PROGETT TA’ LM3 MILJUNI FL-ISKOLA TAL-VERDALA F’BORMLA
Beda’ x-xogħol fuq il-bini mill-ġdid ta’ l-iskola sekondarja tas-subien fil-Kulleġġ tal-Kottonera b’investiment ta’ Lm3 miljun. S’issa s-sit kien użat mill-iskola Giuzeppi Despott Junior Lyceum.
Il-Ministru Louis Galea illum għamel żjara biex jara l-bidu tax-xogħol waqt li beda jitwaqqa` l-blokk biex minfloku jitla` l-bini l-ġdid. Waqt li tkun qed tinbena mill-ġdid din l-iskola, l-istudenti tal-Junior Lyceum ġew akkomodati fl-iskola sekondarja Adelaide Cini l-Ħamrun li għadha kif ġiet modernizzata.
Minbarra l-bini l-ġdid, ser jiġu konservati u restawrati erba’ blokkijiet mill-perjodu kolonjali li fihom insibu s-sala ta’ l-iskola b’arkitettura sabiħa tal-perjodu u storja rikka sa minn żmien il-Kavallieri. Parti mill-bini li ser jiġi restawrat ser iservi bħala laboratorji u bini amministrattiv. Bini ieħor li kien ittella’ aktar riċenti ser jitwaqqa’ u minfloku ser tinbena l-iskola l-ġdida bi klassijiet, librerija u laboratorji tat-teknoloġija. Il-ground kbir ser jibqa` fiċ-ċentru, iżda ser ikun immodernizzat u se jkun ta’ standard għoli, għar-rikreazzjoni ta’ l-istudenti.
Il-bini l-ġdid li ser jittella’ ser ikun fih 3 sulari fuq tomna u nofs art. Fih ser ikun hemm 45 klassi u kmamar b’tagħmir ieħor skond il-bżonnijiet. Il-parti li ser tkun tisporġi ‘l barra mill-bini prinċipali ser tintuża għal-laboratorji. Ser ikun hemm 26 laboratorju tat-teknoloġija, kompjuter u xjenza, mibnija fuq tomna u nofs oħra b’għoli ta’ żewġ sulari.
Diġa’ beda jsir xogħol ta’ restawr fuq il-blokk ta’ l-amministrazzjoni li ġie ikkummissjonat lit-Taqsima Teknika tad-Diviżjoni ta’ l-Edukazzjoni. Bħala parti mill-proġett ser isir ukoll landscaping tal-forti, u li jinkludi bini ta’ ground tal-futbol b’turf artifiċjali, it-tqegħid mill-ġdid ta’ l-art tal-ground rikreazzjonali, post għall-parkeġġ u pont li jgħaqqad l-iskola mal-Kumpless Sportiv tal-Kottonera biex ikunu jistgħu jintużaw il-faċilitajiet kollha sportivi mingħajr ma jiġi duplikat xogħol.
Il-Ministru Louis Galea qal li l-pjan u l-istrateġija li qed iwettaq il-Gvern fl-edukazzjoni huma ta’ fejda kbira għal ulied il-poplu Malti u Għawdxi. "Filwaqt li diġà tejjibna ħafna r-riżultati f’kull livell, ninsabu determinati li nkomplu ntejjbu l-kwalità ta’ l-edukazzjoni biex uliedna jkollhom kull ċans li jirnexxu lkoll."
Il-Ministru Galea qal li qatt ma sar investiment fit-titjib ta’ l-ambjent ta’ l-iskejjel tal-Gvern daqs kemm sar f’dawn l-aħħar snin. Iżda l-Gvern qed jinvesti wkoll biex is-sistemi u l-għodda tat-tagħlim ikomplu jitjiebu biex aktar u aktar studenti jingħataw l-appoġġ meħtieġ ħalli jirnexxu fl-iskola.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958