FESTIVAL IMMIRAT GĦALL-FAMILJA KOLLHA
Il-Ministru għat-Turiżmu u Kultura Francis Zammit Dimech nieda l-‘Valletta Summer Festival’. Hu qal li M & E Management Group kien magħruf għall-organizzazzjoni ta’ spettakli li bħalhom organizzaw f’26 pajjiż madwar id-dinja. Hu qal li l-aktar spettaklu riċenti li tellgħu f’Malta kien il-kunċert tal-kantant popolari Taljan Amadeo Minghi li ttella’ fit-13 ta’ Mejju f’Pinto Hall fil-Valletta Waterfront.
Il-kumpannija M & E Management Group ser ittella’ il-Valletta Summer Festival fil-Valletta Waterfront nhar il-Ġimgħa 7 u s-Sibt 8 ta’ Lulju. Dan il-festival hu mmirat għall-familja kollha u se jipparteċipaw fih kantanti Taljani u Ingliżi, tribute bands kif ukoll talent Malti.
L-esponenti internazzjonali jvarjaw minn mużika pop għal mużika rock. Fost dawk li ser jipparteċipaw se jkun hemm Debbie Nunn, ‘tribute artist’ ta’ Madonna, it-‘tribute bands’ ewlenin tal-West End ta’ Londra tar-Rolling Stones u Queen, il-kantant internazzjonali Freddie Haze, il-kantanta Taljana Jessica Morlacchi, ex-leader tal-band popolari ma’ udjenza żagħżugħa Gazosa. Se jkun hemm ukoll il-‘band’ popolari Maltija, Scream Daisy kif ukoll kantanti u żeffiena lokali. Ser jipparteċipaw ukoll diversi animaturi għat-tfal.
Il-Ministru Zammit Dimech qal li kien ta’ sodisfazzjon għalih jara dawn l-attivitajiet kollha jittellgħu fil-Valletta Waterfront. Hu qal li llum il-Valletta Waterfront hu ċentru ta’ attività kummerċjali u rikreattiva. Hu wkoll il-vetrina ta’ pajjiżna għall-eluf kbar ta’ turisti li jżuru pajjiżna abbord ‘cruise liners’. Hu qal li permezz ta’ l-organizzazzjoni tal-Valletta Waterfront qed jiżdiedu n-numru ta’ viżitaturi li qed jiġu Malta abbord cruise liners kif jirriżulta minn ċifri ppubblikati dan l-aħħar mill-Uffiċċju Nazzjonali ta’ l-Istatistika li juru li fl-ewwel erba’ xhur tas-sena żaru Malta 48 fil-mija aktar turisti mill-istess perijiodu s-sena l-oħra.
“Il-Valletta Waterfront hu llum kalamita għal attivitajiet fuq skala nazzjonali. Wara li kienu organizzati diversi kunċerti, fosthom dak mill-kantant Amadeo Minghi, issa qed ikun organizzat f’dan il-post Festival ta’ jumejn maħsub għall-familja kollha. Dawn huma attivitajiet li jattiraw artisti rinomati Maltin u barranin biex jingħata l-aqwa spettaklu ta’ mużika u kant,” qal il-Ministru Zammit Dimech.
Il-Ministru għat-Turżimu u Kultura qal li dawn l-attivitajiet kienu jikkontribwixxu wkoll għat-tisħiħ tas-settur turistiku billi joffru lill-viżitatur diversità ta’ attivitajiet u opportunità li jiddevertu mal-Maltin f’ambjent uniku li jorbot l-istorja mal-preżent. Il-Ministru Zammit Dimech feraħ lil M & E Management Group għall-organizzazzjoni ta’ dan il-Festival filwaqt li awguralhom kull suċċess ħalli jorganizzaw aktar attivitajiet ta’ dan it-tip.
Other Press Releases:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958