ESPERJENZA TAL-KAPITALI PERMEZZ TAL-‘VALLETTA AUDIO GUIDE CITY TOUR’
“Exalta Projects” b’ħidma mill-qrib ma’ Heritage Malta u l-Awtorita’ tat-Turiżmu ta’ Malta għadhom kif ippubblikaw ‘my Guide’ City Tour audio tour guide tal-kapitali ta’ pajjiżna.
Din il-gwida tal-belt hi bi tmien lingwi u tagħti lill-viżitatur l-opportunita’ li jdur mat-toroq tal-belt Valletta waħdu fejn ikun jista’ jiskopri l-istorja u t-teżori kollha moħbija ta’ din il-belt unika.
Il-Ministru għat-Turiżmu u Kultura Francis Zammit Dimech, li nieda ‘my Guide’ City Tour waqt preżentazzjoni fil-Mużew Nazzjonali ta’ l-Arkeoloġija fil-belt Valletta, kellu kliem ta’ tifħir għal din l-inizjattiva li ser tkompli tgħolli l-livell tal-prodott Malti u ser tgħin lit-turist biex ikabbar l-esperjenza tiegħu dwar pajjiżna.
Il-Ministru Zammit Dimech qal li l-attivitajiet li qed ikunu organizzati fil-belt Valletta qed igħinu biex il-ħajja fil-kapitali ta’ pajjiżna ma tieqafx ma nżul ix-xemx. Hu qal li wara l-esperjenza sabiħa tal-Festival Kulturali tas-Sajf li organizza l-Kunsill Malti għall-Arti u l-Kultura, f’Ottubru ser jiġi organizzat mill-istess Kunsill “Lejl Imdawwal”, lejl sħiħ ta’ attivitajiet kulturali li għandu joħroġ is-sbuħija tal-belt anke bil-lejl.
Il-Ministru għat-Turiżmu u Kultura qal li fil-belt Valletta qed ikunu organizzati diversi attivitajiet tal-massa sew mill-Awtorita’ tat-Turiżmu ta’ Malta, kif ukoll mill-Kunsill Malti għall-Kultura u l-Arti kif ukoll mis-settur privat. Hu qal li kemm it-Teatru Manoel kif ukoll iċ-Ċentru tal-Konferenzi tal-Mediterran u l-Kavallier ta’ San Ġakbu qed jikkontribwixxu bil-kbir biex il-ħajja fil-belt tissokta meta jidlam.
Il-Ministru Zammit Dimech qal li dan kollu wassal biex fetħu fil-belt aktar ristoranti u wine bars u biex fix-Xatt tal-Belt, fil-Valletta Waterfront, illum hemm kumpless ta’ ristoranti, bars u ħwienet oħra li joffru servizz lill-Maltin u lit-turisti f’ambjent mill-aktar sabiħ.
Il-Ministru għat-Turiżmu u Kultura qal li permezz ta’ ‘my Guide’ City Tour it-turist jista’ issa jesperjenza r-rikezzi li għandna fil-belt Valletta, belt barokka li nbniet mill-Kavallieri ta’ San Ġwann u li llum hi meqjusa mill-UNESCO bħala wirt dinji ta’ l-umanita’.
Il-Ministru Zammit Dimech qal li fi żmien meta qed isir minn kollox biex il-viżitatur f’pajjiżna nagħtuh esperjenza ta’ dak li noffru, inizjattivi bħal din li qed joffru “Exalta Projects” huma ta’ min jinkorraġihom.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958