Left arrow Mur Lura

GRUPPI BARRANIN FIL-FESTIVAL NAZZJONALI TAL-GĦANA

pr0752
Date Icon 22/05/2006

Il-Festival Nazzjonali tal-Għana ta’ din is-sena se jittella’ bejn il-Ġimgħa 26 u l-Ħadd, 28 ta’ Mejju fil-Ġonna ta’ l-Argotti, l-Furjana. Il-Festival, organizzat mill-Kunsill Malti għall-Arti u l-Kultura fi ħdan il-Ministeru għat-Turiżmu u Kultura, daħal fid-disa’ sena tiegħu u hu llum parti importanti mill-kalendarju ta’ attivitajiet li jiġu organizzati kull sena biex ikabbru t-tradizzjonijiet u l-folklor lokali. L-ewwel darba li ġie organizzat dan il-Festival, fl-1998, pparteċipaw fih aktar minn 60 għannej. Fil-Festival ta’ din is-sena se jipparteċipaw numru ta’ għannejja u mużiċisti Maltin u gruppi ta’ għannejja minn Ragusa, Spanja, il-Libja u t-Tunizija.

Il-Festival tal-Għana ta’ din is-sena ser jinqasam fi tliet kategoriji: għana spirtu pront, għana tal-fatt u għana la Bormliża jew l-għana fl-għoli.

Il-Ministru għat-Turiżmu u Kultura qal li l-identità ta’ pajjiż tinbena fuq il-kultura, l-istorja u t-tradizzjoni. Hu qal li l-folklor jagħmel parti minn din it-tradizzjoni. “Malta hi pajjiż bi storja millenarja mibnija madwar diversi perijodi ta’ okkupazzjoni minn barranin li matulhom il-Maltin żammew l-identità tagħhom għaliex għarfu jgħaddu minn familja għall-oħra, u minn ġenerazzjoni għall-oħra, dawn it-tradizzjonijiiet,” tenna l-Ministru Zammit Dimech.

Il-Ministru Zammit Dimech qal li dan il-Festival hu punt ta’ riferiment għal studjużi Maltin biex iħaffru fil-fond l-għeruq tal-poplu Malti u hekk isiru jafu aktar dwar l-antenati tagħna.

Il-Ministru għat-Turiżmu u Kultura qal li matul is-snin li ilu jiġi organizzat dan il-Festival ġew introdotti diversi attivitajiet innovattivi. Hu qal li din is-sena kien ser ikun hemm ‘monitor’ biex fuqu jittellgħu tradizzjonijiet bil-Malti u bl-Ingliż għall-membri ta’ l-udjenza lokali u barranija. Matul il-Festival se tittella’ wirja ta’ snajja’ minn artiġġjani Maltin bil-kollaborazzjoni tal-Kunsill Malti tas-Snajja’.

Il-Ministru għat-Turiżmu u Kultura qal li ftit tal-jiem ilu pajjiżna ċċelebra t-tieni anniversarju mis-sħubija ta’ Malta fl-Unjoni Ewropea. Hu qal li l-Unjoni Ewropea hi mibnija fuq id-diversità, diversità li fuqha bnejna l-identità li għamlitna nazzjon sovran. Hu qal li bħala pajjiż żgħir din l-identità trid tkompli timbuttana biex inżommu postna fil-familja ta’ 25 Stat membru ta’ l-Unjoni Ewropea u fid-dinja.

Il-Ministru Zammit Dimech qal li l-għana tikkontribwixxi lejn li nżommu l-identità tagħna u għalhekk irridu nagħmlu ħilitna biex mhux biss nikkonservawha iżda nxerrduha fost iż-żgħażagħ tagħna. Hu qal li kien b’dan il-ħsieb li ried jawgura lill-organizzaturi u lill-għannejja kollha kull suċċess fil-Festival tal-Għana ta’ din is-sena.

Ixxerja din l-istqarrija Icon socials Icon socials Icon socials Icon socials

Stqarrijiet Oħra:

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PROJECTS  More than 20 digital gaming and esports companies showcase Malta’s Industry Growth at PLAYCON 2026

PR261958EN

PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠIĊI  L-istrateġija tal-2019 qed tħalli l-frott: aktar minn 20 kumpanija tal-logħob diġitali u l-esports irrappreżentati waqt il-ftuħ ta’ PLAYCON 2026

PR261958

STQARRIJA MILL-MINISTERU GĦALL-EKONOMIJA, IT-TEKNOLOĠIJA U PROĠETTI STRATEĠ...

Aktar Stqarrijiet Right arrow