Left arrow Mur Lura

IL-MINISTRU DOLORES CRISTINA TNIEDI L-KAMPANJA TA’ INFORMAZZJONI U PUBBLIĊITÀ DWAR IL-PROGRAMM ‘EQUAL’ GĦAL MALTA

pr0759
Date Icon 23/05/2006

Il-Ministru għall-Familja u Solidarjetà Soċjali, l-Onor. Dolores Cristina, nediet uffiċjalment il-kampanja ta’ informazzjoni u pubbliċità għal Programm EQUAL Malta, 2004-2006. Ix-xogħol fuq dan il-Programm kien qed isir fuq medda ta’ żmien ta’ preparament.

Dan il-Programm jippromwovi mezzi ġodda li jiġġieldu kull forma ta’ inugwaljanza u diskriminazzjoni fis-settur tax-xogħol. Il-programm jimplimenta miżuri li jiffaċilitaw l-aċċess għal xogħol u taħriġ għal persuni li m’għandhomx xogħol. It-trans-nazzjonalità hi element importanti ieħor fl-inizjattiva EQUAL. Permezz ta’ dan, l-imsieħba fil-proġetti f’Malta u fl-iStati Membri ta’ l-Unjoni Ewropea jaqsmu ma’ xulxin it-tagħlim miksub u l-prattiċi tajbin.

Il-Unit tal-Fond Soċjali Ewropew (ESF) tal-Ministeru tal-Familja u Solidarjetà Soċjali hi l-istruttura nazzjonali maħtura għall-programm EQUAL u responsabbli għall-amministrazzjoni tal-Programm.

Kif qalet il-Ministru Cristina, “il-pilastri prinċipali ta’ l-istrateġija Ewropea għall-impjiegi huma mibnija fuq l-aċċess adegwat għall-impieġi, l-impriża, l-opportunitajiet indaqs, u fuq kemm persuna jew azjenda tista’ taddatta ruħha għal ċirkostanzi varji. Malta ffukat fuq dawn l-erba’ temi prinċipali, b’attenzjoni partikolari ħalli l-ħames Proġetti magħżula fil-Programm EQUAL jippromwovu l-ugwaljanza għall-irġiel u n-nisa.”

Is-Sur Mark Musù, Direttur għall-Affarijiet ta' l-Unjoni Ewropea u Internazzjonali fil-Ministeru qal li “l-għan ta’ din il-kampanja mhuwiex biss li jgħarraf lill-pubbliku dwar x’qed isir f’dan il-qasam, iżda wkoll biex iżid l-għarfien dwar opportunitajiet li jeżistu għall-fondi strutturali, speċjalment taħt il-Fond Soċjali Ewropew.”

Il-kampanja ta’ tagħrif fuq il-Programm EQUAL, kif ukoll kampanji oħra dwar il-proġetti individwali li jaqgħu taħt il-Programm EQUAL, għandhom l-għan li jgħinu gruppi partikolari u individwi sabiex jiksbu t-tagħrif meħtieġ dwar aktar taħriġ u edukazzjoni.

Wieħed mill-proġetti taħt il-miżura EMPLOYABILITY ġie msejjaħ Headstart u qed jitmexxa mill-Awtorità tad-Djar. Dan jipprovdi taħriġ u ċertifikati għal żgħażagħ li jkunu ser iħallu xi istituzzjoni. Permezz ta’ taħriġ, pariri tekniċi u esperjenza ta’ xogħol, dan il-proġett igħin lil parteċipanti biex ikunu jistgħu jsibu xogħol fiss. Il-proġett jgħin ukoll lil parteċipanti jiksbu akkommodazzjoni li jifilħu jħallsu għaliha.

Proġett ieħor għandu l-għan li joħloq opportunitajiet ta’ xogħol għal nies vulnerabbli, permezz ta’ attivitajiet ta’ riċiklaġġ fuq skala żgħira. Dan il-proġett, li hu mmexxi mill-WasteServ, iżid l-opportunitajiet biex dawn il-persuni jiksbu xogħol fiss fil-qasam tar-riċiklaġġ - settur li l-importanza tiegħu qegħda dejjem tikber.

Taħt il-miżura ENTREPRENEURSHIP proġett immexxi mill-Malta Enterprise jħeġġeġ nies li m’għandhomx xogħol, speċjalment in-nisa, biex jibdew neġozju għal rashom. Wara li jispiċċaw it-taħriġ tagħhom, l-individwi magħżula jingħataw l-opportunità li japplikaw għal fondi biex l-idea tagħhom titwettaq f’negozju. Dawn jingħataw wkoll l-appoġġ meħtieġ fil-bidu tan-negozju tagħhom.

Taħt il-miżura EQUAL OPPORTUNITIES hemm proġett immexxi mill-Kummissjoni Nazzjonali għal Promozzjoni ta’ l-Ugwaljanza (NCPE). Dan il-proġett iħeġġeġ lin-nisa jibdew jaħdmu. Permezz ta’ mezzi diversi, fosthom l-empowerment u l-użu ta’ role models, dan il-proġett għandu l-għan li jgħallem u jagħti kuraġġ lil nisa li m’għandomx impieg.

Taħt il-miżura ASYLUM SEEKERS, dwar min qed ifittex l-ażil politiku, hemm proġett immexxi mill-Fondazzjoni għas-Servizzi Soċjali. Dan joffri appoġġ, gwida u, possibilment, xogħol jew apprendistat, fil-limiti tal-liġijiet eżistenti. It-taħriġ ikopri suġġetti ta’ natura soċjali u, aktar tard, taħriġ vokazzjonali. Il-korsijiet huma bl-Ingliż sabiex dawk li jieħdu sehem ikunu jistgħu jintegraw ruħhom f’kull pajjiż Ewropew, jekk ma jkunx possibli li jerġgħu jintegraw ruħhom f’pajjiżhom.

L-esperjenzi pożittivi tal-proġetti tal-Programm EQUAL jintużaw għall-iżvilupp tal-politika f’dan il-qasam, għaliex l-għanijiet prinċipali tal-Programm huma l-iżvilupp ta’ mezzi ġodda għal politika soċjali u dik dwar l-impjiegi. Dawn imbagħad ikunu jistgħu jiġu addattati u mħaddna fuq livell nazzjonali u f’kuntest Ewropew.

Għal aktar informazzjoni wiehed jista’ jżur il-website: www.esf.gov.mt

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow