IR-RETTUR IL-ĠDID JIBDA L-ĦIDMA FL-UNIVERSITA`
Illum, il-Professur Juanito Camilleri, ir-Rettur il-ġdid ta’ l-Universita` ta’ Malta, għamel żjara ta’ korteżija lill-President ta’ Malta Edward Fenech Adami, lill-Prim Ministru Lawrence Gonzi u lill-Ministru ta’ l-Edukazzjoni, Żgħażagh u Xogħol Louis Galea.
Il-Professur Juanito Camilleri, beda uffiċjalment il-ħidma tiegħu bħala rettur fl-1 ta’ Lulju 2006, wara li tliet xhur ilu ġie elett Rettur mill-Kunsill ta’ l-Universita`. Huwa qed jissuċċedi fil-kariga lill-Professur Roger Ellul Micallef li serva bħala Rettur għall-għaxar snin li għaddew.
Il-Prim Ministru irringrazzja lill-Professur Camilleri li aċċetta li jservi lill-poplu kollu f’waħda mill-aktar karigi importanti għal pajjizna. Huwa fisser l-apprezzament tiegħu li l-Professur Camilleri aċċetta li jitlaq karriera distinta u ta’ success fis-settur privat, biex jiddedika ruħu għall-Universita` u għall-interess nazzjonali.
Dr Gonzi saħaq li l-Gvern qed jagħti priorita’ qawwija lis-settur ta’ l-edukazzjoni avvanzata u ogħla u fil-fatt qed jiddedika investiment ta’ miljuni ta’ liri għal dan il-qasam. Il-Gvern hu impenjat li jkompli jsaħħaħ l-investiment tiegħu f’dan is-settur biex ikompli jiżdied in-numru ta’ Maltin u Għawdxin, speċjalment żgħażagħ, li jilħqu dawn il-livelli ta’ edukazzjoni u taħriġ. Il-Gvern irid ukoll li jitjiebu l-kwalita’ u r-riżultati fl-oqsma tar-riċerka, innovazzjoni, xjenzi, inġinerija u teknoloġija. L-Universita` ta’ Malta, l-unika Universita` li għandu pajjiżna, kienet u għadha strumentali għall-iżvilupp politiku, ekonomiku, soċjali u kulturali tal-poplu tagħna. Fil-fatt, l-Universita` tat lill-pajjiżna l-mexxejja u l-ħaddiema kollha li kellna bżonn.
“Illum il-ġurnata, Universita` ta’ kwalita` u b’saħħitha hija kruċjali għall-iżvilupp u l-prosperita’ ta’ pajjiżna u biex il-poplu tiegħu jsaħħaħ l-identita’ tiegħu b’apprezzament akbar ta’ l-arti, il-kultura u l-valuri tal-poplu tagħna.˝ qal il-Prim Ministru.
Il-Prim Ministru stqarr li ried li jirringrazzja u juri l-apprezzament tiegħu lir-Rettur uxxenti, il-Professur Roger Ellul Micallef, għas-servizz li ta lill-pajjiż fit-tmexxija ta’ l-Universita` matul l-għaxar snin li għaddew.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958