Left arrow Mur Lura

L-allegati irregolaritajiet fl-operat tad-Driving Examiners Unit ta’ l-Awtorità dwar it-Trasport ta’ Malta

pr0956
Date Icon 23/06/2006

Fid-dawl ta’ l-investigazzjonijiet tal-Pulizija fil-każ ta’ l-irregolaritajiet fl-operat ta’ l-eżaminaturi tas-sewqan tad-Driving Examiners Unit fi ħdan l-Awtorità dwar it-Trasport ta’ Malta u mingħajr ma jiġu ppreġudikati l-proċedimenti li għaddejjin fil-Qrati tal-Ġustizzja, il-Ministeru għall-Iżvilupp Urban u Toroq irid jiċċara l-fatti li minnhom innifishom jiċħdu l-allegazzjonijiet infondati mxandra mill-media  ta’ l-Oppożizzjoni u l-Kap ta’ l-Oppożizzjoni nhar il-Ħadd li għadda, kif ukoll jistabbilixxu x’miżuri ttieħdu u qiegħdin jittieħdu mill-Ministeru u l-Awtorità f’dan il-każ.

Il-fatti magħrufa mill-Ministeru għall-Iżvilupp Urban u Toroq seħħew kif ġej:

Nhar is-16 ta’ Mejju 2006 kandidat li kien għadu kemm qgħad għall-eżami tas-sewqan allega li hu kien għadda xi flus lill-instructor tiegħu bħala garanzija biex jgħaddi mill-eżami. L-eżaminatur li għamel l-eżami lil dan il-kandidat ressaq rapport dwar din l-allegazzjoni lill-Kap tad-Driving Examiners Unit li min-naħa tiegħu mill-ewwel fetaħ inkjesta interna dwar il-każ.

F’ din l-inkjesta preliminari ġew intervistati l-kandidat, l-instructor tiegħu u l-propjetarju ta’ l-iskola tas-sewqan in kwistjoni fil-preżenza ta’ l-eżaminaturi. Appena kien hemm ammissjoni mill-instructor li kien aċċetta flejjes kif allega l-kandidat, l-ADT irtiratlu l-liċenzja li biha jkun jista’ jagħti l-lezzjonijiet tas-sewqan.

Ir-rapport ta’ din l-inkjesta preliminari wassal biex iċ-Chief Executive Officer ta’ l-ADT jordna li ssir inkjesta interna aktar dettaljata dwar dawn l-allegazzjonijiet.

Mill-għada li ġurnal bl-Ingliż irrapporta dwar l-allegazzjonijiet u l-ftuħ ta’ l-inkjesta interna fl-ADT, il-Pulizija bdiet tinterroga lill-eżaminaturi u uffiċjali oħra tad-Driving Examiners Unit. Hawnhekk irriżulta li l-Pulizija kienet bdiet twettaq l-investigazzjonijiet tagħha xhur qabel ma l-ADT jew il-Ministeru saru jafu b’dan il-każ. F’dan l-stadju l-ADT issospendiet l-inkjesta interna tagħha sabiex tippermetti u tassisti lill-Pulizija biex tipproċedi bl-investigazzjonijiet tagħha. Fl-1 ta’ Ġunju u ġranet sussegwenti, l-ADT ħarġet ordni lill-ħames eżaminaturi investigati mill-Pulizija biex b’mod indefinit, ma jirrappurtawx għax-xogħol u joħorġu fuq forced leave.

Dwar it-trasferiment ta’ wieħed mill-eżaminaturi involuti f’dan il-każ għal Dipartiment ieħor fi ħdan l-ADT, irid jiġi iċċarat li dan it-trasferiment ma kellu xejn x’jaqsam mal-każ in kwistjoni, tant hu hekk li dan sar ġimgħat qabel ma saret l-ewwel allegazzjoni. It-transfer kien ingħata wara li l-Awtorità waslitilha informazzjoni li l-eżaminatur in kwistjoni seta’ kellu problemi li setgħu joħolqu kunflitt mar-responsabilitajiet tiegħu bħala eżaminatur. L-ADT ivverifikat il-fatti fl-aħħar ġimgħa t’April u l-eżaminatur ingħata t-transfer fl-4 ta’ Mejju.

Tajjeb jingħad ukoll li f’każ separat li seħħ f’Ġunju tas-sena l-oħra, l-Awtorità dwar it-Trasport kienet ħadet miżuri dixxiplinari kontra uffiċjal tagħha wara li kien hemm allegazzjonijiet li ċertu kandidati għall-eżami tas-sewqan kienu qed jiġu allokati lil eżaminaturi partikolari. Is-CEO ta’ l-Awtorità kien ta struzzjonijiet speċifiċi biex jitbiddlu proċeduri fid-Driving Examiners Unit biex il-kandidati jibdew jiġu allokati lill-eżaminaturi bil-polza.

It-tentattiv tal-media ta’ l-Oppożizzjoni u mezzi tal-istampa oħrajn li jassoċjaw lil wieħed mill-eżaminaturi mal-Ministru għall-Iżvilupp Urban u Toroq hija qarrieqa u tinħass li għandha laqta partiġġjana. Dan għaliex għalkemm mhux miċħud li kull persuna għandha d-dritt għall-assoċazzjoni u l-espressjoni politika li jidhrilha, ħadd mill-eżaminaturi – inkluż dak li ssemma bħala persuna viċina tal-Ministru għall-Iżvilupp Urban u Toroq - la qatt ingħata l-impjieg tiegħu fil-perjodu illi l-Ministru Mugliett kien responsabbli mill-ADT, u wisq anqas ingħata xi promozzjoni fl-istess żmien.

Barraminhekk, kif jixhdu l-fatti imsemmija aktar ’l-fuq u l-proċedimenti li qed jittieħdu kontra dawn l-eżaminaturi fil-Qrati tal-Ġustizzja, l-ebda wieħed minn dawn ma ngħata trattament preferenzjali jew kien protett b’xi mod.

Minn dan kollu joħroġ li kemm il-Ministeru għall-Iżvilupp Urban u Toroq, kif ukoll l-Awtorità dwar it-Trasport ħadu l-passi neċessarji kull meta rriżultalhom xi suspetti jew irregolaritajiet. Joħroġ ukoll li sfortunatament, għal darb’oħra il-media ta’ l-Oppożizzjoni ppruvat tiegħu vantaġġ politiku minn każ li għandu jiġi ttrattat b’ċerta serjetà u li iżda ħadd m’għandu jasal għal konklużjonijiet dwaru, peress li għad m’għandux ebda eżitu ġudizzjarju.

Intant kif tħabbar diġà fil-Parlament, il-Ministeru għall-Iżvilupp Urban u Toroq ser ikun qed jerfa’ r-responsabilità tiegħu billi jħares mill-qrib lejn l-istruttura ta’ l-Awtorità dwar it-Trasport ta’ Malta, jistabbilixxi x’seta’ kienu n-nuqqasijiet li wasslu għal dan il-każ u konsegwentement iwettaq ir-riformi meħtieġa sabiex is-sistemi ta’ kontroll ta’ l-Awtorità jissaħħu u b’hekk tiġi limitata kemm jista’ jkun kull possibilità li każ bħal dan jirrepeti ruħu.

Il-Ministeru għall-Iżvilupp Urban u Toroq u l-Awtorità dwar it-Trasport jiċħdu bil-qawwa kollha li kandidati li telgħu għall-eżami fix-xhur li għaddew qed jintalbu sabiex jerġgħu jitilgħu għall-eżami tagħhom. Lill-Awtorità dwar it-Trasport ma jirriżultawlhiex fatti li jitfgħu suspetti fuq l-eżamijiet kollha li saru tul dawn l-aħħar xhur. Din l-allegazzjoni mhiex korretta u jidher li l-għan tagħha huwa li titfa’ dell negattiv u toħloq diżgwid u klima ta’ nuqqas ta’ fiduċja fl-amministrazzjoni.

Intant, il-Bord tal-ADT beda l-proċeduri meħtieġa sabiex l-uffiċjali tagħha li jitressqu fil-Qrati tal-Ġustizzja in konnessjoni ma dan il-każ jiġu sospiżi mill-impjieg tagħhom.

Il-Ministru għall-Iżvilupp Urban u Toroq dal-għodu waqqaf Bord ta’ Inkjesta Indipendenti skond l-Att dwar l-Investigazzjonijiet (Kap. 273) bit-terms of reference li jidhru fid-dokument anness ma’ din l-istqarrija. Il-bord huwa magħmul mis-Sur Louis Cilia (Chairman), is-Sur Paul Attard u Dr. Richard
Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow