PERFORMANCE AUDIT – THE FUNCTIONS OF THE TAX COMPLIANCE UNIT
L-Awditur Ġenerali rraporta li t-Tax Compliance Unit (TCU) huwa f’pożizzjoni li jista’ jagħmel kull tip ta’ investigazzjoni dwar taxxi. It-TCU għandu nies professjonali kif ukoll informazzjoni miġbura f’data warehouse biex jgħinuh fl-investgazzjonijiet. Iżda sa l-2004, ix-xogħol tat-TCU ma rrendiex daqs kemm kien maħsub fil-bidu.
Il-politika fiskali tal-gvern tgħid li għandu jikber id-dħul mit-taxxa billi jiżdied u jitjieb l-infurzar. Fost il-miżuri li ttieħdu biex titwettaq din il-politika twaqqaf it-TCU biex jinvestiga persuni taxxabli, skond kif ikun iddelegat mid-Dipartimenti tat-Taxxi Interni, tal-VAT, tad-Dwana u tas-Sigurtà Soċjali. It-TCU, iżda, m’għandux l-awtorità u l-awtonomija li jagħżel hu lil min għandu jinvestiga jew li jara li r-rakkomandazzjonijiet li jagħmel jitwettqu. F’dan il-qafas, it-TCU għandu rwol reattiv għaliex irid jirrejaġixxi għat-talbiet li jagħmlu d-dipartimenti msemmija.
L-effettività tat-TCU tnaqqset għaliex ma kelliex direzzjoni biżżejjed mill-Bord tagħha. Fin-nuqqas ta’ laqgħat tal-Bord, il-komunikazzjoni u l-koordinazzjoni bejn it-TCU u d-dipartimenti msemmija ddgħajfet.
It-TCU għandha informazzjoni aġġornata miġbura f’data warehouse. Teżisti l-opportunità biex informazzjoni li hemm f’entitajiet governattivi tiżdied ma’ dik li għandha t-TCU. It-TCU tuża l-informazzjoni li għandha miġbura f’kull investigazzjoni li tagħmel. Għandha tintuża aktar din l-informazzjoni mid-dipartimenti responsabbli mill-ġbir ta’ taxxi biex jingħażlu b’mod aħjar il-każijiet li għandhom jiġu nvestigati.
Sa l-aħħar ta’ Mejju 2005, it-TCU lestiet 174 investigazzjonijiet u ħarġet kontijiet għal taxxi inkrimentali li jlaħħqu għal madwar Lm9.4 miljuni. Dan it-total huwa ferm inqas minn dak li kien previst fil-pjanijiet għas-snin 2000 – 2004. Dawn il-pjanijiet kienu bbażati fuq il-fatt li t-TCU kellha 96 persuna impjegata sa l-2004. Iżda sa l-aħħar ta’ dan il-perjodu t-TCU impjegat biss 32 persuna.
F’numru ta’ investigazzjonijiet it-TCU ma ħargitx kontijiet ta’ taxxi addizzjonali. Dan il-fatt juri li hemm xi nuqqasijiet fil-proċess ta’ l-għażla tal-każijiet li jintbagħtu lit-TCU għall-investigazzjoni mid-dipartimenti responsabbli mill-ġbir tat-taxxi. Barra minn hekk, uħud mill-kontijiet li ħarġet it-TCU għadhom ma tħallsux għaliex f’ħafna mill-każijiet il-persuni taxxabbli oġġezzjonaw, b’ċertu element ta’ suċċesss, mad-dipartimenti tat-Taxxi Interni u tal-VAT.
It-TCU ikkonkludiet 198 ftehim ma’ persuni taxxabbli, skond l-iskema tal-Forward Tax Agreements. It-TCU tagħmel dan ix-xogħol f’isem id-dipartimenti tat-Taxxi Interni u tal-VAT. Dawn il-kuntratti huma validi għal tliet snin u matulhom hu mistenni li jirrendu dħul f’taxxi ta’ Lm2.6 miljun. Dan huwa Lm1.5miljun iżjed mill-medja minn kemm kien jiġi ddikkjarat f’taxxi mill-istess persuni fi tliet snin ta’ qabel ġew iffirmati l-kuntratti. Għalkemm din l-iskema wasslet biex aktar minn irduppjat it-taxxa li kienet tiġi ddikkjarata minn dawk li għażlu li jieħdu sehem fiha, l-impatt tagħha kien marġinali. Dan minħabba n-nuqqas ta’ konkorrenza mis-setturi ekonomiċi li kienu ntgħażlu biex jieħdu sehem fl-iskema.
B’direzzjoni aħjar mill-Bord tagħha u iżjed koperazzoni u koordinazzjoni mad-dipartimenti responsabblli mill-ġbir tat-taxxi, it-TCU tista’ tagħti kontribut ikbar biex jintleħqu l-miri fiskali tal-Gvern u tkompli titkattar il-kultura ta’ moralità fiskali.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958