TĦAWWIL TA’ SIĠAR F’TA’ QALI
Il-Prim Ministru u Ministru tal-Finanzi Dr Lawrence Gonzi dalgħodu mexxa ċerimonja ta’ tħawwil ta’ siġar fil-Park Nazzjonali f’Ta’ Qali. Din hi waħda minn għadd ta’ inizjattivi li qed jieħu l-Ministeru tal-Finanzi bil-għan li jitħares l-ambjent ta’ madwarna. B’din l-inizjattiva, id-Dipartimenti u organizzazjonijiet fi ħdan il-Ministeru qegħdin jiffinanzjaw it-tħawwil ta’ għadd ta’ siġar.
Il-Prim Ministru esprima s-sodisfazzjon tiegħu li jattendi għal din l-attivita’ rari li ġabret flimkien Dipartimenti u entitajiet fid-dekasteru tal-Ministeru tal-Finanzi kif ukoll il-Bank Ċentrali, għal inizjattiva favur l-ambjent. Din hi waħda mill-inizjattivi li ttieħdu relatati ma’ riċiklaġġ ta’ skart u konservazjoni ta’ enerġija. “Hemm bżonn li nieħdu ħsieb l-ambjent. Il-messaġġ qawwi li jrid jitwassal illum hu li l-ambjent hu ta’ kulħadd u fl-interess ta’ kulħadd. Għandna nibżgħu għall-ambjent ta’ madwarna biex ingawduh aħna kif ukoll dawk li jżuruna.”
Is-Segretarju Parlamentari Tonio Fenech qal li l-iskart f’ħafna Dipartimenti qiegħed jiġi separat. Qed issir kampanja fost l-impjegati biex kemm jista’ jkun ma’ jiġux stampati dokumenti, waqt li għadd ta’ bozoz fil-Ministeru tal-Finanzi inbidlu għal ‘energy saving lamps’. Il-Ministru George Pullicino faħħar din l-inizjattiva kif ukoll inizjattivi oħra li qegħdin jittieħdu b’riżq l-ambjent.
Preżenti għal din iċ-ċerimonja kien hemm ukoll rappreżentant tas-Segretarju Permanenti Prinċipali, Kapijiet ta’ Dipartimenti fi ħdan il-Ministeru tal-Finanzi, il-Gvernatur tal-Bank Ċentrali ta’ Malta, iċ-Chairman ta’ l-Awtorita’ għas-Servizzi Finanzjarji ta’ Malta, iċ-Chairman tal-Borża ta’ Malta u l-Viċi Chairman ta’ l-Awtorita’ dwar il-Lotteriji u l-Logħob.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958