HATRA TA’ MĦALLFIN U MAĠISTRAT ĠODDA
Il-Prim Ministru l-Onor Lawrence Gonzi, illum ħabbar li l-Gvern innomina żewġ imħallfin u maġistrat ġodda. Permezz ta’ din in-nomina, għall-ewwel darba fl-istorja tal-Qrati f’Maltin, se jkun hemm imħallfin nisa fuq il-bank tal-ġudikatura. L-Imħallfin ġodda huma l-Maġistrat Abigail Lofaro u Dr Anna Felice, fil-waqt li Dr Audrey Demicoli giet nominata bħala maġistrat.
Il-Maġistrat Abigail Lofaro li għandha 45 sena twieldet Bormla. Hija rċeviet l-edukazzjoni tagħha fl-Iskola tal-Gvern, Bormla, fil-Kunvent tas-Sacred Heart, fil-Kulleġġ De La Salle u fl-Universita’ ta’ Malta. Dr Lofaro ggradwat bħala avukat fl-1984, u ħadmet bħala konsulenta legali fid-Dipartiment tad-Djar fejn anki okkupat il-kariga ta’ Aġent Kap tad-Dipartiment. Hija kienet ukoll membru tal-Kummissjoni għar-Riforma tal-Liġijiet. Fl-2001, il-Maġistrat Lofaro ottjeniet il-grad ta’ Magister Jurisfid-Dritt Ewropew u Komparattiv mill-Universita’ ta’ Malta. Hija ġiet maħtura Maġistrat fil-Qrati Maltin fid-9 ta’ Jannar, 1996.
Il-Maġistrat Lofaro hija miżżewġa lil Dr Pierre Lofaro LLD, u għandhom tifla.
Dr Anna Felice għandha 49 sena. Hija iggradwat bħala avukat fl-1981 u okkupat diversi karigi li għandhom x’jaqsmu mal-avvanz tal-mara fis-soċjeta’. Serviet bħala membru tal-Kummissjoni għall-Avvanz tal-Mara għal snin twal, kif ukoll bħala membru ta’ grupp li ħejja r-riforma tal-1993 għal-liġi tal-familja. Dr Felice kienet ukoll konsulenta mal-Gvern dwar il-Qorti tal-Familja, u Chairperson għal xi żmien taċ-Ċentru Malti tal-Medjazzjoni. Hija wkoll kienet membru tar-Response Team dwar Investigazzjoni ta’ Abbuż Sesswali tal-Kurja ta’ Malta. Dr Felice kienet ukoll membru tal-Kummissjoni Elettorali.
Dr Felice hija miżżewġa lill-kardjologu Dr Herbert Felice, u għandhom żewġt itfal.
Dr Audrey Demicoli, li għandha 37 sena, iggradwat bħala avukat fl-1993. Għall-ħames snin, Dr Demicoli serviet bħala Chairperson tat-Tribunal għat-Tabiet Żgħar u bħalissa qed tokkupa l-kariga ta’ Chairperson tat-Tribunal Industrijali. Dr Demicoli qed isservi wkoll bhala Assitent Gudizzjarju, arbitru skond l-Att dwar is-Sigurta’ Soċjali u Kummissarju ta’ Tribunal Lokali.
Dr Demicoli hija miżżewġa lil Dr Andre’ Zerafa LLD u għandhom tifla.
Iċ-ċerimonja tal-għoti tal-ġurament tal-ħatra tal-Imħallfin il-ġodda ser issir għada t-Tlieta fis-6.00 pm, fil-waqt li l-ġurament tal-Maġistrat il-ġdid ser jittieħed aktar tard.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958