Left arrow Mur Lura

PROĠETT IEĦOR TA’ MILJUN LIRA FL-MCAST

PR1089
Date Icon 27/07/2006

B’investiment ta’ kważi miljun lira l-Gvern qed jibni l-Istitut għal Servizzi fil-Komunita`, Dar l-Istudenti, Canteen u faċilitajiet oħra fl-MCAST. Fil-ħames snin minn mindu infetaħ l-MCAST sa l-aħħar ta’ din is-sena, il-Gvern ser ikun investa Lm 6.6 miljun għall-edukazzjoni u t-taħriġ vokazzjonali.  Fis-snin li ġejjin hu mistenni li dan l-investiment ikompli għaddej biex l-MCAST ikompli jikber u jkun jista’ joffri aktar korsijiet u opportunitajiet ta’ taħriġ. 

Il-Ministru Louis Galea qal li qatt ma kien hawn Gvern li investa daqstant fis-settur ta’ l-edukazzjoni vokazzjonali u taħriġ għaż-żgħażagħ u l-adulti. “U dan l-investiment diġa` qed jagħtina ħafna riżultati tajbin. L-ammont ta’ studenti bejn  l-20 – 24 sena li qed ikomplu jistudjaw f’livelli ogħla (higher secondary education) żdied minn 45% fl-2002 għal 56%  fl-2005 - żieda ta’ 11 il-punt perċentwal.  Diġa` għandna 70% ta’ dawk  ta’ l-età ta’ 17-il sena li għadhom fl-edukazzjoni u dan ifisser li parti kbira minn dawn se jtemmu l-edukazzjoni post-sekondarja.  Filwaqt li fl-2002 kien hawn 52% li kienu qed jispiċċaw l-edukazzjoni qabel 18 il-sena (early school leavers) dawn naqsu għal 38% fl-2005 - tnaqqis ta’ 14 il- punt perċentwal f’tliet snin,” spjega Louis Galea. 

Minbarra l-ħidma intensiva li qed issir fl-iskejjel primarji u sekondarji u x-xogħlijiet li qed isiru fl-Iskola Sekondarja Ogħla Giovanni Curmi tan-Naxxar, il-Gvern qed iwettaq ukoll investiment kapitali massiv fl-MCAST, il-Kulleġġ Malti ta’ Arti, Xjenza u Teknoloġija.  Filwaqt li fis-sena akkademika li għadha kemm intemmet, il-Kulleġġ inawgura il-bini ta’ Librerija u Ċentru għar-Riżorsi attrezzat kif ukoll parti mill-blokk amministrattiv, bħalissa għaddej xogħol fuq il-bini li fiħ se jiġi trasferit l-Istitut ghal Servizzi fil-Komunità u t-tieni fażi tal-blokk amministrattiv li fiħ se jkun hemm id-Dar ta’ l-Istudenti, Canteen, u faċilitajiet oħra. 

Ix-xogħlijiet li qed isiru bħalissa huma parti minn programm ta’ investiment kapitali maħsub biex itejjeb u jkattar il-faċilitajiet tal-Kulleġġ.    “Filwaqt li l-MCAST diġà jilqa` fih mal-4000 student full-time u 4000 persuna oħra li qed isegwu korsijiet part-time, il-Kulleġġ u oqsma oħra post-sekondarji u terzjarji ser ikomplu jikbru biex nilħqu l-mira tal-Gvern li aktar żgħażagħ jiksbu ħiliet u kwalifiki tal-kwalita` meħtieġa għad-dinja tax-xogħol illum.  L-MCAST bħalissa qed jifformula l-Masterplan tiegħu għall-għaxar snin li ġejjin bl-iskop li jkunu identifikati l-bżonnijiet tal-Kulleġġ u diġà inħareġ tender għal dan l-iskop.  Biex iwettaq dan il-pjan, il-Gvern se jkun qed juża ammont sostanzjali ta’ fondi ta’ l-UE permezz tal-ERDF (European Regional Development Fund),” qal il-Ministru ta’ l-Edukazzjoni Louis Galea waqt żjara li għamel fl-MCAST. 

Il-Ministru żar il-proġett tal-bini u l-immodernizzar ta’ l-Istitut għal Servizzi fil-Komunità (Institute of Community Services) li bħalissa qed jaqdi l-istudenti minn żewġ postijiet, wieħed f’tas-Sliema u l-ieħor fl-Imsida biswit il-Junior College.  F’dan il-blokk saru estensjonijiet u ġew miżjuda żewġ sulari sħaħ fuq dawk eżistenti.  Meta jitlesta, il-blokk se jinkorpora 15-il lecture room, 2 salons għat-taħriġ ta’ beauty therapy, 2 salons ta’ hairdressing, crafts workshop, kmamar għall-mużika u d-drama, laboratorju tax-xjenza, laboratorju tal-kompjuter, uffiċini, staff rooms, u faċilitajiet oħrajn inkluż faċilitajiet sanitarji, stores, laundry, u kitchenettes.  

Dan il-bini hu maħsub li jkun jista jilqa` għall-bżonnijiet ta’ l-istitut għas-snin li ġejjin u partikolarment biex l-Istitut ikun jista jilqa’ fiħ aktar studenti fil-korsijiet ferm popolari li joffri.  L-investiment li qed isir f’dan il-blokk ilaħħaq kważi Lm 700,000 u hu mistenni li jitlesta sa tmiem din is-sena.  Il-Kulleġġ diġa’ ħareġ u aġġudika t-tenders għall-għamara u l-apparat li se jkollu bżonn dan l-Istitut. Dan il-proġett qed juża wkoll fondi mill-UE permezz ta’ l-ERDF. 

Waqt iż-żjara tiegħu l-Ministru ra wkoll ix-xogħlijiet li qed isiru fid-Dar ta’ l-Istudenti u fil-Canteen tal-Kulleġġ.  Il-Canteen se tkun jesa` mat-300 ruħ bil-qiegħda ġewwa u aktar minn 100 ruħ oħra barra. 

Il-Ministru Louis Galea qal li ż-żgħażagħ, il-ġenituri u l-industrija huma sodisfatti ħafna bix-xogħol li qed jagħmel l-MCAST.  Il-Ministru qal li fi ftit snin il-Kulleġġ kiber b’mod sostanzjali biex issa qed joffri mad-90 kors f’Malta u 13-il kors f’Għawdex u għandu kważi 8000 student li qed isegwu korsijiet full-time jew part-time.  Fl-istess żmien il-Kulleġġ irnexxielu jgħolli l-istatus ta’ l-edukazzjoni u t-taħriġ vokazzjonali bħala alternattiva valida għall-korsijiet li toffri l-Università.  Il-Kulleġġ irnexxielu wkoll joffri korsijiet ta’ livelli differenti biex anke dawk li ma jkollhomx ċertifikati jkunu jistgħu jsegwu korsijiet fil-livell baziku (Foundation) biex eventwalment ikomplu f’livelli ogħla sa livelli terzjarji.   

Il-Ministru qal li ma’ l-industrija u s-setturi ekonomiċi, l-MCAST diġà għandu relazzjonijiet tajbin ħafna u qed ikompli jaħdem biex dawn jitjiebu.  Hu fakkar kif f’dawn l-aħħar snin l-Kulleġġ, b’mod flessibli u fi żmien qasir, offra korsijiet ġodda maħsuba biex jgħinu fl-iżvilupp ta’ setturi ġodda fl-ekonomija, fosthom fis-settur tal-farmaċewtika, fit-tiswija ta’ l-ajruplani u fit-teknoloġija ta’ l-informatika u l-komunikazzjoni.  Il-Minstru qal li l-MCAST hu essenzjali għall-iżvilupp ekonomiku li mistenni jseħħ fis-snin li ġejjin u għal din ir-raġuni l-Kulleġġ qed jiżviluppa l-Masterplan tiegħu biex ikun stabbilit kif se jimxi ‘l quddiem fis-snin li ġejjin. 

“Bit-tkabbir li qed inwettqu fl-MCAST, fil-Higher Secondary tan-Naxxar, fil-Junior College u fl-Università il-Gvern hu konvint li ser inkomplu nersqu qrib il-miri ta’ l-Aġenda ta’ Lisbona dwar il-parteċipazzjoni fl-edukazzjoni avvanzata u ogħla,” qal Louis Galea. Il-Ministru qal li għalkemm għad fadal ħafna x’isir tajjeb li wieħed jiftakar minn fejn tlaqna u fejn qiegħdin illum.  “L-Oppożizzjoni illum qed tgħid li għadna lura fuq l-Aġenda ta’ Lisbona, iżda mhux qed tgħid li kemm ilu dan il-Gvern kien hawn splużjoni fl-ammont ta’ nies li jattendu korsijiet post-sekondarji u terzjarji u dan seħħ għax il-Gvern investa bil-qawwi fl-istituzzjonijiet, neħħa l-ostakli li kien hemm u fetaħ il-bibien beraħ biex kulħadd, specjalment ulied il-ħaddiema, ikunu jistgħu jkomplu jistudjaw u jitħarrġu.  L-Oppożizzjoni lanqas ma tirrikonoxxi l-iżbalji kbar li għamlet fil-passat u li ħafna minnhom għadna qed insofru l-konsegwenzi tagħhom sa illum, fosthom it-tkissir ta’ l-Università u l-għeluq ta’ l-MCAST. B’kuntrast il-Gvern preżenti dejjem investa bil-qawwi, żied l-aċċessibilità u ħadem bil-għaqal biex is-settur jimxi l-quddiem, fil-fatt, fl-aħħar 10 snin l-ammont ta’ studenti li qed isegwu korsijiet post-sekondarji u terzjarji irdoppja biex fis-sena akkademika li għaddiet kien hemm mal-20,000 student.” 

Il-Ministru Galea temm ifakkar li bħalissa l-Kulleġġ qed jilqa` l-applikazzjonijiet għad-dħul fil-korsijiet tiegħu għas-sena akkademika li jmiss u wara li din is-sejħa tagħlaq nhar il-Ġimgħa, ikun hemm sejħa oħra aktar tard għal dawk il-korsijiet li jkunu għadhom ma intlewx u biex dawk li jkunu kisbu xi riżultati oħrajn mir-riparatorji  jkunu jistgħu japplikaw.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow