PAZJENTI B’MARD MENTALI RI-INTEGRATI LURA FIL-KOMUNITÀ
“Illum qiegħda tinkiteb paġna ġdida fil-kura tal-mard mentali. Sallum din il-kura kienet tiġi assoċjata ma’ l-isptar Monte Carmeli. Illum b’sodisfazzjon ngħidu li waqqajna l-ħajt li kien jiddividi l-pazjenti mis-soċjetà. Dan għaliex numru ta’ pazjenti f’dawn il-jiem qegħdin jiġu allokati f’residenzi fil-komunità. Il-viżjoni tagħna li l-kura sa fejn hu possibbli tingħata fil-komunità qegħda issir realtà”.
Dan qalu l-Ministru Louis Deguara meta kien qiegħed jassisti għall-iffirmar tal-ftehim bejn id-Diviżjoni tas-Saħħa fuq naħa u fuq in-naħa l-oħra żewġ għaqdiet non-governattivi, Suret il-Bniedem u r-Richmond Foundation li daħlu sħab mad-Diviżjoni tas-Saħħa biex jipprovdu kura u superviżjoni lil numru ta’ pazjenti li se jiġu allokati f’żewġ Community Hostels.
Dan huwa l-ewwel proġett ta’ din ix-xorta li jikkumplimenta l-kura li preżentement tingħata fil-komunità biex aktar pazjenti ma jkollhomx il-ħtieġa li jiġu rikoverati f’Monte Carmeli. Il-gvern ilu għaddej b’ħidma biex inaqqas il-pazjenti f’Monte Carmeli billi fejn hu possibbli l-kura tingħata fil-komunità. Dan jgħin ukoll biex is-soċjetà tħares b’mod differenti lejn dawn il-pazjenti. Nittamaw li dan il-proġett jirnexxi ħalli jiġi ripetut u aktar pazjenti jinstabilhom post fil-komuntà, qal il-Ministru Deguara.
Bħala parti mill-iżvilupp tas-servizzi fil-komunità, il-management ta’ l-isptar Monte Carmeli daħal għal żewġ proġetti bi sħab mar-Richmond Foundation u mal-Fondazzjoni Suret-il Bniedem. Din hi l-ewwel darba li se jinfetħu Community Hostels bi sħab bejn l-Isptar Monte Carmeli u dawn iż-żewġ fondazzjonijiet.
F’dawn il-hostels ser imorru joqgħodu 24 pazjent li għal ħafna snin għexu fl-isptar Monte Carmeli. Il-ftehim li ġie ffirmat il-bieraħ jittratta l-mod li biħ għandhom jingħataw il-kura dawn il-pazjenti kif ukoll il-mod ta’ kif għandhom jitmexxew il-hostels. Se jitwaqqaf kumitat ta’ tmexxija li jkun magħmul minn rappreżentanti ta’ l-isptar kif ukoll tal-fondazzjonijiet rispettivi. Kull naħa ntrabtet li tikkontribwixxi lejn il-kura tal-pazjent.
Permezz ta’ proġetti bħal dawn, ikun qed isir użu aħjar mir-riżorsi kif ukoll tkun qed tingħata kura ta’ livell ogħla lil dawn il-pazjenti. Il-ħaddiema li se jkunu qegħdin jieħdu ħsieb il-pazjenti diġà qed jingħataw taħriġ kemm minn professjonisti ta’ l-isptar kif ukoll mill-Fondazzjoni li qed timpjegahom. Bħala parti mill-preparazzjoni biex jinfetħu dawn il-hostels, il-pazjenti li ntagħżlu biex joħorġu mill-isptar qegħdin jittieħdu fil-hostels fejn se jibdew jgħixu u hemm, barra milli jorjentaw ruħhom qegħdin ukoll jiltaqgħu man-nies li se jkunu qed jieħdu ħsiebhom. Anke dawk il-qraba tal-pazjenti li xtaqu jaraw il-hostels, setgħu jmorru jagħmlu dan. Dan ma jfissirx li dawn il-pazjenti mhux se jibqgħu taħt ir-responsabbiltà tal-konsulenti ta’ l-isptar Monte Carmeli, anzi fil-ftehim hemm provediment li jassigura li l-pazjent jibqa’ jieħu l-aqwa kura kemm mill-professjonisti ta’ l-isptar kif ukoll mingħand il-Fondazzjoni responsabbli milll-hostel.
Il-ftuħ ta’ dawn il-hostels ifisser li dawn il-pazjenti se jibdew jingħataw kura f’ambjent ferm differenti minn fejn kienu s’issa. In-numru żgħir ta’ pazjenti li se jkun hemm f’kull hostel iwassal biex il-pazjenti jingħataw attenzjoni aktar personalizzata. B’hekk togħla l-kwalità tal-ħajja ta’ dawn il-pazjenti li xi wħud minnhom, fil-futur jistgħu saħansitra jkunu tajbin biżżejjed biex jitilqu minn dawn il-hostels u jibdew jgħixu ħajja aktar indipendenti u integrata fil-komunità.
Il-ftuħ ta’ dawn il-hostels huwa biss parti żgħira mill-pjan ta’ l-isptar li bih qed niżviluppaw is-servizzi fil-komunità. Dawn is-servizzi huma ta’ importanza kbira għaliex permezz tagħhom ħafna pazjenti jkunu jistgħu jibqgħu jirċievu l-kura bla ma jkollhom il-ħtieġa li jiddaħħlu fl-isptar. Dan ikun ta’ ġid kbir kemm għal pazjenti kif ukoll għal qraba tagħhom.
Il-Ministru wera s-sodisfazzjon tiegħu għall-ħidma li ssir mill-amministrazzjoni u l-ħaddiema kollha fl-isptar Monte Carmeli. L-amministrazzjoni ilha xhur għaddejja b’ħidma fuq dan il-proġett biex setgħet tasal għall-ftehim ma’ dawn iż-żewġ għaqdiet non-governattivi li wkoll qegħdin jagħtu sehem utli ħafna u l-gvern hu ferm grat lejhom, temm jgħid il-Ministru Deguara.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958