IS-“SHARING” TA’ DROGA MHUX IKTAR KASTIGAT B’ĦABS BIL-FORS
B’effett mil-lum, is-“sharing” ta’ droga, jiġifieri l-fatt illi żewġ persuni jaqsmu bejniethom ammonti żgħar ta’ droga li ma tkunx intenzjonata għal traffikar, għalkemm ser jibqa’ reat kastigat bil-ħabs, mhux ser ikun hemm il-pieni ta’ ħabs bil-fors u l-ġudikamt ikun jista’ japplika pieni oħra. Dan japplika biss jekk il-ġudikant ikun konvint illi miċ-ċirkostanzi kollha tal-każ bħal ammont u tip ta’ droga, fedina penali ta’ l-akkużat, id-droga ma kenitx intenzjonata għal traffikar iżda sabiex titqassam “sharing” bejn persuni li jikkonsmaw iktar milli jittrafikaw id-droga; barra minn dan il-persuna akkużata tista’ tibbenefika minn din l-emenda darba biss.
Din l-emenda ġiet approvata l-ewwel mid-Drug Forum li kien presedut mill-Prof. Guido De Marco u issa mill-President ta’ Malta Dr Eddie Fenech Adami. Dan il-Forum jiġbor fih l-għaqdiet u istituzzjonijiet kollha involuti fil-qasam tal-ġlieda kontra d-droga. Imbagħad, din l-emenda ġiet approvata wkoll mill-Kumitat ta’ l-Affarijiet Soċjali tal-Kamra tad-Deputati.
Il-Viċi Prim Ministru u Ministru tal-Ġustizzja u Intern Tonio Borg kien qal pubblikament kemm-il darba illi hu kien favur din l-emenda u talab lill-partijiet kollha tas-soċjetà ċivili biex jagħmlu front wieħed favur din l-emenda; anki l-Oppożizzjoni iddikjarat ruħha favur din l-emenda.
Din l-emenda tassigura illi filwaqt li t-traffikanti ta’ droga jiġu kastigati b’piena karċerarja tassativa, dawk li huma vittmi ta’ droga jingħataw trattament differenti.
B’effett mil-lum ukoll daħlu fis-seħħ ir-reat aggravat ta` mibegħda razzjali, jiġifieri illi r-reati fuq il-persuna jew kontra l-proprjeta` tiżdidilhom il-piena jekk mnebbħin minn mibegħda razzjali.
B’effett ukoll mil-lum, il-piena ta’ ħabs ma tibqax tgħodd f`każ ta’ libell sempliċi fil-proċeduri kriminali taħt il-Liġi ta` l-Istampa.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958