Tinżamm f’Għawdex Konferenza Internazzjonali dwar il-politika Ewropea
F’Għawdex dalgħodu ltaqa’ l-Uffiċċju Politiku tal-Konferenza għal Reġjuni Periferiċi u Marittimi ta’ l-Unjoni Ewropea (CPMR), fejn 60 delegat minn reġjuni differenti ddiskutew suġġetti varji ta’ importanza għar-regjuni. L-istedina sabiex din il-laqgħa ssir f’Għawdex ġiet mill-Onor. Giovanna Debono, Ministru għal Għawdex u Viċi-President tas-CPMR. Il-Konferenza għal Reġjuni Periferiċi u Marittimi ta’ l-Unjoni Ewropea tirrapreżenta l-pajjiżi membri ġodda ta’ l-Unjoni Ewropea.
Il-laqgħa bdiet bl-introduzzjoni tal-Ministru Debono li tkellmet dwar l-identita’ distinta tal-gżira t’Għawdex matul iż-żmien, b’mod partikolari matul dawn l-aħħar snin mill-Indipendenza ’l quddiem, fejn minbarra li twaqqfu diversi strutturi reġjonali li jsaħħu d-dimensjoni Għawdxija, il-Gvern waqqaf il-Ministeru għal Għawdex fl-1987 u, iktar riċenti, akkwista trattament speċjali mill-Unjoni Ewropea f’dokument anness mat-Trattat ta’ Adeżjoni li jirrikonoxxi l-bżonnijiet speċifiċi tal-gżira mill-Unjoni Ewropea.
Il-Ministru Debono qalet li s-sehem ta’ Għawdex f’fora internazzjonali bħas-CPMR jikkonferma kemm Għawdex għandu leħen, mhux biss fit-tfassil tal-politika lokali imma wkoll dik Ewropea, biex b’hekk Għawdex għandu rwol fil-ħolqien ta’ għarfien ta’ problemi speċifiċi u fit-tfassil ta’ miżuri speċifiċi li jolqtu l-interessi ta’ gżejjer u reġjuni periferiċi bħal Għawdex, fl-isfera internazzjonali ta’ l-Unjoni Ewropea.
Waqt il-laqgħa ta’ l-Uffiċċju Politiku, il-membri ddiskutew diversi suġġetti marbuta ma’ l-implimentazzjoni tal-politika Ewropea f’reġjuni periferiċi u marittimi ta’ l-Unjoni Ewropea, fosthom dwar il-Politika Marittima Ewropea li qed tiġi proposta mill-UE, u li mistennija tiġi ppubblikata għad-diskussjoni pubblika iktar tard dan ix-xahar.
Il-membri ddiskutew ukoll suġġetti rilevanti għar-reġjuni marittimi u periferiċi ta’ l-Ewropa fosthom dwar il-Politika ta’ Koeżjoni għall-2007-2013, dwar l-iżvilupp agrikolu u rurali, it-tema tal-globalizzazzjoni u l-impatt tagħha fuq reġjuni, l-impenji ta’ l-iżvilupp ta’ politika għall-enerġija sostenibbli, il-koperazzjoni internazzjonali, sigurta’ fl-ibħra u temi oħra.
Stqarrijiet Oħra:
PR261958EN
PRESS RELEASE BY THE MINISTRY FOR THE ECONOMY, TECHNOLOGY AND STRATEGIC PRO...
PR261958