louis Galea waqt il-ftuħ ta’ seminar organizzat mill-Foundation for Human Resources Development (FHRD) dwar is-settur ta’ l-edukazzjoni vokazzjonali u xi jfisser dan għal min jimpjega. Louis Galea qal li bit-twaqqif ta’ l-MCAST, l-ETC, iċ-Ċentru tar-Restawr u l-ITS flimkien ma’ inizjattivi oħra fl-iskejjel bħal ma kienu d-dħul tas-suġġett tat-Technology Education fis-sekondarji, illum l-edukazzjoni vokazzjonali tinsab fiċ-ċentru tas-sistema edukattiva Maltija.
Louis Galea tkellem dwar l-importanza tas-settur vokazzjonali biex il-pajjiż u l-ekonomija jimxu l-quddiem. Hu spjega kif is-setturi produttivi tal-pajjiż żviluppaw minn xogħol ibbażat fuq ix-xogħol manwali u irħis, għal setturi bħal dawk tal-Farmaċewtika, ta’ l-Inġinerija u tat-Tiswija ta’ l-Ajruplani u tat-Teknoloġija ta’ l-Informatika. “L-inċentiv għal min irid jinvesti f’pajjiżna ma baqax il-prezz irħis tax-xoghol izda l-effiċjenza tal-ħaddiema imħarrġa u li kapaċi jitħarrġu.”
Louis Galea ikkwota figuri tas-CEDEFOP (Agenzija tal-Unjoni Ewropeja għall-Iżvilupp ta’ l-Edukazzjoni Vokazzjonali) fejn huwa pproġettat li sas-sena 2010 – 50% tal-impjiegi jkunu marbuta ma’ taħriġ avvanzat u ta’ livell ogħli, 40% ma’ taħriġ li jkun ġej minn edukazzjoni post-sekondarja, filwaqt li bejn 10 u 15% biss ta’ l-impjiegi jkunu ta’ natura li t-taħriġ ikun ta’ livell bażiku. “Dan juri kemm hu importanti li lkoll ninvestu fl-edukazzjoni u t-taħriġ għax hekk biss il-poplu tagħna jkun jista jgawdi mill-iżvilupp li jseħħ fir-reġjun. Kull ċittadin Malti għandu bżonn xi taħriġ jew ieħor. Ħadd ma’ għandu jaħseb li x-xogħol fil-futur ma’ jkunx marbut ma’ taħriġ speċjalizzat. Kull ċittadin għandu bżonn kompetenzi bażiċi li permezz tagħhom jista’ jsib impjieg, jista’ jibdlu jekk hemm bżonn u jista’ jkun kompettitiv biżżejjed biex ma jitilfux. Illum ħadd ma jista jippretendi li jgħix il-ħajja tiegħu mingħajr ma jagħmel xi forma ta’ taħriġ, anke dawk li għandhom l-aktar livell bażiku ta’ tagħlim jew taħriġ għandhom ikunu lesti jagħmlu l-parti tagħhom għax inkella jaqgħu lura huma u jaqa’ lura l-pajjiż”.
Il-Ministru Galea tkellem ukoll dwar l-Unions u min iħaddem u qal li anke dawn iridu jkunu aktar sensittivi għall-bżonn tat-taħriġ tal-ħaddiema. Hu qal li l-parti l-kbira ta’ min iħaddem mhux qed jgħaraf il-bżonn li jħarreġ lill-ħaddiema tiegħu u b’hekk mhux qed iħarsu biżżejjed fit-tul għan-negozju tagħhom. F’dan is-sens il-Unions għandhom rwol importanti wkoll biex jibdlu din il-mentalità fost min iħaddem u anke fost il-ħaddiema li wkoll iridu jifhmu li t-taħriġ hu investiment fil-futur tagħhom daqs kemm jew aktar milli tista’ tkun żieda fil-paga. Hu appella wkoll lil min iħaddem biex jipprovdu aktar opportunitajiet ta’ apprendistati li huma mod tajjeb ħafna kif l-istudenti Maltin joħorġu mill-istituzzjonijiet edukattivi aktar imħarrġa tajjeb u lesti għad-dinja tax-xogħol.
Louis Galea qal fi ftit jiem oħra se jitpoġġa għall-konsultazzjoni abbozz ta’ Qafas Nazzjonali ta’ Kwalifiki. “Ninsab sodisfatt li l-Kunsill Malti għall-Kwalifiki wasal għal qbil ta’ dan il-Qafas Nazzjonali tal-Kwalifiki li jinkorpora fih il-proċess kollu ta’ edukazzjoni mil-livell obbligatorju sa dak ta’ edukazzjoni Ogħla. Fil-qofol ta’ dan il-process hemm l-edukazzjoni vokazzjonali li tieħu il-post xieraq tagħha fis-sistema edukattiva tagħna. Irridu li l-kwalifiki mill-istituzzjonijiet ta’ edukazzjoni vokazzjonali jkollhom valur miżjud u li tinħoloq parità fl-istima (parity of esteem) bejn l-edukazzjoni vokazzjonali u dik universitarja.”
Il-Qafas ta’ Kwalifiki hu maħsub biex :
a) l-kwalifiki jkun ta’ kwalita` u jissarfu f’mobilta’ interna u esterna;
b) aktar nies jitħajjru jitgħallmu u jitħarrġu;
c) aktar nies ikollhom il-kompetenzi bażiċi fil-lingwa materna, fl-lingwa barranija [Ingliz]; fil-matematika; fix-xjenza u t-teknologija; fl-IT; fl-imprenditorija; fil-kultura nazzjonali u internazzjonali; fil-mod ta’ kif wiehed jitghallem kif ukoll fir-responsabbiltajiet taghna bhala cittadini ta’ pajjizna u tad-dinja.
Il-Ministru qal li l-Gvern irid li kull ċittadin Malti jakkwista mill-ġid li t-tagħlim jipprovdi u dan jista jsir billi l-edukazzjoni vokazzjonali jkollha:
} miri marbuta ma’ l-iżvilupp politiku, soċjali, industrijali u ekonomiku Malti;
} kwalifiki li huma marbuta mall-kuntest lokali u internazzjonali u akkreditati minn awtoritajiet u kompetenzi lokali u internazzjonali;
} strutturi ta’ tagħlim li jippreparaw l-ġenerazzjonijiet li telgħin għal dinja ta’ xogħol ibbażata fuq kompettitivita’, imprenditorija u etika ta’ responsabilta’ u bżulija;
} tahrig kontinwu għal min jgħallem u min jipprovdi l-appoġġ amministrattiv;
} strutturi biex minn jħaddem jsib postu fiċ-ċentru tal-proċess kollu ta’ tagħlim vokazzjonali.
Louis Galea temm jgħid li l-edukazzjoni vokazzjonali f’pajjiżna għamlet passi ta’ ġgant f’dawn l-aħħar snin u dan b’riżultat tal-politika tal-Gvern favur dan il-qasam u ta’ l-investiment qawwi li sar u qed isir. Anke l-industrija u s-setturi ekonomiċi ta’ pajjiżna għaddew minn bidliet kbar u żviluppi pożittivi ħafna. “Nemmen li it-tnejn flimkien jistgħu jagħtu l-pajjiżna dik il-qabża ta’ kwalita’ fil-mod kif nitgħallmu u naħdmu. Is-suċċess politiku ta’pajjiżna se jkun jiddependi ħafna minn din is-sinerġija.”
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958