Left arrow Mur Lura

ID-DOKUMENT TAL-PARTIT LABURISTA DWAR GĦAWDEX JIRRIKONOXXI L-INIZJATTIVI TAL-GVERN PREŻENTI

pr0772
Date Icon 24/05/2006

L-“Abbozz ta’ Pjan ta’ Żvilupp għal Għawdex bħala Reġjun”, ippubblikat mill-Partit Laburista jirrikonoxxi l-ħidma tal-Gvern bil-parti l-kbira tal-miżuri proposti diġa’ qed jiġu mplimentanti.  

Dan qalitu llum l-Onor. Giovanna Debono, Ministru għal Għawdex waqt li kienet qed tindirizza konferenza ta’ l-aħbarijiet fil-Ministeru għal Għawdex, hi u tagħti r-reazzjoni tal-Gvern għad-dokument ippubblikat mill-Partit Laburista l-ġimgħa li għaddiet. 

Bħal ma hu l-każ tad-dokumenti ta’ politika dwar l-ambjent, it-turiżmu u s-saħħa, anke dan id-dokument dwar Għawdex qed jipproponi miżuri li l-Partit Laburista fil-Gvern ser jadotta għal Għawdex meta fil-fatt ħafna minnhom diġa’ qegħdin fis-seħħ jew kienu ġew imħabbra diġa’ mill-Gvern tal-ġurnata. 

Id-dokument jitkellem dwar il-fondi mill-Unjoni Ewropea u jgħid li ser “jiġi żgurat li Għawdex imissu fondi Ewropej biżżejjed biex il-livell ta’ żvilupp tiegħu jkun jista’ jilħaq dak ta’ Malta u eventwalment dak ta’ l-Unjoni Ewropea” meta Għawdex illum qiegħed diġa’ jirċievi 10% tal-fondi Strutturali u ta’ Koeżjoni li Malta, bħala pajjiż, akkwistat. Marbuta mal-fondi ta’ l-Unjoni Ewropea, miżura oħra tipproponi li l-provvedimenti tad-Dikjarazzjoni dwar Għawdex annessa mat-Trattat ta’ Sħubija għandha titħaddem. Dawn il-provvedimenti jagħtu l-possibilita’ lill-Gvern biex jitlob lill-Unjoni Ewropea tevalwa l-livell ta’ żvilupp ta’ Għawdex bħala gżira qabel kull perjodu finanzjarju, sabiex jekk il-livell tal-PGD ta’ Malta bħala gżira jaqbeż il-75% tal-medja ta’ l-Unjoni Ewropea waqt li ta’ Għawdex ma jaqbiżx, Għawdex ikun jista’ jingħata kunsiderazzjoni speċjali. Il-Partit Laburista qiegħed jirrepeti li dawn il-provvedimenti ma tħaddmux qabel ittieħdet id-deċiżjoni dwar il-perjodu finanzjarju 2007-2013, u jinjora bl-iktar mod konvenjenti l-fatt li l-Gvern ma talabx li jiġi evalwat il-livell ta’ żvilupp t’Għawdex separatament għaliex Malta, bħala pajjiż, kienet għadha taħt il-75%tal-medja tal-livell Ewropew u allura kienet għadha tikkwalifika għall-ogħla livell ta’ fondi possibbli. Għawdex ser jibbenefika minn minimu ta’ 10% oħra minn dawn it-€805miljuni li ġew allokati lil Malta.  

Dwar it-turiżmu, il-Ministru Debono qalet li d-dokument tal-Partit Laburista jitkellem dwar il-ħtieġa ta’ Awtorita’ tat-Turiżmu għal Għawdex li jkollha l-finanzi tagħha sabiex tirreklama lil Għawdex bħala destinazzjoni distinta, għal darb’oħra jinjora l-fatt li bir-ristrutturar ta’ l-Awtorita’ Maltija tat-Turiżmu nħolqot taqsima għal Għawdex li għandha l-finanzi tagħha sabiex tirreklama lil Għawdex bħala destinazzjoni distinta. Barra minn hekk, qalet il-Ministru Debono, permezz ta’ l-istrutturi preżenti fl-MTA, it-taqsimiet kollha jinkludu rappreżentant minn Għawdex u b’hekk l-interessi ta’ Għawdex qed jiġu rappreżentati. Il-Ministru Debono tkellmet dwar proġetti speċifiċi li qed jiġu proposti u li wkoll il-Gvern qiegħed diġa’ jimplimenta fosthom il-ħolqien ta’ iktar siti artifiċjali għall-għaddasa, it-titjib tal-faċilitajiet eżistenti għall-għaddasa, it-titjib ta’ toroq li jwasslu għal żoni turistiċi bħar-Ramla u x-Xlendi, l-estensjoni tal-bajja tax-Xlendi, u proġetti għall-Ġgantija u ċ-Ċittadella. B’riferenza partikolari għaċ-Ċittadella, il-Ministru Debono qalet li l-Ministeru għal Għawdex bħalissa qed iħejji x-xogħol preparatorju sabiex iktar tard ikun jista’ jissottometti applikazzjoni għal proġett olistiku taħt il-perjodu finanzjarju ta’ l-2007-2013 ta’ l-Unjoni Ewropea.  

B’riferenza għall-miżuri proposti taħt it-titlu ta’ l-Infrastruttura, il-Ministru Debono qalet li anke hawnhekk, ħafna mill-miżuri proposti diġa’ qed jiġu studjati jew implimentati mill-Gvern. Il-Gvern diġa’ ħabbar il-pjanijiet għal żona fix-Xewkija li diġa’ ġiet identifikata għall-industriji ż-żgħar permezz ta’ riżoluzzjoni li għaddiet fil-Parlament matul is-sena li għaddiet. Il-Ministru Debono qalet li kien il-Ministeru għal Għawdex li qajjem il-ħtieġa għal triq alternattiva għall-Imġarr u fil-fatt, permezz ta’ fondi ta’ l-Unjoni Ewropea, bħalissa għaddejjin studji biex jidentifikaw l-aħjar rotta għal bypass ġdid, filwaqt li s-sistema ta’ toroq eżistenti f’Għawdex qed tiġi mtejba sostanzjalment. 

Dwar il-qasam ta’ l-edukazzjoni l-Ministru Debono qalet li mkien fid-dokument ippreżentat mill-Partit Laburista ma jsir riferenza għax-xogħlijiet ta’ modernizzar kontinwi fl-iskejjel t’Għawdex li l-Ministeru għal Għawdex fassal u qiegħed jimplimenta mill-1999 ‘l hawn. Il-Ministru Debono qalet li matul din is-sena waħedha, il-Ministeru għal Għawdex daħal għal proġett ta’ modernizzar komplet b’valur ta’ Lm135,000 għall-iskola primarja tax-Xewkija. F’dawn l-aħħar seba’ snin u nofs il-Ministeru għal Għawdex wettaq xogħlijiet f’kull skola t’Għawdex filwaqt li ntroduċa żewġ ċentri ta’ l-MCAST, biċ-ċentru tax-Xewkija jħoss il-bżonn ta’ estensjoni. Id-dokument ippreżentat mill-Partit Laburista bl-iktar mod konvenjenti jinjora kompletament is-suċċessi tal-Gvern u l-pjanijiet tiegħu f’dan ir-rigward filwaqt li l-istess dokument ma jagħmel ebda proposta għal xi tip ta’ ħidma mill-Partit Laburista f’dan ir-rigward. Min-naħa l-oħra, qalet il-Ministru Debono, id-dokument jipproponi li jibdew isiru numru ta’ korsijiet, li fil-verita’ diġa’ qegħdin jiġu offruti f’Għawdex. Dawn il-korsijiet ivarjaw minn dawk fl-informatika, fl-ippjanar, fl-agrikoltura u studji ta’ negozju. 

B’riferenza għall-qasam tas-saħħa, il-Ministru Debono qalet li huwa nkoraġġanti li l-Partit Laburista jirreferi għall-kura mogħtija fl-isptar t’Għawdex bħala waħda “tajba u f’ċerti taqsimiet tajba ħafna”. Dan pero’ ma jfissirx li l-Gvern qiegħed b’idejh fuq żaqqu imma kontinwament qiegħed ifittex li jtejjeb il-kwalita’ tas-servizzi offruti fl-Isptar Ġenerali t’Għawdex bil-Ministeru kontinwament ifittex li jżid servizzi ġodda u jtejjeb dawk eżistenti. Is-swali kollha ta’ l-isptar u ż-żoni tal-pazjenti ġew imtejba b’mod sostanzjali mill-1999 ‘l quddiem filwaqt li ġew miżjuda diversi servizzi ġodda. L-introduzzjoni ta’ servizzi ġodda, fosthom it-twaqqif ta’ unit tar-Radjoloġija, diġa’ qed isir xogħol preparatorju fuqha filwaqt li l-Ministeru għal Għawdex qiegħed ukoll jipprepara x-xogħol meħtieġ għal proġett ta’ renewable energy u ta’ hazardous waste għall-Isptar Ġenerali t’Għawdex.  

Dwar il-qasam ta’ l-isport il-Ministru Debono qalet li l-Partit Laburista qed jipprova jieħu l-merti ta’ proġett propost mill-Ministeru għal Għawdex li se jtejjeb u jutilizza aħjar l-ispazju okkupat mill-korsa taż-żwiemel f’Ta’ Xħajma, limiti tax-Xewkija. Il-Ministru Debono qalet li f’Ġunju 2005 il-Ministeru għal Għawdex issottometta applikazzjoni ma’ l-Awtorita’ Dwar l-Ambjent u l-Ippjanar għall-iżvilupp tal-korsa inkluż l-immodernizzar u t-titjib ta’ faċilitajiet eżistenti u l-ħolqien ta’ faċilitajiet ġodda fosthom trakka għall-atletika. Dwar l-assistenza lil assoċjazzjonijiet mhux governattivi bħall-Fondazzjoni Arka u l-Fondazzjoni Oasi, il-Ministru Debono qalet li dawn l-organizzazzjonijiet qed jagħtu kontribuzzjoni mill-iktar siewja lis-soċjeta’ u l-Gvern ilu jassistihom sa mit-twaqqif tagħhom permezz ta’ għajnuna finanzjarja u għajnuna oħra.  

Il-Ministru Debono rreferiet ukoll għas-sistema amministrattiva li qed jipproponi l-Partit Laburista għal Għawdex u qalet li bil-ħolqien tal-Kunsill Reġjonali għal Għawdex, il-Ministeru għal Għawdex qed jiġi relegat bħala l-“fergħa eżekuttiva tal-Kunsill Reġjonali”. Il-Ministru Debono qalet li l-Gvern jemmen li Għawdex jixraqlu Ministeru li, minbarra li jikkonsulta b’mod dirett mal-partijiet konċernati t’Għawdex kif fil-fatt qed jagħmel, iżomm ir-responsabilta’ u l-obbligazzjonijiet li ġġib magħha l-amministrazzjoni tal-gżira.  

Il-Ministru Debono kkonkludiet billi qalet li huwa nkoraġġanti li l-Parti Laburista juri li jaqbel ma’ ħafna minn dak li l-Gvern preżenti wettaq diġa’ għal Għawdex kif ukoll ma’ proġetti u inizjattivi li l-Ministeru għal Għawdex qed jimplimenta f’dawn is-snin. Madankollu, qalet il-Ministru Debono, l-importanza li qiegħed jgħid li ser jagħti l-Partit Laburista lill-gżira t’Għawdex bħala reġjun tiċċajpar għal kollox minħabba d-deċiżjoni konfliġġenti li qed jadotta l-istess Partit Laburista fejn tidħol ir-ratifika ta’ l-emenda kostituzzjonali biex Għawdex jinżamm distrett elettorali wieħed.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow