Left arrow Go Back

FAŻI OĦRA TA’ RESTAWR TAT-TEATRU MANOEL BL-GĦAJNUNA TAL-MIA

PR1180
Date Icon 24/08/2006

Il-Ministru għat-Turiżmu u Kultura Francis Zammit Dimech żar ix-xogħol ta’ restawr li qed jitwettaq bħalissa fit-Teatru Manoel. Ix-xogħol ta’ restawr fit-Teatru Manoel hu proċess kontinwu li qed iwassal biex dan it-teatru jingħata s-sbuħija oriġinali tiegħu. 

Il-Gvern jalloka kull sena ammonti konsiderevoli ta’ flus biex isebbaħ dan it-teatru u biex itejjeb il-faċilitajiet li fih. F’dawn l-aħħar snin il-Gvern alloka flus għall-bini ta’ tlett studio apartments, għall-wardrobe, għal xogħlijiet f’Casa Bonici, għall-manutenzjoni tas-saqaf tal-bitħa, għall-bini ta’ dressing rooms u kmamar għar-rehearsals, għal lift għall-passiġġieri u oġġetti, għal tagħmir kontra n-nirien. 

Fl-istess waqt għadd ta’ għaqdiet kummerċjali u volontarji qegħdin ukoll jagħtu l-kontribut tagħhom għal xogħol ta’ restawr u tisbiħ. Waħda minn dawn il-kumpanniji hi l-Malta International Airport li matul l-aħħar erba’ snin wettqet kull sena proġetti ta’ restawr bl-iskop li toħroġ is-sbuħija oriġinali ta’ dan il-post storiku. 

·     L-ewwel fażi tal-proġett twettqet fl-2003 u kienet tinkludi r-restawr tal-panew dekorattivi fuq il-faċċata tal-palketti tat-teatru.

·     It-tieni fażi twettqet fl-2004 u nkludiet il-manutenzjoni straordinarja tad-dekorazzjonijiet indurati bid-deheb.

·     It-tielet fażi twettqet is-sena l-oħra u kienet tinvolvi r-restawr ta’ l-arkata tal-proxenju u l-palketti ta’ fuqu u l-coat-of-arms tal-Gran Mastru Manoel de Vilhena.

·     Din is-sena qed titwettaq ir-raba’ fażi tal-proġett li jinkludi restawr tas-saqaf fejn inkixfu novitajiet ġodda fosthom l-impressjoni li s-saqaf għandu l-forma ta’ koppla żgħira meta hu fil-fatt ċatt. 

Ix-xogħol ta’ restawr qed jitwettaq minn Sante Guido Restauri u l-grupp ta’ ħaddiema tiegħu taħt id-direzzjoni tal-Professur Giuseppe Mantella u Silvia Orsi. 

Il-Ministru Zammit Dimech qal li dawn ix-xogħlijiet qed jikxfu aspetti oriġinali ta’ dan it-teatru li nbena mill-Gran Mastru Manoel de Vilhena fi żmien l-Ordni tal-Kavallieri ta’ San Ġwann u li twieled fl-1732 bħala teatru għal attivitajiet varji, ċentru kulturali u ta’ l-opri, rappreżentazzjonijiet teatrali, kummiedji u spettakli  oħra. 

Tul is-snin it-Teatru Manoel inbidel f’kumpless kulturali ta’ l-ogħla kwalità biex illum qed iservi bħala teatru ta’ l-opra u għal kunċerti mużikali u orkestrali, bħala sala tal-kunċerti, mużew tat-teatru u gallerija ta’ l-arti. 

“Malta hija ffortunata li fil-bini tal-belt il-ġdida l-Kavallieri ta’ San Ġwann ħasbu biex ikollna teatru li mhux biss hu gawhra arkitettonika iżda wkoll ċentru importanti għall-wirjiet li kienu jsiru fih. Dan it-teatru kien inawgurat bil-‘Merope’ ta’ Maffei, traġedja fuq stil klassiku li l-organizzazzjoni tagħha kien att ta’ kuraġġ minħabba l-ħidma diffiċli li kienet tirrikjedi talent u immaġinazzjoni,” qal il-Ministru Zammit Dimech.  

Kompla jgħid li t-Teatru Manoel hu llum it-teatru nazzjonali fejn il-Maltin u t-turisti jistgħu jsegwu talent lokali u barrani f’ambjent storiku iżda fl-istess waqt modern. Hu qal li l-impenn tal-Gvern hu li dan il-kumpless kulturali jibqa’ jiġi restawrat u msebbaħ biex ikun dejjem denju ta’ nazzjon sovran. 

Il-Ministru għat-Turiżmu u Kultura qal li l-Teatru Manoel hu wkoll attrazzjoni turistika għal dawk il-viżitaturi li jżuru pajjiżna għall-arti u l-kultura. Hu qal li dan it-teatru, li hu kunsidrat bħala l-aktar wieħed qadim fl-Ewropa, jikkontribwixxi biex ngħollu l-prodott turistiku ta’ pajjiżna li lkoll flimkien irridu naħdmu biex intejjbu.

Share this Press Release Icon socials Icon socials Icon socials Icon socials

Other Press Releases:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

More Press Releases Right arrow